ກອງປະຊຸມໃຫຍ່ ສະມາຊິກສະຫະພັນແມ່ຍິງ ຄະນະພົວພັນຕ່າງປະເທດສູນກາງພັກ ຄັ້ງທີ II

Mar 3, 2025

ກອງປະຊຸມໃຫຍ່ ສະມາຊິກສະຫະພັນແມ່ຍິງ ຄະນະພົວພັນຕ່າງປະເທດສູນກາງພັກ ຄັ້ງທີ II
………………………………………..
ກອງປະຊຸມໃຫຍ່ ສະມາຊິກສະຫະພັນແມ່ຍິງ ຄະນະພົວພັນຕ່າງປະເທດສູນກາງພັກ (ຄຕພ) ຄັ້ງທີ II ໄດ້ຈັດຂຶ້ນໃນວັນທີ 25 ກຸມພາ 2025 ທີ່ຄະນະພົວພັນຕ່າງປະເທດສູນກາງພັກ ພາຍໃຕ້ການເປັນປະທານຂອງ ສະຫາຍ ນາງ ສີຣິພອນ ຄູຫາເທບ ປະທານສະຫະພັນແມ່ຍິງ ຄຕພ ຊຸດທີ I; ໃຫ້ກຽດເຂົ້າຮ່ວມໂດຍ ສະຫາຍ ບຸນເຫຼືອ ພັນດານຸວົງ, ຮັກສາການເລຂາຄະນະພັກ, ຮັກສາການຫົວໜ້າຄະນະພົວພັນຕ່າງປະເທດສູນກາງພັກ; ສະຫາຍ ນາງ ສິລິກິດ ບຸບຜາ ຄະນະພັກ, ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ; ມີຕາງໜ້າຈາກອົງການຈັດຕັ້ງມະຫາຊົນ, ຄະນະສະຫະພັນແມ່ຍິງຄະນະພົວພັນຕ່າງປະເທດສູນກາງພັກ, ຄະນະພັກ, ຄະນະໜ່ວຍພັກ, ຜູ້ແທນສົມບູນ ແລະ ແຂກຖືກເຊີນ ເຂົ້າຮ່ວມ.
ໃນວາລະກອງປະຊຸມ ຜູ້ເຂົ້າຮ່ວມໄດ້ຮັບຟັງການຜ່ານຮ່າງບົດລາຍງານການເມືອງທັງສອງພາກ ແລະ ແຜນພັດທະນາ 5 ປີ ຕໍ່ໜ້າ; ໄລຍະຜ່ານມາ ຄະນະບໍລິຫານງານສະຫະພັນແມ່ຍິງ ຄຕພ ໄດ້ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນ, ສາມາດປະຕິບັດ ແລະ ໄດ້ຮັບຜົນສຳເລັດຂອງວຽກງານໃນແຕ່ລະດ້ານ ເຊິ່ງໄດ້ເອົາໃຈໃສ່ສຶກສາອົບຮົມແນວຄິດການເມືອງແນວຄິດຂອງສະມາຊິກ ແລະ ພະນັກງານເພດຍິງໃນຂະແໜງການໃຫ້ມີນໍ້າໃຈຮັກຊາດ, ມີຄຸນສົມບັດສິນທຳປະຕິວັດ, ຮັກສາໄດ້ຄຸນລັກສະນະທີ່ເປັນມູນເຊື້ອຂອງແມ່ຍິງລາວ ແລະ ປະຕິບັດວຽກງານຢ່າງມີຄວາມຮັບຜິດຊອບສູງ; ປັດຈຸບັນ, ສະມາຊິກສະຫະພັນແມ່ຍິງ ຄຕພ ທີ່ຢູ່ໃນຂັ້ນພະນັກງານນໍາພາ ຂັ້ນຫົວໜ້າກົມ 1 ສະຫາຍ, ຂັ້ນຮອງຫົວໜ້າກົມ 2 ສະຫາຍ, ຂັ້ນຫົວໜ້າພະແນກ 6 ສະຫາຍ, ຂັ້ນຮອງຫົວໜ້າພະແນກ 8 ສະຫາຍ, ເຊິ່ງກວມເອົາ 24,24% ຂອງພະນັກງານນໍາພາທັງໝົດ. ໃນນັ້ນ, ຂັ້ນຄະນະພັກ ຄຕພ ມີ 1 ສະຫາຍ, ຂັ້ນເລຂາໜ່ວຍພັກ 1 ສະຫາຍ ແລະ ຂັ້ນກໍາມະການໜ່ວຍພັກ 2 ສະຫາຍ, ຜ່ານມາໄດ້ຮັບທຸງໄຊ 3 ດີ 1 ອັນ, ໃບຍ້ອງຍໍຂັ້ນຄະນະພັກ 1 ໃບ ແລະ ໃບຍ້ອງຍໍ 3 ດີ ບຸກຄົນ ຈໍານວນ 38 ໃບ ຈາກ ສູນກາງສະຫະພັນແມ່ຍິງລາວ; ພ້ອມນັ້ນ ຍັງໄດ້ຮັບນາມມະຍົດແມ່ຍິງ 3 ດີ 4 ປີຊ້ອນ (2021-2024) ຈາກ ສູນກາງສະຫະພັນແມ່ຍິງລາວ ແລະ ໃບຍ້ອງຍໍຂັ້ນຕ່າງໆອີກ.
