ສະຫະພັນແມ່ຍິງກະຊວງອຸດສາຫະກຳ ແລະ ການຄ້າ ຈັດພິທີສະເຫຼີມສະຫຼອງ ວັນສ້າງຕັ້ງສະຫະພັນແມ່ຍິງເປັນລາວ

Jul 18, 2023 | ຂ່າວສານ ແລະ ກິດຈະກຳ

ວັນທີ 17 ກໍລະກົດ 2023 ສະຫະພັນແມ່ຍິງກະຊວງອຸດສາຫະກຳ ແລະ ການຄ້າ ຈັດພິທີສະເຫຼີມສະຫຼອງ ວັນສ້າງຕັ້ງສະຫະພັນແມ່ຍິງເປັນລາວ ຄົບຮອບ 68 ປີ ( 20 ກໍລະກົດ 1955-20 ກໍລະກົດ 2023) ພາຍໃຕ້ຫົວຂໍ້: ຄວາມສຳເລັດ ແລະ ການປະກອບສ່ວນຂອງນັກທຸລະກິດຍິງໃນຊ່ວງການລະບາດ ໂຄວິດ-19. ໂດຍການເປັນປະທານຮ່ວມຂອງທ່ານນ. ຈັນສຸກ ແສງພະຈັນ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ນ. ສົມໝາຍ ພົມມຸນິວົງ ປະທານຄະນະບໍລິຫານງານສະຫະພັນແມ່ຍິງກະຊວງອຸດສາຫະກຳ ແລະ ການຄ້າ, ທ່ານ ນ. ສິລິຄູນ ພູມລາວັນ ຮອງປະທານສະມາຄົມນັກທຸລະກິດຍິງ, ທ່ານ ອາເລັກແຊນເດີ້ ຄີມເມີ ຜູ້ຕາງໜ້າຈາກທະນາຄານໂລກ ປະຈຳ ສປປ ລາວ; ມີບັນດາແຂກຖືກເຊີນຈາກຄູ່ຮ່ວມພັດທະນາ, ສະມາຄົມນັກທຸລະກິດຍິງ, ອາຈານ, ນັກຮຽນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.
ການຈັດພິທີຄັ້ງນີ້ເພື່ອສ້າງຄວາມເຂົ້າໃຈກ່ຽວກັບຄວາມສະເໝີພາບລະຫວ່າງຍິງ-ຊາຍ, ການສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ການສົ່ງເສີມສະພາບແວດລ້ອມທີ່ເອື້ອອຳນວຍໃຫ້ແກ່ແມ່ຍິງໃນພາກທຸລະກິດ, ພ້ອມດຽວກັນນີ້ຜູ້ເຂົ້າຮ່ວມໄດ້ຮັບຟັງໃນຫຼາຍຫົວຂໍ້ເພື່ອເປັນເວທີປຶກສາຫາລື,ສ້າງແຮງບັນດານໃຈ ແລະ ສ້າງເຄືອຄ່າຍ, ພ້ອມທັງແລກປ່ຽນບົດຮຽນເຊິ່ງກັນແລະກັນ. ໂອກາດນີ້ທ່ານຮອງລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຍົກໃຫ້ເຫັນພາບລວມ ແລະ ສິ່ງກີດຂວາງຂອງແມ່ຍິງໃນ ສປປ ລາວ ແລະ ໃນພາກພື້ນ ແລະ ສິ່ງທີ່ຄວນເຮັດເພື່ອສົ່ງເສີມການສ້າງຄວາມເຂັ້ມແຂງດ້ານເສດຖະກິດໃນ ສປປ ລາວ.
ພິທີໃນຄັ້ງນີ້ໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ (LCT) ທີ່ຖືກຈັດຕັ້ງປະຕິບັດໂດຍກະຊວງ ອຸດສາຫະກໍາ ແລະ ການຄ້າ ໂດຍໄດ້ຮັບການສະໜັບສະໜູນດ້ານວິຊາການ ແລະ ການເງິນຈາກທະນາຄານໂລກ ແລະ ສົມທົບທຶນເພີ່ມເຕີມຈາກປະເທດອົດສະຕາລີ, ໄອແລນ ແລະ ສະຫະລັດອາເມລິກາ.