ຕອນບ່າຍວັນທີ 11 ມັງກອນ 2023 ທ່ານ ນາງ ອິນລາວັນ ແກ້ວບຸນພັນ ປະທານຄະນະບໍລິຫານງານ ສສຍລ ພ້ອມຄະນະ ໄດ້ເຂົ້າຮ່ວມພິທີສະຫຼຸບປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ທີ່ ຫໍປະຊຸມແຫ່ງຊາດ, ໂດຍການໃຫ້ກຽດເປັນປະທານຮ່ວມຂອງ ສະຫາຍ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະສະຫາຍ ຟ້າມ ມິງ ຈິງ, ນາຍົກລັດຖະມົນຕີ ແຫ່ງ ສາທາລະນະລັດ ສັງຄົມນິຍົມ ຫວຽດນາມ; ມີບັນດາສະຫາຍການນໍາພັກ, ລັດຖະບານ, ພະນັກງານ, ທະຫານ, ຕຳຫຼວດ, ຊາວໜຸ່ມ, ນ້ອງນັກຮຽນ-ນັກສຶກສາຫວຽດນາມ ແລະ ລາວ ຫຼາຍກວ່າ 450 ຄົນເຂົ້າຮ່ວມ.
ບັນດາຜົນສໍາເລັດຂອງກິດຈະກໍາສະເຫຼີມສະຫຼອງປີສາມັກຄິມິດຕະພາບ ລາວ-ຫວຽດນາມ, ຫວຽດນາມ-ລາວ ໃນປີ 2022 ມີເນື້ອໃນສໍາຄັນບາງຕອນຄື: ການສະຫຼຸບການສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ, ຫວຽດນາມ-ລາວປີ 2022 ເພື່ອສະເຫຼີມສະຫຼອງສອງວັນປະຫວັດສາດ ຄື: ວັນສ້າງຕັ້ງສາຍພົວພັນການທູດ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ຢ່າງຟົດຟື້ນ. ເຊິ່ງນັບແຕ່ພິທີເປີດຢ່າງເປັນທາງການໃນຕົ້ນປີ 2022 ທີ່ນະຄອນຫຼວງຮ່າໂນ້ຍເປັນຕົ້ນມາ, ສອງຝ່າຍໄດ້ຮ່ວມກັນຈັດຫຼາຍກິດຈະກຳ ສະເຫຼີມສະຫຼອງຢ່າງເປັນຂະບວນຟົດຟື້ນ ໃນຂອບເຂດທົ່ວປະເທດ ທັງພາຍໃນ ແລະ ຕ່າງປະເທດ ກໍ່ຄືບັນດາອົງການຕາງໜ້າ ແລະ ສະຖານທູດ ຂອງສອງປະເທດຢູ່ຕ່າງປະເທດ. ສອງຝ່າຍມີການແລກປ່ຽນການຢ້ຽມຢາມ ເຊິ່ງກັນ ແລະ ກັນ ໃນທຸກລະດັບ; ສອງຝ່າຍ ໄດ້ຮ່ວມກັນຈັດຕັ້ງປະຕິບັດຫຼາຍກິດຈະກໍາ ເພື່ອສົ່ງເສີມເສດຖະກິດ, ການຄ້າ, ການລົງທຶນ, ລວມເຖິງບັນດາກິດຈະກໍາສົ່ງເສີມດ້ານວັດທະນະທໍາ-ສັງຄົມ-ການສຶກສາ ເປັນຕົ້ນການແລກປ່ຽນວັດທະນະທໍາ, ວາງສະແດງຮູບພາບ, ການຈັດງານບຸນມະໂຫລານຂອງສະມາຄົມມິດຕະພາບ ແລະ ອື່ນໆ; ພິເສດ ພັກ-ລັດຖະບານ ຫວຽດນາມ ໄດ້ມອບຂອງຂວັນ ເປັນໂຮງຮຽນມັດທະຍົມ ວິຊາຊີບຕົວແບບມິດຕະພາບ ລາວ-ຫວຽດນາມ ຢູ່ແຂວງຄໍາມ່ວນ ເຊິ່ງຖືເປັນໂຮງຮຽນວິຊາຊີບ ຕົວແບບທໍາອິດຢູ່ ສປປ ລາວ. ພ້ອມນີ້, ສອງຝ່າຍ ໄດ້ຮ່ວມກັນຈັດຫຼາຍກິດຈະກໍາໂຄສະນາເຜີຍແຜ່ຕາມສື່ມວນຊົນ, ມີການຕີພິມປື້ມວາລະສານ, ບົດຄວາມ, ມີການຈັດແຂ່ງຂັນຄວາມຮູ້ກ່ຽວກັບການພົວພັນລາວ-ຫວຽດນາມ, ປະກວດບົດກອນ, ບົດເພງ, ບົດຄວາມ, ເຊິ່ງໄດ້ຮັບຄວາມສົນໃຈຢ່າງກວ້າງຂວາງຈາກສັງຄົມ; ມີການໃຫ້ສໍາພາດຂອງການນໍາໂດຍສະເພາະແມ່ນ ສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດ ແຫ່ງ ສປປ ລາວ ແລະ ສະຫາຍ ຫງວຽນ ຊວັນ ຟຸກ, ປະທານປະເທດ ແຫ່ງ ສສ ຫວຽດນາມ ໃນໂອກາດ ວັນສ້າງຕັ້ງສາຍພົວພັນການທູດ 5 ກັນຍາ 2022 ແລະ ອີກຫຼາຍໆສະຫາຍ. ສິ່ງທີ່ພົ້ນເດັ່ນ ແລະ ພິເສດທີ່ສຸດໃນການສະເຫຼີມສະຫຼອງປີສາມັກຄີດັ່ງກ່າວ, ສອງປະເທດໄດ້ຈັດພິທີໂຮມຊຸມນຸມສະເຫຼີມສະຫຼອງໃຫຍ່ຢູ່ສອງນະຄອນຫຼວງຂອງສອງປະເທດ ໃນວັນທີ 18 ກໍລະກົດ 2022 ຢ່າງເຄັ່ງຂຶມ ແລະ ເຕັມໄປດ້ວຍຄວາມໝາຍຄວາມສໍາຄັນ, ໂດຍມີການເຂົ້າຮ່ວມ ຂອງ ການນໍາຂັ້ນສູງສອງປະເທດ ແລະ ມວນຊົນ, ໂອກາດດັ່ງກ່າວ ກໍ່ມີການຈັດສັບປະດາ ວັດທະນະທໍາ ຫວຽດນາມ ແລະ ລາວ ຢູ່ນະຄອນຫຼວງຂອງກັນ ແລະ ກັນ. ໃນຕອນທ້າຍ, ສອງຝ່າຍໄດ້ສະແດງຄວາມຊົມເຊີຍຢ່າງສຸດໃຈ ແລະ ຕີລາຄາສູງ ຕໍ່ການຮ່ວມກັນຈັດການສະເຫຼີມສະລອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ໃນຄັ້ງນີ້ ທີ່ປະສົບຜົນສໍາເລັດຢ່າງຈົບງາມ, ພ້ອມທັງໄດ້ອວຍພອນໃຫ້ສາຍພົວພັນມິດຕະພາບ ທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຈົ່ງໝັ້ນຄົງຄະນົງແກ່ນ ແລະ ຈະເລີນງອກງາມຍິ່ງໆຂຶ້ນຕະຫຼອດໄປ.
