ປາຖະກະຖາ ທັດສະນະສໍາຄັນ ກ່ຽວກັບວຽກງານແມ່ຍິງຂອງສະຫາຍ ສີຈິ້ນຜິງ

Mar 17, 2026

ປາຖະກະຖາ ທັດສະນະສໍາຄັນ ກ່ຽວກັບວຽກງານແມ່ຍິງຂອງສະຫາຍ ສີຈິ້ນຜິງ

—————————
ໃນຕອນເຊົ້າວັນທີ 10 ມີນາ 2026, ສູນກາງສະຫະພັນແມ່ຍິງລາວ (ສສຍລ) ຮ່ວມກັບ ສະຖານເອກອັກຄະລັດຖະທູດ ສປ ຈີນ ປະຈໍາ ສປປ ລາວ ຈັດປາຖະກະຖາ ທັດສະນະທີ່ສໍາຄັນກ່ຽວກັບວຽກງານແມ່ຍິງຂອງສະຫາຍ ສີຈິ້ນຜິງ ເລຂາທິການໃຫຍ່, ປະທານປະເທດ ແຫ່ງ ສປ ຈີນ ເນື່ອງໃນໂອກາດສະເຫຼີມສະຫຼອງວັນແມ່ຍິງສາກົນ ວັນທີ 8 ມີນາ ຄົບຮອບ 116 ປີ; ໂດຍການເປັນປະທານ ແລະ ກ່າວເປີດພິທີຂອງ ທ່ານ ນາງ ອາລີ ວົງໜໍ່ບຸນທໍາ ປະທານຄະນະບໍລິຫານງານ ສສຍລ, ໃຫ້ກຽດເຂົ້າຮ່ວມໂດຍ ທ່ານ ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ; ທ່ານ ນາງ ບຸນຄໍາ ວໍລະຈິດ ເລຂາທິການສູນກາງພັກ, ຜູ້ວ່າການທະນາຄານ ແຫ່ງ ສປປ ລາວ; ທ່ານ ບຸນເຫຼືອ ພັນດານຸວົງ ຫົວໜ້າຄະນະພົວພັນຕ່າງປະເທດສູນກາງພັກ; ທ່ານ ນາງ ຟາງ ຫົງ ເອກອັກຄະລັດຖະທູດວິສາມັນ ຜູ້ມີອໍານາດເຕັມແຫ່ງ ສປ ຈີນ ປະຈໍາ ສປປ ລາວ; ມີບັນດາການນໍາພັກ-ລັດ, ຄະນະນຳກະຊວງ, ອົງການຂັ້ນສູນກາງ, ຄະນະບໍລິຫານງານ ສສຍລ, ຄະນະປະທານ ສຍ ບັນດາກະຊວງ-ອົງການ, ຄອບຄົວການນຳຂັ້ນສູງຂອງພັກ-ລັດ, ພະນັກງານປະຕິວັດອາວຸໂສ, ອະດີດການນຳຂອງສະຫະພັນແມ່ຍິງລາວເຂົ້າຮ່ວມ.
