ໄດ້ຈັດພິທີປາຖະກະຖາວັນສ້າງຕັ້ງອົງການສະຫະພັນແມ່ຍິງລາວ ຄົບຮອບ 67 ປີ ( 20 ກໍລະກົດ 1955 – 20 ກໍລະກົດ 2022 ) ຢູ່ທີ່ຫ້ອງປະຊຸມເບີ 04 ຫ້ອງວ່າການແຂວງບໍລິຄໍາໄຊ, ໂດຍໃຫ້ກຽດປາຖະກະຖາເລົ່າປະຫວັດມູນເຊື້ອຂອງ ທ່ານ ສາຍຄຳ ວົງຄຳທອງ ຄະນະພັກຮາກຖານ, ຮອງຫົວໜ້າຫ້ອງວ່າການແຂວງ, ມີບັນດາສະມາຊິກແມ່ຍິງພາຍໃນຮາກຖານ, ສະມາຊິກແມ່ຍິງຮາກຖານ, ໜ່ວຍ ເຂົ້າຮ່ວມທັງໝົດ 28 ຄົນ, ຊາຍ 6 ຄົນ.
ໃນພິທີ ທ່ານ ສາຍຄຳ ວົງຄຳທອງ ໄດ້ເຫຼົ່າເຖິງປະຫວັດມູນເຊື້ອການກຳເນີດ, ເຕີບໃຫ່ຍຂະຫຍາຍຕົວ ແລະ ບົດບາດຂອງເອື້ອຍນ້ອງແມ່ຍິງລາວທີ່ມີມູນເຊື້ອຕໍ່ສູ້ອັນພີລະອາດຫານບໍ່ຍອມຈຳນົນເປັນຕົ້ນໄລຍະການປະຕິວັດຊາດ ແມ່ຍິງລາວໄດ້ຄຽງບ່າຄຽງໄຫຼ່ກັບເພດຊາຍ ຕໍ່ສູ້ຢ່າງເດັດດ່ຽວຕ້ານພວກສັກດີນາ ແລະ ພວກລ່າເມືອງຂຶ້ນແບບເກົ່າເພື່ອໃຫ້ລູກ, ຜົວຂອງຕົນໄດ້ຫຼຸດພົ້ນອອກຈາກການຖືກເກນໄປເປັນກຸລີໂດຍບໍ່ໄດ້ຮັບຄ່າຈ້າງ ແລະ ຈາກການທຸບຕີທໍລະມານຢ່າງໂຫດ ຮ້າຍປ່າ ເຖື່ອນຂອງພວກສັດຕູ, ຂະບວນການເຄື່ອນໄຫວຂອງແມ່ຍິງໄດ້ຂະຫຍາຍໄປທຸກແຫ່ງໃນທົ່ວປະເທດພາຍໃຕ້ການນຳພາຂອງພັກແຄວ້ນລາວ, ມາຮອດວັນທີ 20 ກໍລະກົດ 1955 ພັກໄດ້ຈັດຕັ້ງໜ່ວຍຄົ້ນ ຄວ້າວຽກງານແມ່ຍິງຂຶ້ນຢ່າງເປັນທາງການ ໂດຍແມ່ນ ທ່ານ ນາງ ຄຳຫຼ້າ ວົງສັກ ເປັນຫົວໜ້າ, ເຊິ່ງເຮັດໜ້າທີ່ເບິ່ງແຍງລ້ຽງດູ, ປ້ອງກັນຮັກສາກອງທະຫານກູ້ຊາດ ເພື່ອເຄື່ອນໄຫວສືບຂ່າວ ແລະ ສົ່ງຂ່າວໃຫ້ກຳລັງປະຕິວັດ, ປຸກລະດົມຂົນຂວາຍຊາວໝຸ່ມ, ລູກຫຼານອອກຮັບໃຊ້ປະເທດຊາດ,ເພີ່ມພູນຜະລິດຜົນ, ອົງການຈັດຕັ້ງສະຫະພັນແມ່ຍິງລາວນັບແຕ່ມື້ສ້າງຕັ້ງເປັນຕົ້ນມາທີ່ໄດ້ນຳພາເຄື່ອນໄຫວຕາມພາລະບົດບາດ, ສິດໜ້າທີທີ່ໄດ້ກຳນົດໄວ້ໃນກົດລະບຽບນັບມື້ເຕິບໃຫຍ່ຂະຫຍາຍຕົວ, ມາຮອດປັດຈຸບັນດຳເນິນກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII ແມ່ຍິງຈຳນວນຫຼາຍໄດ້ມີບົດບາດເຂົ້າໃນການນຳຂັ້ນຕ່າງໆນັບມື້ນັບຫລາຍຂື້ນ, ພ້ອມທັງຍົກໃຫ້ເຫັນປະຫວັດການເຄື່ອນໄຫວຂອງອົງການຈັດຕັ້ງສະຫະພັນແມ່ຍິງແຂວງບໍລິຄຳໄຊ, ຜ່ານການເຄື່ອໄຫວຕະຫຼອດໄລຍະ 67 ປີ ຜ່ານມາ ອົງການຈັດຕັ້ງສະຫະພັນແມ່ຍິງລາວແຕ່ສູນກາງຮອດທ້ອງຖິ່ນໄດ້ຕັ້ງໜ້າປະຕິບັດ 2 ໜ້າທີ່ຍຸດທະສາດຄື; ປົກປັກຮັກສາ ແລະ ສ້າງສາພັດທະນາປະເທດຊາດ ປະກອບສ່ວນເຂົ້າໃນການປະຕິບັດແຜນພັດທະນາເສດຖະກິດ-ສັງຄົມຂອງລັດແຕ່ລະຂັ້ນ, ໃນຕອນທ້າຍທ່ານຍັງໄດ້ມອບໃບຍ້ອງຍໍໃຫ້ສະມາຊິກຜູ້ທີ່ມີຜົນງານດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນ3ດີຈຳນວນ14ໃບ
