ວັນທີ 28 ມີນາ 2023 ຫ້ອງການຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ໄດ້ຈັດກອງປະຊຸມຈຳລອງການຈັດຕັ້ງປະຕິບັດຮ່າງມາດຕະຖານດຳເນີນງານການຊ່ວຍເຫຼືອດ້ານຂະບວນຍຸດຕິທຳສຳລັບແມ່ຍິງ ແລະ ເດັກ ທີ່ຖືກຄວາມຮຸນແຮງ ຢູ່ ສປປ ລາວ; ພາຍໃຕ້ການເປັນປະທານຮ່ວມໂດຍ: ທ່ານ ນ. ມະນີວອນ ຫຼວງສົມບັດ ຫົວໜ້າຫ້ອງການຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ແລະ ທ່ານ ນ. ສົມມະນີ ສີຫາເທບ ຮັກສາການພະແນກການປົກຄອງອົງການ UNDP ປະຈຳ ສປປ ລາວ; ມີບັນດາພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ. ການຈັດກອງປະຊຸມຄັ້ງນີ້ ເພື່ອທົດລອງການນຳໃຊ້ຮ່າງມາດຕະຖານດຳເນີນງານການຊ່ວຍເຫຼືອດ້ານຂະບວນຍຸຕິທຳສຳລັບແມ່ຍິງ ແລະ ເດັກ ທີ່ຖືກຄວາມຮຸນແຮງ ໃນ ສປປ ລາວ ເພື່ອໃຫ້ແທດເໝາະກັບສະພາບຕົວຈິງ ແລະ ສາມາດນຳໃຊ້ໄດ້ ໂດຍຜ່ານວິທີຈຳລອງບົດບາດ, ຈຳລອງເຫດການ ແລະ ໃຊ້ກໍລະນີສຶກສາ ພ້ອມທັງເກັບຄຳຄິດຄຳເຫັນລະຫວ່າງການຈຳລອງເຫດການ ກ່ຽວກັບການນຳໃຊ້ຮ່າງມາດຕະຖານດັ່ງກ່າວ. ພ້ອມນີ້ຜູ້ເຂົ້າຮ່ວມໄດ້ພ້ອມກັນປຶກສາຫາລືແຕ່ລະເນື້ອໃນຂອງຮ່າງມາດຕະຖານດຳເນີນງານການຊ່ວຍເຫຼືອຢ່າງກົງໄປກົງມາ, ພ້ອມທັງຈັດກິດຈະກຳເພື່ອສະແດງຄວາມຄິດເຫັນຂອງແຕ່ລະກຸ່ມ ແລະ ວາງແຜນງານໃນການເປີດແຜນດຳເນີນງານ ແລະ ການນຳໃຊ້ SOP ໃນຕໍ່ໜ້ານຳຕື່ມອີກ.