ທ່ານ ນາງ ອາລີ ວົງໜໍ່ບຸນທໍາ ໄດ້ກ່າວເປີດພິທີວ່າ: ການປາຖະກະຖາ ທັດສະນະສໍາຄັນ ກ່ຽວກັບວຽກງານແມ່ຍິງ ຂອງສະຫາຍ ສີຈິ້ນຜິງ ເນື່ອງໃນໂອກາດສະເຫຼີມສະຫຼອງວັນແມ່ຍິງສາກົນ 2026 ຄົບຮອບ 116 ປີ ແມ່ນໜຶ່ງໃນກິດຈະກໍາສະເຫຼີມສະຫຼອງວັນແມ່ຍິງສາກົນ ຊຶ່ງຈະໄດ້ພ້ອມກັນຮຽນຮູ້ ທັດສະນະກ່ຽວກັບວຽກງານແມ່ຍິງຂອງ ສະຫາຍ ສີຈິ້ນຜິງ ແລະ ຈະໄດ້ຮຽນຮູ້ວັດທະນະທໍາທີ່ຫຼາກຫຼາຍຂອງແມ່ຍິງຈີນ; ສໍາລັບ ສປປ ລາວ ແລະ ສປ ຈີນ ໄດ້ມີມູນເຊື້ອ-ສາຍພົວພັນມິດຕະພາບ ມາເປັນເວລາດົນນານ, ໃນປີ 2026 ເປັນປີສະເຫຼີມສະຫຼອງສາຍພົວພັນການທູດ ຄົບຮອບ 65ປີ ແລະ ເປັນປີມິດຕະພາບລາວ-ຈີນ ເວົ້າສະເພາະ ສະຫະພັນແມ່ຍິງລາວ ແລະ ສະຫະພັນແມ່ຍິງຈີນ ໄດ້ມີການພົວພັນຮ່ວມມືຢ່າງເປັນປົກກະຕິ, ໂດຍໄດ້ແລກປ່ຽນຂໍ້ມູນຂ່າວສານຊຶ່ງກັນ ແລະ ກັນ ກ່ຽວກັບວຽກງານການສົ່ງເສີມ ແລະ ພັດທະນາແມ່ຍິງ, ການກໍ່ສ້າງຊັບພະຍາກອນມະນຸດ, ການປົກປ້ອງສິດທິຂອງແມ່ຍິງ-ເດັກນ້ອຍ ແລະ ອື່ນໆ; ທາງ ສປ ຈີນ ໂດຍຜ່ານສະຖານທູດ ສປ ຈີນ ປະຈໍາ ສປປ ລາວ ໄດ້ໃຫ້ການສະໜັບສະໜູນ ໃນການຈັດປາຖະກະຖາ ໃນຄັ້ງນີ້ ເຊິ່ງເປັນຫົວຂໍ້ທີ່ມີຄວາມໝາຍສໍາຄັນທີ່ສຸດ ສໍາລັບເອື້ອຍນ້ອງແມ່ຍິງລາວ ໂດຍສະເພາະການນໍາເພດຍິງໃນແຕ່ລະຂັ້ນ ເພື່ອນໍາເອົາບົດຮຽນໄປໝູນໃຊ້ເຂົ້າໃນວຽກງານຕົວຈິງຢ່າງເໝາະສົມ ຕໍ່ການພັດທະນາແມ່ຍິງລາວ ແລະ ຍັງເປັນການແລກປ່ຽນວັດທະນະທໍາທີ່ສວຍງາມ ແລະ ອຸດົມຮັ່ງມີຂອງຈີນ ທີ່ສະແດງອອກຜ່ານແມ່ຍິງ.
