ກອງປະຊຸມໃຫຍ່ ຜູ້ແທນແມ່ຍິງແຂວງຈໍາປາສັກ ຄັ້ງທີ VIII
………………………………….
ກອງປະຊຸມໃຫຍ່ ຜູ້ແທນແມ່ຍິງ ແຂວງຈໍາປາສັກ ຄັ້ງທີ VIII ໄດ້ໄຂຂຶ້ນ ແລະ ອັດລົງຢ່າງເປັນທາງການ ໃນວັນທີ 19 ມີນາ 2025 ທີ່ສະໂມສອນຂອງແຂວງຈໍາປາສັກ ພາຍໃຕ້ການເປັນປະທານກອງປະຊຸມ ຂອງ ສະຫາຍ ນາງ ເຕດາວັນ ແກ້ວພິລາວັນ ປະທານຄະນະບໍລິຫານງານສະຫະພັນແມ່ຍິງ ແຂວງຈໍາປາສັກ; ໃຫ້ກຽດເຂົ້າຮ່ວມມີ ສະຫາຍ ນາງ ອາລີ ວົງໜໍ່ບຸນທຳ ກຳມະການສູນກາງພັກ, ເລຂາຄະນະບໍລິຫານງານພັກ, ປະທານຄະນະບໍລິຫານງານສູນກາງສະຫະພັນແມ່ຍິງລາວ; ສະຫາຍ ປອ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະບໍລິຫານງານພັກ, ເຈົ້າແຂວງຈໍາປາສັກ; ມີຕາງໜ້າຈາກອົງການຈັດຕັ້ງມະຫາຊົນ, ປ້າອາວຸໂສບໍານານ ພ້ອມດ້ວຍຄະນະພັກອ້ອມຂ້າງແຂວງ, ຜູ້ແທນສົມບູນ ແລະ ແຂກຖືກເຊີນເຂົ້າຮ່ວມທັງໝົດ 250 ສະຫາຍ, ຍິງ 218 ສະຫາຍ ແລະ ຊາຍ 32 ສະຫາຍ, ໃນນີ້ມີຜູ້ແທນສົມບູນ 171 ສະຫາຍ.
ກອງປະຊຸມຜູ້ເຂົ້າຮ່ວມໄດ້ຮັບຟັງການຜ່ານຮ່າງບົດລາຍງານການເມືອງທັງສອງພາກ ຈາກ ສະຫາຍ ນາງ ເຕດາວັນ ແກ້ວພິລາວັນ ຊຶ່ງໄດ້ຍົກໃຫ້ເຫັນຜົນງານການເຄື່ອນໄຫວໄລຍະຜ່ານມາທີ່ມີຜົນສໍາເລັດຫຼາຍດ້ານ ຂອງຄະນະ ສຍ ແຂວງຈໍາປາສັກ ຊຶ່ງສະແດງອອກໃນສຶກສາອົບຮົມການເມືອງ-ແນວຄິດໃຫ້ສະມາຊິກສະຫະພັນແມ່ຍິງ, ແມ່ຍິງບັນດາເຜົ່່າພາຍໃນແຂວງ ໃຫ້ມີນໍ້າໃຈຮັກຊາດ, ມີຄຸນສົມບັດສິນທຳປະຕິວັດ, ຮັກສາໄດ້ຄຸນລັກສະນະທີ່ເປັນມູນເຊື້ອຂອງແມ່ຍິງລາວ, ປະຕິບັດວຽກງານດ້ວຍຄວາມຮັບຜິດຊອບສູງ ແລະ ມີປະສິດທິພາບ, ພະນັກງານເພດຍິງ ໄດ້ຮັບການບຳລຸງທິດສະດີການເມືອງ-ການປົກຄອງທັງພາຍໃນ ແລະ ຕ່າງປະເທດ ຂັ້ນຕົ້ນ 115 ສະຫາຍ, ຂັ້ນກາງ 30 ສະຫາຍ ແລະ ຂັ້ນສູງໄດ້ 18 ສະຫາຍ, ພ້ອມນີ້ຍັງໄດ້ເຂົ້າຮ່ວມຝຶກອົບຮົມດ້ານຕ່າງໆໃນແຕ່ລະໄລຍະ. ນອກຈາກນີ້, ສະມາຊິກ ສຍ ຍັງໄດ້ຮັບການຍ້ອງຍໍ ໃນການປະກອບສ່ວນສ້າງສາພັດທະນາວຽກງານຮອບດ້ານໃນໄລຍະ 5 ປີ ຜ່ານມາ ເປັນຕົ້ນ ໄດ້ຮັບຫຼຽນກາແຮງງານຊັ້ນ I