ວັນທີ 13 ມິຖຸນາ 2022, ສຸນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ ສູນກາງສະຫະພັນແມ່ຍິງລາວ ຈັດຝຶກອົບຮົມການກຳນົດຕົວ ແລະ ນຳໃຊ້ຄູ່ມືການປົກປ້ອງຊ່ວຍເຫຼືອ ແລະ ການສົ່ງຕົວຜູ້ຖືກເຄາະຮ້າຍຈາກການຄ້າມະນຸດ ໃຫ້ແກ່ສະຫະພັນແມ່ຍິງແຂວງຈຸດພາກເໜືອ ທີ່ຫ້ອງປະຊຸມສະຫະພັນແມ່ຍິງແຂວງຫຼວງພະບາງ, ພາຍໃຕ້ການເປັນປະທານຂອງທ່ານ ນາງ ອິນລາວັນ ແກ້ວບຸນພັນ ປະທານຄະນະບໍລິຫານງານສູນກາງສະຫະພັນແມ່ຍິງລາວ, ມີບັນດາປະທານ, ຮອງປະທານ ຜູ້ຊີ້ນຳຂະແໜງໃຫ້ຄຳປຶກສາ, ປົກປ້ອງແມ່ຍິງ ແລະ ເດັກນ້ອຍ, ພ້ອມດ້ວຍພະນັກງານວິຊາການ ຈາກສະຫະພັນແມ່ຍິງ 9 ແຂວງ (ແຂວງຫຼວງພະບາງ, ວຽງຈັນ, ຊຽງຂວາງ, ຫົວພັນ, ໄຊຍະບູລີ, ຫຼວງນໍ້າທາ, ອຸດົມໄຊ, ຜົ້ງສາລີ ແລະ ບໍ່ແກ້ວ) ແລະ ຄະນະທີມງານຄູຝຶກບັນດາກົມທີ່ກ່ຽວຂ້ອງຈາກສູນກາງສະຫະພັນແມ່ຍິງລາວເຂົ້າຮ່ວມ. ຈຸດປະສົງເພື່ອເຮັດໃຫ້ພະນັກງານສະຫະພັນແມ່ຍິງບັນດາແຂວງທີ່ເຂົ້າຮ່ວມ ມີຄວາມຮັບຮູ້ ແລະ ເຂົ້າໃຈຕໍ່ການກໍານົດຕົວຜູ້ຖືກເຄາະຮ້າຍຈາກການຄ້າມະນຸດເບື້ອງຕົ້ນ ລວມທັງການປົກປ້ອງ, ຊ່ວຍເຫຼືອ ແລະ ການສົ່ງຕໍ່ຜູ້ຖືກເຄາະຮ້າຍຈາກການຄ້າມະນຸດໃຫ້ເປັນລະບົບ ແລະ ມີປະສິດທິຜົນ. ໂອກາດນີ້ ຫົວໜ້າຫ້ອງການ ສສຍລ ແລະ ຮອງຫົວໜ້າຫ້ອງການກອງເລຂາ ຄຊກມດ ໄດ້ຂຶ້ນນໍາສະເໜີວຽກງານພັດທະນາແມ່ຍິງ ແລະ ການຈັດຕັ້ງປະຕິບັດແຜນວຽກຈຸດສຸມວາລະແຫ່ງຊາດ 2021-2023 ຂອງສະຫະພັນແມ່ຍິງລາວ. ພ້ອມນີ້ ທາງ ສສຍລ ຍັງໄດ້ມອບເຄື່ອງແທກອຸນຫະພູມ ແລະ ວີປະມວນກົດໝາຍໃຫ້ ສຍ ບັນດາແຂວງຕື່ມອີກ. ຊຸດຝຶກອົບຮົມຄັ້ງນີ້ດໍາເນີນເປັນເວລາ 02 ວັນ (ວັນທີ 13-14 ມິຖຸນາ 2022).
