ສູນກາງສະຫະພັນແມ່ຍິງລາວ ຈັດຊຸດອົບຮົມຄວາມຮູ້ກ່ຽວກັບຜົນສະທ້ອນຂອງ ການແຕ່ງງານກ່ອນໄວ

ວັນທີ 08 ພະຈິກ 2023 ສູນກາງສະຫະພັນແມ່ຍິງລາວ ຈັດຊຸດອົບຮົມຄວາມຮູ້ກ່ຽວກັບຜົນສະທ້ອນຂອງ ການແຕ່ງງານກ່ອນໄວ, ບົດບາດຍິງ-ຊາຍ, ສຸຂະພາບຈະເລີນພັນ ແລະ ການຕ້ານການໃຊ້ຄວາມຮຸນແຮງບົນພື້ນຖານທາງເພດ, ໂດຍນໍາໃຊ້ຄູ່ມືການສ້າງຄອບຄົວ ແລະ ບ້ານແມ່ຍິງ 3 ດີ ຕິດພັນກັບການສ້າງບ້ານພັດທະນາຕາມທິດ 3 ສ້າງ.ໃຫ້ກຽດເປີດພິທີໂດຍ ທ່ານ ນ. ອາລີ ວົງໜໍ່ບຸນທຳ ກຳມະການສູນກາງພັກ ປະທານຄະນະບໍລິຫານງານ ສສຍລ; ມີສະຫະພັນແມ່ຍິງນະຄອນຫຼວງ, ສະຫະພັນແມ່ຍິງເມືອງ 9 ເມືອງ, ຫ້ອງການສາທາລະນະສຸກ, ຫ້ອງການກະສິກຳ ແລະ ປ່າໄມ້ເມືອງ 9 ເມືອງ, ສູນຮັກສາສຸຂະພາບແມ່ ແລະ ເດັກ ເຂົ້າຮ່ວມ. ການຈັດອົບຮົມຄັ້ງນີ້ເພື່ອສ້າງຄວາມຮັບຮູ້ແລະເຂົ້າໃຈກ່ຽວກັບວຽກງານຄວາມສະເໝີພາບບົດບາດຍິງ-ຊາຍ; ເວົ້າລວມເວົ້າສະເພາະການວາງແຜນຄອບຄົວ, ການຕັດສິນໃຈຮ່ວມກັບຜົວໃນການກຳນົດການຖືພາ-ເກີດລູກ, ເຮັດໃຫ້ແມ່ຍິງໃນໄວໜຸ່ມຮັບຮູ້ວ່າ ແມ່ຍິງທີ່ອາຍຸຍັງໜ້ອຍບໍ່ຄວນຮີບຮ້ອນແຕ່ງງານ ເຊິ່ງຈະມີຜົນກະທົບຕໍ່ສຸຂະພາບຂອງເຂົາເຈົ້າ ແລະ ເດັກທີ່ຈະເກີດມາເພື່ອບໍ່ໃຫ້ເກີດມີປະກົດການຫຍໍ້ທໍ້ໃນສັງຄົມ, ພ້ອມນີ້ເພື່ອເຮັດໃຫ້ວຽກງານນີ້ບັນລຸເປົ້າໝາຍ ຈຶ່ງຫັນເອົາວຽກງານພັດທະນາແມ່ຍິງໄປສູ່ຮາກຖານຊຸມຊົນ ໃຫ້ທົ່ວເຖິງ ດ້ວຍການສ້າງຄອບຄົວ ແລະ ບ້ານແມ່ຍິງ 3 ດີ ຕິດພັນກັບການສ້າງບ້ານພັດທະນາຕາມທິດ 3 ສ້າງ ຕິດພັນກັບການແກ້ໄຂຄວາມທຸກຍາກ, ຖືເອົາການປະຕິບັດຄຳຂວັນ ແລະ ຂໍ້ແຂ່ງຂັນ 3 ດີ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ ເປັນຂໍກຸນແຈໃນການພັດທະນາຊີວິດການເປັນຢູ່ຂອງເອື້ອຍນ້ອງແມ່ຍິງໃຫ້ດີຂື້ນ. ຊຸດອົບຮົມດັ່ງກ່າວດຳເນີນເປັນເວລາ 3 ວັນ ທີ່ຫ້ອງປະຊຸມຫ້ອງວ່າການປົກຄອງນະຄອນຫຼວງວຽງຈັນ.