ຈຳນວນ 39 ສະຫາຍ ຫຼຽນ; ຊັ້ນ II ຈຳນວນ101 ສະຫາຍ ແລະ ຊັ້ນ 3 ຈຳນວນ 315 ສະຫາຍ, ຫຼຽນກາແຮງງານ 853 ສະຫາຍ, ໃບຍ້ອງຈາກລັດຖະບານ 2,578 ສະຫາຍ, ໃບຍ້ອງຍໍຂັ້ນແຂວງ 3.616 ສະຫາຍ, ໄດ້ຮັບໃບຍ້ອງຍໍບຸກຄົນ 03 ດີ ປະເພດ I ຈຳນວນ 85,321 ສະຫາຍ ແລະ ປະເພດ II ຈໍານວນ 2,117 ສະຫາຍ, ນໍາພາເປີດຂະບວນການແຂ່ງຂັນ 3 ດີ ໄດ້ 381 ໜ່ວຍ, 235 ຮາກຖານ ກວມ 98% ຂອງຈໍາ
ນວນໜ່ວຍ-ຮາກຖານທັງໝົດ, ສຍ ບ້ານທີ່ໄດ້ຮັບການຢັ້ງຢືນ ແລະ ຮັກສານາມມະຍົດ ເປັນບ້ານ ສຍ 03 ດີໄດ້ 625 ບ້ານ ກວມ 97 % ຂອງຈໍານວນບ້ານທັງໝົດ, ສຍ 9 ເມືອງ 1 ນະຄອນ ສາມາດຮັກສານາມມະຍົດເປັນ ສຍ ເມືອງ 3 ດີ ໄດ້ 100%; ສາມາດຄັດເລືອກພົນລະເມືອງດີໄດ້ 95.325 ສະຫາຍ ກວມ 98% ຂອງຜູ້ເຂົ້າຮ່ວມແຂ່ງຂັນ, ພັດທະນາດີ 94.282 ສະຫາຍ ກວມ 97% ຂອງຜູ້ເຂົ້າຮ່ວມແຂ່ງຂັນ ແລະ ສ້າງຄອບຄົວດີ 93.012 ສະຫາຍ ກວມ 95% ຂອງຜູ້ເຂົ້າຮ່ວມແຂ່ງຂັນ. ພ້ອມນີ້, ຜູ້ແທນກອງປະຊຸມ ໄດ້ເປັນເອກະສັນກັນຮັບຮອງເອົາ ທິດທາງແຜນການ 5 ປີ ຕໍ່ໜ້າ 7 ທິດທາງລວມ ແລະ 10 ຄາດໝາຍສູ້ຊົນ, ບົດສະຫຼຸບການຈັດຕັ້ງປະຕິບັດແຜນພັດທະນາແມ່ຍິງ ແຂວງຈໍາປາສັກ ໄລຍະ 5 ປີ (2021-2025) ແລະ ແຜນພັດທະນາແມ່ຍິງ ໄລຍະ 5 ປີ (2026-2030) ມີ 10 ແຜນງານ 37 ໂຄງການ, ບົດສຳຫຼວດການນຳພາ ຂອງຄະນະບໍລິຫານງານ ສຍ ແຂວງຈໍາປາສັກ ສະໄໝທີ VII, ຊຶ່ງໄດ້ຕີລາຄາການຈັດຕັ້ງປະຕິບັດໜ້າທີ່ວຽກງານ ຕາມພາລະບົດບາດ ທີ່ໄດ້ກໍານົດໄວ້ໃນກົດລະບຽບ ແລະ ກົດໝາຍຢ່າງພາວະວິໄສ. ພ້ອມນີ້ ຍັງໄດ້ຮັບຟັງການປະກອບຄໍາເຫັນຂອງຕົວແບບສະຫະພັນແມ່ຍິງເມືອງມຸນລະປະໂມກ ກ່ຽວກັບ ການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ,
ຕົວແບບໃນການຈັດຕັ້ງປະຕິບັດວຽກງານກອງທຶນ ຂອງສະຫະພັນແມ່ຍິງຮາກຖານ ໂຮງງານຜະລິດຢາ ຊີບີເອັຟ ແລະ
ຄອບຄົວຕົວແບບການປູກຝັງ ແລະ ການລ້ຽງສັດຊຶ່ງສະແດງໃຫ້ເຫັນຜົນງານຂອງແມ່ຍິງໃນການປະກອບສ່ວນພັດທະນາເສດຖະກິດ-ສັງຄົມ ກໍຄື ພັດທະນາແມ່ຍິງລາວບັນດາເຜົ່າ.
