ຕອນເຊົ້າວັນທີ 31 ມີນາ 2023, ສະຫະພັນແມ່ຍິງກະຊວງການຕ່າງປະເທດ ຈັດພິທີປາຖະກະຖາ ເນື່ອງໃນໂອກາດສະເຫຼີມສະຫຼອງວັນແມ່ຍິງສາກົນ ຄົບຮອບ 113 ປີ (ວັນທີ 8 ມີນາ 1910 – 8 ມີນາ 2023) ໃຫ້ກຽດເປັນປະທານໂດຍ: ທ່ານ ນາງ ອິນລາວັນ ແກ້ວບຸນພັນ, ກຳມະ ການສູນກາງພັກ, ປະທານ ຄະນະບໍລິຫານງານສູນກາງສະຫະພັນແມ່ຍິງລາວ (ສສຍລ); ເຂົ້າຮ່ວມມີ ທ່ານ ທອງຜ່ານ ສະຫວັນເພັດ, ຄະນະປະຈໍາພັກກະຊວງ, ຜູ້ຊີ້ນໍາ ອົງການຈັດຕັ້ງມະຫາຊົນ, ຮອງລັດຖະມົນຕີກະຊວງການຕ່າງປະເທດ, ມີຄະນະບໍລິຫານງານສະຫະພັນແມ່ຍິງ ກະຊວງການຕ່າງປະເທດ, ຕາງໜ້າ 3 ອົງການຈັດຕັ້ງມະຫາຊົນ, ບັນດາຄະນະກົມ, ພັນລະຍາການນໍາກະຊວງ, ພ້ອມດ້ວຍສະມາຊິກ ສະຫະພັນແມ່ຍິງກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ນາງ ໄກມະນີ ອໍລະບູນ ປະທານສະຫະພັນແມ່ຍິງກະຊວງການຕ່າງປະເທດ ໄດ້ຜ່ານບົດສະຫຼຸບການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການເຄື່ອນໄຫວ ປະຈໍາປີ 2023 ຂອງສະຫະພັນແມ່ຍິງກະຊວງ ການຕ່າງປະເທດ, ໂດຍໄດ້ຍົກໃຫ້ເຫັນເຖິງຜົນສໍາເລັດອັນພົ້ນເດັ່ນໃນການປະຕິບັດວຽກງານໃນດ້ານຕ່າງໆ ໃນໄລຍະ 1 ປີ ຜ່ານມາ, ເຊິ່ງ ເອື້ອຍນ້ອງແມ່ຍິງ ໄດ້ເຄື່ອນໄຫວວຽກງານຂອງສະຫະ ພັນແມ່ຍິງ ໄປຄຽງຄູ່ກັບການເຄື່ອນໄຫວວຽກງານດ້ານ ວິຊາສະເພາະ ທັງເຄື່່ອນໄຫວຕາມແຜນການປະຈຳປີ ແລະ ນອກແຜນການ ຢ່າງມີປະສິດທິພາບ ແລະ ມີຜົນສໍາເລັດ, ເຊິ່ງສະແດງອອກໃນການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສູນກາງສະຫະພັນແມ່ຍິງລາວ, ຜ່ານການຈັດຕັ້ງປະຕິບັດ ໃນປີ 2022 ສາມາດຄັດເລືອກໄດ້ ໜ່ວຍ/ຈຸ 3 ດີ ປະເພດ I, ຈຳນວນ 51 ໜ່ວຍ/ຈຸ (ຢູ່ພາຍໃນ 17 ໜ່ວຍ ແລະ ຕ່າງປະເທດ 34 ໜ່ວຍ/ຈຸ) ແລະ ມີບຸກຄົນ 3 ດີ ປະເພດ I, 334 ສະຫາຍ (247 ສະຫາຍຢູ່ພາຍໃນ ປະເທດ ແລະ 87 ສະຫາຍຢູ່ຕ່າງປະເທດ).
ໃນໂອກາດທີ່ມີຄວາມໝາຍສໍາຄັນນີ້, ທ່ານປະທານ ຄະນະບໍລິຫານງານ ສສຍລ ໄດ້ຫວນຄືນມູນເຊື້ອປະຫວັດຄວາມເປັນມາຂອງວັນແມ່ຍິງສາກົນ, ພ້ອມທັງໄດ້ຍົກໃຫ້ເຫັນບົດບາດຄວາມສໍາຄັນຂອງແມ່ຍິງ ໃນຂົງເຂດວຽກງານຕ່າງໆໃນທົ່ວໂລກ ກໍຄືແມ່ຍິງລາວໃນຂອບເຂດທົ່ວປະເທດ ເພື່ອສືບຕໍ່ປົກປ້ອງສິດຜົນປະໂຫຍດອັນຊອບທໍາຂອງແມ່ຍິງ, ສົ່ງເສີມຄວາມກ້າວໜ້າຂອງແມ່ຍິງ ແລະ ຮັບປະກັນການປະຕິບັດຄວາມສະເໜີພາບຍິງ-ຊາຍ ທາງດ້ານການເມືອງ, ເສດຖະກິດ ແລະ ຊີວິດການເປັນ ຢູ່ໃນສັງຄົມ ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ. ພ້ອມດຽວກັນນີ້, ທ່ານປະທານຄະນະບໍລິຫານງານ ສສຍລ ໄດ້ມີຄຳເຫັນໂອ້ລົມ ແລະ ໃຫ້ທິດຊີ້ນຳແກ່ເອື້ອຍນ້ອງແມ່ຍິງ ເຊິ່ງທ່ານໄດ້ເນັ້ນບາງຈຸດ ໂດຍສະເພາະສືບຕໍ່ສຶກສາອົບຮົມທາງດ້ານແນວຄິດການເມືອງ, ການຮັກສາຄວາມສາມັກຄີພາຍໃນ, ຄວາມບຸກໜ້າບືນຕົວ ແລະ ພັດທະນາຕົນເອງເລື້ອຍໆ ໄປຄຽງບ່າຄຽງໄຫລ່ກັບເພດຊາຍ ເພື່ອສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງຂຶ້ນໄປເລື້ອຍໆ.
