ພາຍຫຼັງສໍາເລັດກອງປະຊຸມພົບປະສອງຝ່າຍ, ທ່ານ ນາງ ອິນລາວັນ ແກ້ວບຸນພັນ ກຳມະການສູນກາງພັກ ປະທານຄະນະບໍລິຫານງານ ສສຍລ ໄດ້ນໍາພາຄະນະຜູ້ແທນຂັ້ນສູງສະຫະພັນແມ່ຍິງຫວຽດນາມ ເຂົ້າຢ້ຽມຂໍ່ານັບ ທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ຮອງປະທານປະເທດແຫ່ງ ສປປ ລາວ ເພື່ອລາຍງານການມາເຄື່ອນໄຫວຢູ່ ສປປ ລາວ ຢ່າງເປັນທາງການໃນຄັ້ງນີ້. ໂອກາດທີ່ມີຄວາມໝາຍສໍາຄັນນີ້ ທ່ານຮອງປະທານປະເທດແຫ່ງ ສປປ ລາວ ໄດ້ຕີລາຄາສູງຕໍ່ການມາເຄື່ອນໄຫວຂອງຄະນະຜູ້ແທນຂັ້ນສູງສະຫະພັນແມ່ຍິງຫວຽດນາມໃນຄັ້ງນີ້, ພ້ອມນີ້ທ່ານໄດ້ຍ້ອງຍໍຊົມເຊີຍຕໍ່ສາຍພົວພັນອັນສະໜິດແໜ້ນຂອງສອງສະຫະພັນແມ່ຍິງຕັ້ງແຕ່ເມື່ອກ່ອນຈົນຮອດປັດຈຸບັນ ທີ່ໄດ້ພົວພັນຊ່ວຍເຫຼືອເຊິ່ງກັນ ແລະ ກັນທຸກດ້ານ. ໂອກາດນີ້ ທ່ານໄດ້ເນັ້ນໃຫ້ສະຫະພັນແມ່ຍິງທັງສອງປະເທດ ສືບຕໍ່ຮັດແໜ້ນສາຍພົວພັນ, ຊ່ວຍເຫຼືອເຊິ່ງກັນ ແລະກັນ, ສ້າງສາຍພົວພັນຈາກຮຸ່ນສູ່ຮຸ່ນ, ຊ່ວຍກັນຍົກລະດັບຄວາມຮູ້ໃນດ້ານຕ່າງໆ, ສ້າງໂອກາດເງື່ອນໄຂໃຫ້ແມ່ຍິງທີ່ມີຊາຍແດນຕິດຈອດກັນໄດ້ພົບປະກັນເລື້ອຍໆ, ສ້າງໃຫ້ເອື້ອຍນ້ອງແມ່ຍິງຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ແຜນພັດທະນາເສດຖະກິດແຫ່ງຊາດ ເພື່ອຈະໄດ້ປະກອບສ່ວນເຂົ້າໃນແຜນດັ່ງກ່າວຢ່າງແທ້ຈິງ ສາມາດເອົາໄປຈັດຕັ້ງຜັນຂະຫຍາຍໃນແຕ່ລະຂັ້ນ, ພ້ອມກັນຫັນເຂົ້າສູ່ລວງເລິກ ແລະ ລະອຽດກ່ຽວກັບການຜະລິດທີ່ຫຼາກຫຼາຍຮູບແບບ ແລະ ພ້ອມກັນຈັດຕັ້ງຜັນຂະຫຍາຍ ແລະ ປະຕິບັດບົດບັນທຶກການຮ່ວມຮ່ວມມື ໄລຍະປີ 2023-2027 ໃຫ້ສໍາເລັດຕາມຄາດໝາຍທີ່ວາງໄວ້.
