ສູນກາງສະຫະພັນແມ່ຍິງລາວ ຈັດກອງປະຊຸມເຊື່ອມຊຶມມະຕິຕົກລົງຂອງຄະນະເລຂາທິການສູນກາງພັກ

ວັນທີ 11 ກໍລະກົດ 2022 ສູນກາງສະຫະພັນແມ່ຍິງລາວ ຈັດກອງປະຊຸມເຊື່ອມຊຶມມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງສູນກາງສະຫະພັນແມ່ຍິງລາວ. ໂດຍການເປັນປະທານຂອງທ່ານ ນ. ອິນລາວັນ ແກ້ວບຸນພັນ ກຳມະການສູນກາງພັກ ປະທານຄະນະບໍລິຫານງານ ສສຍລ, ມີຄະນະບໍລິຫານງານພັກ​ ຮອງ​ປະທານຄະນະບໍລິຫານງານ ສສຍລ, ເລຂາ, ຮອງເລຂາໜ່ວຍພັກ ພ້ອມດ້ວຍສະມາຊິກພັກ ເຂົ້າຮ່ວມ. ກອງປະຊຸມທ່ານ ນ. ເຫຼັກ ແສນຄຳວົງສາ ຫົວໜ້າກົມຈັດຕັ້ງ-ພະນັກງານ ໄດ້ຜ່ານຮ່າງບົດສະຫຼຸບການຊີ້ນຳ-ນຳພາ ການເຄື່ອນໄຫວວຽກງານຮອບດ້ານຂອງຄະນະພັກ ສສຍລ ປະຈຳໄຕມາດ II ແລະ ແຜນການ ປະຈຳໄຕມາດ III ປີ 2022, ຜ່ານຂໍ້ຕົກລົງວ່າດ້ວຍການແຕ່ງຕັ້ງຮອງຫົວໜ້າກົມ ແລະ ຜ່ານຂໍ້ຕົກລົງວ່າດ້ວຍການອະນຸມັດໃຫ້ພະນັກງານພັກອອກການ-ຮັບເງິນອຸດໜຸນບຳນານ.​ ພ້ອມນີ້ທ່ານ ນ. ທຳມາ ເພັດວິໄຊ ຮອງປະທານຄະນະບໍລິຫານງານ ສສຍລ ໄດ້ຜ່ານມະຕິຕົກລົງຂອງຄະນະເລຂາທິການສນກາງພັກ ສະບັບເລກທີ 125/ຄລສພ, ລົງວັນທີ 20 ມີຖຸນາ 2022 ວ່າດ້ວຍການປັບປຸງກົງຈັກການຈັດຕັ້ງ ຂອງສູນກາງສະຫະພັນແມ່ຍິງລາວ ແລະ ມະຕິຕົກລົງ ສະບັບເລກທີ 126 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ສສຍລ. ຫຼັງ​ຈາກນັ້ນ​ ເນື່ອງໃນໂອກາດປີສາມັກຄີໄຊມິດຕະພາບລາວ-ຫວຽດນາມ ປີ 2022 ກໍໄດ້ມີພິທີປະດັບຫຼຽນຂອງລັດຖະບານຫວຽດນາມໃຫ້ແກ່ກົມກອງລວມໝູ່ແລະ​ ບຸກຄົນທີ່ມີຜົນງານດີເດັ່ນໃຫ້ແກ່ສູນກາງສະຫະພັນແມ່ຍິງລາວ ແລະ ໃນຕອນທ້າຍກອງປະຊຸມຜູ້ເຂົ້ຮ່ວມໄດ້ຮັບຟັງການໂອ້ລົມຈາກທ່ານ ປະທານຄະນະບໍລິຫານງານ ສສຍລ ເພື່ອເປັນທິດໃນການຈັດຕັ້ງປະຕິບັດວຽກງານໃນຕໍ່ໜ້າຢ່າງມີຜົນສຳເລັດ.