ໃນລະຫວ່າງວັນທີ 06-07 ກຸມພາ 2023 ກົມພັດທະນາແມ່ຍິງລາວ ສູນກາງສະຫະພັນແມ່ຍິງລາວ ຮ່ວມກັບອົງການອົງການ Oxfam ປະຈຳ ສປປລາວ ໄດ້ລົງເຄື່ອນໄຫວຈັດຝຶກອົບຮົມກ່ຽວກັບລະບົບປະຕິບັດການ ຮຽນຮູ້ຕົວຈິງດ້ານບົດບາດຍິງ-ຊາຍ (GALS) ແລະເຜີຍແຜ່ກ່ຽວກັບກຸ່ມທ້ອນເງິນເພື່ອການປ່ຽນແປງໃຫ້ບ້ານເປົ້າຫມາຍທີ່ເມືອງວິລະບູລີ ແຂວງສະຫວັນນະເຂດ, ໂດຍການນຳພາຂອງ ທ່ານ ປອ ນ. ນິນປະເສີດ ໄຊຍະພອນສີ ຫົວໜ້າກົມພັດທະນາແມ່ຍິງລາວ, ມີທ່ານ ນ. ແກ້ວພອນ ເກດຕະວົງ ຮອງປະທານ ສຍ ແຂວງ, ຕາງໜ້າຈາກອົງການ Oxfam ປະຈຳ ສປປລາວ ພ້ອມດ້ວຍທີມງານ.
ຈຸດປະສົງຂອງຊຸດຝຶກອົບຮົມກໍເພື່ອໃຫ້ຄວາມຮູ້ກ່ຽວກັບບົດບາດຍິງ-ຊາຍ, ການສ້າງຄວາມເຂັ້ມ ແຂງໃຫ້ຊຸມຊົນທາງດ້ານເສດຖະກິດ ທັງເປັນການປະກອບສ່ວນຜັນຂະຫຍາຍວຽກງານ 2 ວາລະແຫ່ງຊາດ ໂດຍສະເພາະການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຕື່ມອີກ. ໂອກາດທີ່ໄດ້ລົງເຄື່ອນໄຫວວຽກງານ ທ່ານ ປອ ນ. ນິນປະເສີດ ໄຊຍະພອນສີ ໄດ້ຊຸກຍູ້ວຽກງານການຈັດຕັ້ງປະຕິບັດຄຳຂັວນ ແລະ ຂໍ້ແຂ່ງຂັນ 3 ດີ ຕິດພັນກັບການສ້າງບ້ານພັດທະນາຕາມທິດ 3 ສ້າງ ແລະ ວຽກງານພັດທະນາແມ່ຍິງລາວ ໃຫ້ແກ່ ສຍ ເມືອງວິລະບູລີ. ພ້ອມນີ້ ກໍໄດ້ເຂົ້າພົບ ທ່ານ ບຸນເນືອງ ຈັນຫອມ ຮອງເຈົ້າເມືອງ ເມືອງວິລະບູລີ ເພື່ອລາຍງານການເຄື່ອນໄຫວວຽກງານໃນຄັ້ງນີ້ຕື່ມອີກ.