ຫຼັງຈາກນັ້ນ, ຜູ້ແທນສົມບູນຍັງໃຊ້ສິດຂອງຕົນເອງປ່ອນບັດຄັດເລືອກເອົາ ຄະນະບໍລິຫານງານສະຫະພັນແມ່ຍິງແຂວງຈໍາປາສັກຊຸດໃໝ່ ຈໍານວນ 35 ສະຫາຍ ໂດຍເລືອກໄດ້ ສະຫາຍ ນາງ ເຕດາວັນ ແກ້ວພິລາວັນ ເປັນປະທານ, ສະຫາຍ ນາງ ສຸກສົມພອນ ພົນອາສາ ເປັນຮອງປະທານ, ສະຫາຍ ນາງ ວັນຄໍາ ແສງສະຫວ່າງ ເປັນຮອງປະທານ ທັງເປັນປະທານກວດກາ; ສະຫາຍ ນາງ ນີຈັນ ແຈ່ມດາສັກ ແລະ ສະຫາຍ ນາງ ສີຫາ ກັນຍາວົງ ເປັນຮອງປະທານ.
ໂອກາດທີ່ມີຄວາມໝາຍສຳຄັນນີ້ ຜູ້ເຂົ້າຮ່ວມກອງປະຊຸມໄດ້ຮັບຟັງການໂອ້ລົມຈາກ ສະຫາຍ ນາງ ອາລີ ວົງໜໍ່ບຸນທໍາ ແລະ ສະຫາຍ ປອ ອາລຸນໄຊ ສູນນະລາດ ເພື່ອເປັນເຂັມຊີ້ທິດເຍືອງທາງໃຫ້ຄະນະຊຸດໃໝ່ໃນການນໍາພາວຽກງານແມ່ຍິງພາຍໃນແຂວງໃນຕໍ່ໜ້າ ຊຶ່ງທັງສອງທ່ານໄດ້ເນັ້ນໃຫ້ຄະນະບໍລິຫານງານສະຫະພັນແມ່ຍິງແຂວງຊຸດໃໝ່ ສືບຕໍ່ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ຖັນແຖວສະມາຊິກ ສຍ, ແມ່ຍິງແຕ່ລະກຸ່ມເປົ້າໝາຍໃຫ້ມີຄວາມໜັກແໜ້ນທາງດ້ານການເມືອງ, ສືບຕໍ່ນໍາປັບປຸງການຈັດຕັ້ງ ສຍ ທຸກຂັ້ນໃຫ້ມີຄວາມໜັກແໜ້ນເຂັ້ມແຂງ, ຄະນະ ສຍ ທຸກຂັ້ນຕ້ອງຖືສໍາຄັນໃນການກໍ່ສ້າງຊ່ວຍເຫຼືອສະມາຊິກ ສຍ ໃຫ້ເປັນແບບຢ່າງຕໍ່ມະຫາຊົນໃນການພັດທະນາຕົນເອງທຸກດ້ານ, ສືບຕໍ່ເຕົ້າໂຮມຄວາມສາມັກຄີພາຍໃນຄະນະກໍຄືພາຍໃນແຂວງໃຫ້ກວ້າງຂວາງ ຄຽງຄູ່ກັບການເອົາໃຈໃສ່ປັບປຸງແບບແຜນນຳພາ-ວິທີເຮັດວຽກໃຫ້ແທດເໝາະກັບຕົວຈິງ ແລະ ນໍາເອົາມະຕິຂອງກອງປະຊຸມດັ່ງກ່າວໄປຈັດຕັ້ງປະຕິບັດໃຫ້ມີຜົນສໍາເລັດ ສືບຕໍ່ນໍາພາຈັງຕັ້ງປະຕິບັດຄຳຂວັນ ແລະ ຂໍ້ແຂ່ງຂັນ 3 ດີ ໃຫ້ເປັນຂະບວນຟົດຟື້ນກວ້າງຂວາງ ແລະ ມີຜົນສໍາເລັດ.
ໂອກາດນີ້ ສູນກາງສະຫະພັນແມ່ຍິງລາວ ໄດ້ມອບເງິນຊຸກຍູ້ກອງປະຊຸມໃຫຍ່ຜູ້ແທນແມ່ຍິງແຂວງຈໍາປາສັກ ຄັ້ງທີ VIII ຈໍານວນ 20.000.000 ກີບ.