ສໍາລັບການຈັດຕັ້ງປະຕິບັດຂໍ້ແຂ່ງຂັນ 3 ດີ ໄດ້ຈັດຕັ້ງເຜີຍແຜ່, ເຊື່ອມຊຶມຄຳຂວັນ, ຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ ໃຫ້ສະມາຊິກສະຫະພັນແມ່ຍິງ ເປີດບັ້ນແຂ່ງຂັນພ້ອມຕີລາຄາສະຫຼຸບສັງລວມການຈັດຕັ້ງປະຕິບັດຂໍ້ແຂ່ງຂັນ ໃນໄລຍະ ປີ 2021 – 2024 ສາມາດຈັດປະເພດບຸກຄົນ 3 ດີ ປະເພດ I ຈຳນວນ 176 ສະຫາຍ. ຫຼັງຈາກນັ້ນ ຜູ້ແທນສົມບູນ ໄດ້ປ່ອນບັດຄັດເລືອກເອົາຄະນະບໍລິຫານງານສະຫະພັນແມ່ຍິງຊຸດໃໝ່ ຈໍານວນ 5 ສະຫາຍ, ກອງປະຊຸມຄັ້ງປະຖົມມະລຶກເລືອກເອົາສະຫາຍ ນາງ ສຸກສະຫວັນ ແກ້ວວິໄລວັນ ເປັນປະທານ ຄຕພ, ສະຫາຍ ນາງ ພັນທະລາພອນ ດຳລົງບຸນ ເປັນຮອງປະທານທັງເປັນປະທານກວດກາ, ສະຫາຍ ນາງ ພູສີ ວົງແພງຄຳ ເປັນຮອງປະທານ; ສະຫາຍ ນາງ ວັນຄຳ ວິຊາວັນ ເປັນກຳມະການ ທັງເປັນຮອງປະທານກວດກາ; ສະຫາຍ ນາງ ສົມປາດຖະໜາ ວົງປະຊາ ເປັນກຳມະການ.
ໂອກາດທີ່ມີຄວາມໝາຍສຳຄັນນີ້ ຜູ້ເຂົ້າຮ່ວມກອງປະຊຸມໄດ້ຮັບຟັງການໂອ້ລົມຈາກ ສະຫາຍ ບຸນເຫຼືອ ພັນດານຸວົງ ແລະ ສະຫາຍ ນາງ ສິລິກິດ ບຸບຜາ ເຊິ່ງທັງສອງທ່ານໄດ້ເນັ້ນໃຫ້ຄະນະສະຫະພັນແມ່ຍິງຊຸດໃໝ່ ສືບຕໍ່ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ສະມາຊິກສະຫະພັນແມ່ຍິງ ໃຫ້ມີຄວາມໜັກແໜ້ນ; ປັບປຸງການຈັດຕັ້ງສະຫະພັນແມ່ຍິງໃຫ້ນັບມື້ນັບເຂັ້ມແຂງ, ເສີມຂະຫຍາຍມູນເຊື້ອຄວາມສາມັກ ຄີຮັກແພງບົນຄວາມຈິງໃຈຊ່ວຍເຫຼືອເຊິ່ງກັນ ແລະ ກັນ, ຮໍ່າຮຽນເອົາບົດຮຽນທີ່ດີຂອງພະນັກງານຮຸ່ນກ່ອນ, ຫຼີກເວັ້ນການຈຳກັດຮັດແຄບ, ເອົາລັດເອົາປຽບກັນ, ສະໜັບສະໜູນ, ສົ່ງເສີມ, ຍ້ອງຍໍພະນັກງານ-ລັດຖະກອນ ຜູ້ທີ່ມີຄວາມຮູ້, ຄວາມສາມາດ, ມີຜົນງານດີເດັ່ນ. ພ້ອມດຽວກັນນີ້, ກໍຕ້ອງຈີງໃຈຊ່ວຍເຫຼືອກໍ່ສ້າງຜູ້ທີ່ຍັງມີຂໍ້ຂາດຕົກບົກຜ່ອງ, ສ້າງຄວາມເຂັ້ມແຂງໃຫ້ພະນັກງານ-ລັດຖະກອນເພດຍິງ ແນໃສ່ຍົກສູງຄວາມຮູ້ຄວາມສາມາດໃຫ້ແມ່ຍິງ ເພື່ອສ້າງໃຫ້ແມ່ຍິງໄດ້ມີໂອກາດເທົ່າທຽມກັບເພດຊາຍໃນດ້ານວິຊາສະເພາະ, ດ້ານການຄຸ້ມຄອງ, ນຳພາ ແລະ ຕັດສິນບັນຫາໃຫ້ມີຈໍານວນນັບມື້ນັບເພີ່ມຂຶ້ນ. ໂອກາດນີ້, ສູນກາງສະຫະພັນແມ່ຍິງລາວ ໄດ້ມອບເງິນຊຸກຍູ້ກອງປະຊຸມໃຫຍ່ສະມາຊິກ ສະຫະພັນແມ່ຍິງ ຄຕພ ຄັ້ງທີ II ຈໍານວນ 5.000.000 ກີບ.