ວັນທີ 12 ກໍລະກົດ 2022, ສະຫະພັນແມ່ຍິງຫ້ອງວ່າການສໍານັກງານນາຍົກລັດຖະມົນຕີ ຈັດກອງປະຊຸມສະຫຼຸບການເຄື່ອນໄຫວວຽກງານ ແລະ ການຈັດຕັ້ງປະຕິບັດຂໍ້ແຂ່ງຂັນ 3 ດີ ປະຈໍາປີ 2021 ແລະ ສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 67 ປີ, ໂດຍການເປັນປະທານຮ່ວມຂອງ ທ່ານ ອາລຸນໄຊ ສູນນະລາດ ລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ແລະ ທ່ານ ນາງ ສິລິກິດ ບຸບຜາ ຮອງປະທານຄະນະບໍລິຫານງານ ສສຍລ; ມີຄະນະພັກ-ຄະນະນໍາ, ພັນລະຍາການນໍາ, ຄະນະສະຫະພັນແມ່ຍິງ ຫສນຍ, ພະນັກງານອາວຸໂສບໍານານ, ແຂກຖືກເຊີນ ແລະ ສະມາຊິກແມ່ຍິງເຂົ້າຮ່ວມ. ຜູ້ເຂົ້າຮ່ວມໄດ້ຮັບຟັງການຫວນຄືນປະຫວັດມູນເຊື້ອວັນສ້າງຕັ້ງສະຫະພັນແມ່ຍິງລາວ, ບົດສະຫຼຸບການເຄື່ອນໄຫວວຽກງານປະຈໍາປີ 2021 ແລະ ທິດທາງແຜນການປະຈໍາປີ 2022, ບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 3 ດີ ປະຈໍາປີ 2021 ພ້ອມທັງຈັດພິທີມອບ-ຮັບທຸງໄຊ 3 ດີ, ມອບໃບຍ້ອງຍໍໃຫ້ກົມກອງ ບຸກຄົນ ແລະ ຕາງໜ້າໜ່ວຍແມ່ຍິງແຕ່ລະໜ່ວຍຂຶ້ນຈັບມືເປີດຂະບວນແຂ່ງຂັນ 3 ດີປີ 2022 ແລະ ໄດ້ຮັບຟັງການໂອ້ລົມຈາກທ່ານລັດຖະມົນຕີ, ຫົວໜ້າ ຫສນຍ ຕື່ມອີກ.