ຫຼັງຈາກນັ້ນ, ທ່ານ ນາງ ຟາງ ຫົງ ເອກອັກຄະລັດຖະທູດວິສາມັນ ຜູ້ມີອໍານາດເຕັມແຫ່ງ ສປ ຈີນ ປະຈໍາ ສປປ ລາວ ໄດ້ເຜີຍແຜ່ແນວຄິດທັດສະນະທີ່ສໍາຄັນກ່ຽວກັບວຽກງານແມ່ຍິງຂອງສະຫາຍສີຈິ້ນຜີງ ໂດຍມີເນື້ອໃນສໍາຄັນບາງຕອນວ່າ: ພາລະກິດຂອງແມ່ຍິງ ແມ່ນອົງປະກອບທີ່ສຳຄັນຂອງພັກ ແລະ ປະເທດຊາດ, ເປັນສັນຍາລັກທີ່ສຳຄັນຂອງຄວາມກ້າວໜ້າຂອງອາລິຍະທຳມະນຸດ ແລະ ເປັນກຳລັງທີ່ຂາດບໍ່ໄດ້ໃນການພັດທະນາໂລກ. ນັບຕັ້ງແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກກອມມູນິດຈີນເປັນຕົ້ນມາ, ຄະນະກຳມະການສູນກາງພັກກອມມູນິດຈີນທີ່ມີສະຫາຍ ສີຈິ້ນຜິງ ເປັນແກນກາງ ໄດ້ໃຫ້ຄວາມສຳຄັນຕໍ່ວຽກງານຂອງແມ່ຍິງ ຈາກທັດສະນະໂດຍລວມຂອງການພັດທະນາພັກ ແລະ ປະເທດ ໄດ້ຈັດແຈງວຽກງານຂອງແມ່ຍິງ, ສົ່ງເສີມການໃຊ້ສິດທິປະຊາທິປະໄຕຢ່າງເທົ່າທຽມກັນຂອງແມ່ຍິງຕາມກົດໝາຍ, ການມີສ່ວນຮ່ວມຢ່າງເທົ່າທຽມກັນໃນການພັດທະນາເສດຖະກິດ-ສັງຄົມ ແລະ ການຊົມໃຊ້ໝາກຜົນຂອງການປະຕິຮູບ ແລະ ການພັດທະນາຢ່າງເທົ່າທຽມກັນ. ນອກຈາກນີ້, ລັດຖະບານຈີນ ຍັງເລັ່ງແກ້ໄຂບັນຫາຄວາມທຸກຍາກ ໂດຍມີເປົ້າໝາຍເຮັດໃຫ້ແມ່ຍິງສາມາດຊອກຫາວຽກເຮັດງານທຳຢູ່ໃກ້ບ້ານຂອງເຂົາເຈົ້າ ດ້ວຍການສະໜັບສະໜູນນະໂຍບາຍຕ່າງໆ ຊຶ່ງມີແມ່ຍິງ 8.7 ລ້ານຄົນ ໄດ້ເລີ່ມຕົ້ນທຸລະກິດຂອງຕົນເອງ ສາມາດເພີ່ມລາຍໄດ້ໃຫ້ເຂົາເຈົ້າ. ຈີນ ແລະ ລາວ ລ້ວນແຕ່ຢຶດໝັ້ນເອົາປະຊາຊົນເປັນສູນກາງ, ລວມທັງສິດສະເໝີພາບລະຫວ່າງຍິງ-ຊາຍ ເຂົ້າໃນລະບົບຂອງປະເທດຊາດ ເພື່ອຮັບປະກັນສິດທິຂອງແມ່ຍິງຢ່າງເຕັມທີ່ ແລະ ສະໜັບສະໜູນການມີສ່ວນຮ່ວມຂອງແມ່ຍິງໃນທຸກຂົງເຂດ, ການເພີ່ມທະວີການແລກປ່ຽນ ແລະ ການຮ່ວມມືໃນຂົງເຂດວຽກງານແມ່ຍິງລະຫວ່າງຈີນ ແລະ ລາວ ເປັນອົງປະກອບທີ່ສຳຄັນຂອງມິດຕະພາບລະຫວ່າງສອງປະເທດ ແລະ ເປັນກຳລັງທີ່ສຳຄັນໃນການສົ່ງເສີມການພັດທະນາຮ່ວມກັນ.
ນອກຈາກນີ້, ພາຍໃນງານຍັງມີກິດຈະກຳສາທິດການປຸງແຕ່ງອາຫານລາວ ຈາກຮ້ານອາຫານຄົວລາວ; ສາທິດການປຸງແຕ່ງອາຫານຈີນ ຈາກພໍ່ຄົວຂອງໂຮງແຮມ ລາດຊະວົງ ແວນດາ ວິດສຕາ ແລະ ສາທິດການຊົງນໍ້າຊາໂດຍ ສູນວັດທະນະທໍາຈີນ ປະຈໍາ ສປປ ລາວ.