ວັນທີ 2 ພຶດສະພາ 2024 ທ່ານ ນາງ ອາລີ ວົງໜໍ່ບຸນທຳ ກຳມະການສູນກາງພັກ ເລຂາຄະນະພັກ ປະທານຄະນະບໍລິຫານງານ ສສຍລ ພ້ອມດ້ວຍຄະນະ ໄດ້ລົງເຄື່ອນໄຫວຊຸກຍູ້ການກະກຽມກອງປະຊຸມໃຫຍ່ 03 ຂັ້ນ ຂອງສະຫະພັນແມ່ຍິງສະຖາບັນວິທະຍາສາດເສດຖະກິດ-ສັງຄົມແຫ່ງຊາດ. ໂອກາດນີ້ໄດ້ເຂົ້າພົບ ທ່ານ ປອ ສອນທະນູ ທຳມະວົງ ກຳມະການສູນກາງພັກ ເລຂາຄະນະພັກ ຫົວໜ້າສະຖາບັນວິທະຍາສາດເສດຖະກິດ-ສັງຄົມແຫ່ງຊາດ ເພື່ອລາຍງານຈຸດປະສົງໃນການລົງເຄື່ອນໄຫວວຽກງານຄັ້ງນີ້ ໂດຍສະເພາະເພື່ອຕິດຕາມ, ຊຸກຍູ້ວຽກງານການສ້າງພະນັກງານນໍາພາ-ຄຸ້ມຄອງເພດຍິງ ແລະ ການກະກຽມກອງປະຊຸມໃຫຍ່ສະຫະພັນແມ່ຍິງລາວ ຕິດພັນກັບການກະກຽມດຳເນີນກອງປະຊຸມໃຫຍ່ 03 ຂັ້ນ ຂອງພັກ ໃຫ້ບັນລຸຕາມແຜນທີ່ວາງໄວ້; ພ້ອມດຽວກັນນີ້ ກໍໄດ້ເຮັດວຽກຮ່ວມກັບ ທ່ານ ປອ ກິແກ້ວ ຈັນທະບູຣີ ຮອງເລຂາຄະນະພັກ ຮອງຫົວໜ້າສະຖາບັນວິທະຍາສາດເສດຖະກິດ-ສັງຄົມແຫ່ງຊາດ ຜູ້ຊີ້ນຳວຽກພັກ-ພະນັກງານ ເຊິ່ງໄດ້ປຶກສາຫາລື ແລະ ແລກປ່ຽນບົດຮຽນຕໍ່ກັບວຽກງານແຜນກຳນົດພະນັກງານນຳພາ-ຄຸ້ມຄອງເພດຍິງ ເຊິ່ງໃນໄລຍະຜ່ານມາເອື້ອຍນ້ອງແມ່ຍິງໄດ້ບັນຈຸສັບຊ້ອນເຂົ້າໃນຕໍາແໜ່ງນໍາພາ-ຄຸ້ມຄອງຕາມຄວາມເໝາະສົມ ຊຶ່ງຄະນະພັກຄະນະນຳ ໄດ້ເອົາໃຈໃສ່ຊຸກຍູ້ສົ່ງເສີມເອື້ອຍນ້ອງແມ່ຍິງພາຍໃນສະຖາບັນ, ເອື້ອຍນ້ອງແມ່ຍິງໄດ້ເອົາໃຈໃສ່ບຸກບືນ, ສູ້ຊົນພັດທະນາຕົນເອງຢ່າງຮອບດ້ານໃຫ້ມີຄວາມຮູ້ຄວາມສາມາດຄຽງຄູ່ກັບເພດຊາຍ ແລະ ສາມາດບັນຈຸເຂົ້າໃນຕຳແໜ່ງນຳພາຕັດສິນບັນຫານັບມື້ມີຈຳນວນເພີ່ມຂຶ້ນ.
ຫຼັງຈາກນັ້ນ, ທ່ານປະທານ ສສຍລ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມຕິດຕາມ, ຊຸກຍູ້ວຽກງານການສ້າງພະນັກງານນຳພາ-ຄຸ້ມຄອງເພດຍິງ ແລະ ຮັບຟັງການກະກຽມດຳເນີນກອງປະຊຸມໃຫຍ່ສະຫະພັນແມ່ຍິງ ສະຖາບັນ ແລະວຽກງານຮອບດ້ານ ຈາກ ຟທ່ານ ນາງ ລັດດາວັນ ຊົງວິໄລ ຮັກສາການປະທານສະຫະພັນແມ່ຍິງສະຖາບັນວິທະຍາສາດເສດຖະກິດ-ສັງຄົມແຫ່ງຊາດ ພ້ອມທັງແລກປ່ຽນບົດຮຽນເຊິ່ງກັນ ແລະ ກັນຢ່າງກົງໄປກົງມາ ເພື່ອພ້ອມກັນຈັດຕັ້ງປະຕິບັດວຽກງານໃຫ້ບັນລຸຕາມຄາດໝາຍທີ່ວາງໄວ້.
