ພ້ອມນີ້ໃນວັນທີ 29 ພຶດສະພາ 2023, ສູນກາງສະຫະພັນແມ່ຍິງລາວ ຮ່ວມກັບ ກົມຕຳຫຼວດຈະລາຈອນ ກະຊວງປ້ອງກັນຄວາມສະຫງົບ ຈັດການໂຄສະນາເຜີຍແຜ່ກົດລະບຽບການສັນຈອນ ແລະ ຄວາມປອດໄພທາງຖະໜົນ; ກ່າວເປີດພິທີໂດຍ ທ່ານ ນາງ ທຳມາ ເພັດວິໄຊ ຮອງປະທານຄະນະບໍລິຫານງານ ສສຍລ; ມີທ່ານຮອງປະທານຄະນະບໍລິຫານງານ ສສຍລ, ທ່ານ ພັອ ຄຳເຫຼັກ ໄຊຍະສິດ ຮອງຫົວໜ້າກົມຕຳຫຼວດຈະລາຈອນ, ຄະນະຫ້ອງການ, ກົມ, ສູນ, ຫ້ອງການ ຄຊກມດ, ສະຖາບັນການເງິນຈຸລະພາກທີ່ຮັບເງິນຝາກເພື່ອພັດທະນາແມ່ຍິງ ແລະ ຄອບຄົວ, ຄະນະຈາກພະແນກໂຄສະນາ ກົມຕຳຫຼວດຈະລາຈອນ ກົມໃຫຍ່ຕຳຫຼວດກະຊວງປ້ອງກັນຄວາມສະຫງົບ ແລະ ພະນັກງານ-ລັດຖະກອນ ສສຍລ ເຂົ້າຮ່ວມ.
ການລົງໂຄສະນາເຜີຍແຜ່ກົດລະບຽບຈະລາຈອນຄັ້ງນີ້ ເປັນການປູກຈິດສຳນຶກໃຫ້ຜູ້ເຂົ້າຮ່ວມ ກໍຄືຜູ້ຂັບຂີ່ໄດ້ຮັບຮູ້ ແລະ ເຂົ້າໃຈແຈ້ງກ່ຽວກັບພື້ນຖານກົດລະບຽບຈະລາຈອນ, ເຕັກນິກ, ວິທີການຂັບຂີ່ທີ່ຖືກຕ້ອງ, ການປະຕິບັດກົດໝາຍຈະລາຈອນທາງບົກຢ່າງເຂັ້ມງວດ, ມີລະບຽບວິໃນ, ການໃຫ້ກຽດເຊິ່ງກັນ ແລະ ກັນ ເປັນການປ້ອງກັນອຸປະຕິເຫດທີ່ຈະເກີດຂື້ນ; ທັງໝົດນີ້ ກໍ່ເພື່ອຫຼຸດຜ່ອນອຸປະຕິເຫດຕາມທ້ອງທະໜົນຫຼວງໃຫ້ນັບມື້ນັບຫຼຸດໜ້ອຍຖອຍລົງເທື່ອລະກ້າວ ແລະ ເພື່ອເປັນການຄຸ້ມຄອງຮັກສາຄວາມເປັນລະບຽບຮຽບຮ້ອຍ, ຄວາມປອດໄພໃນການສັນຈອນຕາມເສັ້ນທາງຫຼວງ, ທັງເປັນການຊ່ວຍໃຫ້ຜູ້ຂັບຂີ່ຍານພາຫານະເດີນທາງຖືກຕ້ອງຕາມລະບຽບຈະລາຈອນ. ໂອກາດດຽວກັນນີ້ຜູ້ເຂົ້າຮ່ວມໄດ້ມີການສົນທະນາແລກປ່ຽນບົດຮຽນກັບທີມງານເພື່ອສ້າງຄວາມຈະແຈ້ງ ແລະ ຄວາມເຂົ້າໃຈຫຼາຍຂຶ້ນຕື່ມອີກ.
