ທ້າຍເດືອນ ມິຖຸນາ 2022 ສູນກາງສະຫະພັນແມ່ຍິງລາວ (ສສຍລ) ຈັດພິທີປາຖະກະຖາວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມຄົບຮອບ 45 ປີ ເພື່ອຫວນຄືນປະຫວັດມູນເຊື້ອ, ຄວາມໝາຍຄວາມສໍາຄັນ ແລະຜົນງານການເຄື່ອໄຫວທີ່ພົ້ນເດັ່ນຂອງສອງຊາດລາວ-ຫວຽດນາມໃນໄລຍະຜ່ານມາ ໂດຍການເປັນປະທານ ແລະ ປາຖະກະຖາຂອງ ທ່ານ ນ. ລາວັນ ສຸດທິສານ ຮອງປະທານຄະນະບໍລິຫານງານ ສສຍລ, ມີທ່ານຮອງປະທານ ສສຍລ, ຄະນະຫ້ອງການ, ກົມ, ສູນ, ຫ້ອງການກອງເລຂາ ຄຊກມດ, ລັດວິສາຫະກິດຝ້າຍລາວ ແລະ ພະນັກງານ-ລັດຖະກອນທົ່ວ ສສຍລ ເຂົ້າຮ່ວມຢ່າງພ້ອມພຽງ.
ທ່ານ ນ. ລາວັນ ສຸດທິສານ ເລົ່າຫວນຄືນປະຫວັດມູນເຊື້ອຄວາມເປັນມາ, ຄວາມໝາຍ, ຄວາມສໍາຄັນ ແລະ ການເຕີບໃຫຍ່ຂະຫຍາຍຕົວຂອງສອງຊາດລາວ-ຫວຽດນາມ ບາງຕອນສຳຄັນວ່າ: ຍາມໃດປະຊາຊົນ 2 ຊາດ ກໍມີມູນເຊື້ອສາມັກຄີ ຊ່ວຍເຫຼືອເຊິ່ງກັນ ແລະ ກັນມາແຕ່ດົນນານ ໃນການກໍ່ຕັ້ງ ແລະ ປົກປັກຮັກສາພັດທະນາປະເທດຊາດ, ໂດຍສະເພາະໃນໄລຍະການດຳເນີນການຕໍ່ສູ້ປະຕິວັດ ພາຍໃຕ້ການນຳພາຂອງພັກກອມມູນິດອິນດູຈີນ, ຕະຫຼອດເຖິງການນຳພາຂອງພັກປະຊາຊົນປະຕິວັດລາວ ແລະ ພັກກອມມູນິດຫວຽດນາມ. ຄວາມຜູກພັນ, ສາມັກຄີ ແລະ ຊ່ວຍເຫຼືອເຊິ່ງກັນ ແລະ ກັນ ທີ່ເປັນມູນເຊື້ອອັນດີງາມມາແຕ່ດົນນານ, ໄດ້ເພີ່ມທະວີຄວາມແໜ້ນແຟ້ນ ແລະ ເຕີບໃຫຍ່ ກາຍເປັນຄວາມສຳພັນພິເສດ ແລະ ການພົວພັນຮ່ວມມືຮອບດ້ານຂອງສອງຊາດ ລາວ-ຫວຽດນາມ ໂດຍແມ່ນ ປະທານ ໂຮ່ຈີມິນ, ປະທານ ໄກສອນ ພົມວິຫານ ແລະ ປະທານສຸພານຸວົງ ເປັນຜູ້ລິເລີ່ມ. ຈາກນັ້ນ ການນຳຂອງສອງພັກ, ສອງລັດ ແລະ ປະຊາຊົນສອງປະເທດກໍໄດ້ເອົາໃຈໃສ່ປັບປຸງເສີມຂະຫຍາຍ ໃຫ້ກາຍເປັນການພົວພັນສາມັກຄີອັນບໍລິສຸດຜຸດຜ່ອງ ທີ່ຫາຍາກໃນການພົວພັນສາກົນ ແລະ ກາຍເປັນມໍລະດົກອັນລໍ້າຄ່າຂອງສອງຊາດ ລາວ-ຫວຽດນາມ ໃຫ້ລູກຫຼານໄດ້ສືບຕໍ່ພົວພັນຮ່ວມມືກັນໃນອະນາຄົດ.
ນອກຈາກນີ້, ຜູ້ເຂົ້າຮ່ວມຍັງໄດ້ຮັບຟັງການເລົ່າຫວນຄືນວັນເກີດ ທ່ານແອຣ ເນສໂຕ ເຈເກວາຣາ ຄົບຮອບ 94 ປີ ຊຶ່ງທ່ານເປັນນັກກໍ່ສ້າງສັງຄົມນິຍົມ ທີ່ສະຫຼາດຫຼັກແຫຼມ ແລະ ທ່ານໄດ້ໃຫ້ຄວາມສຳຄັນຕໍ່ກຳມະກອນໃນລະບົບສັງຄົມນິຍົມ ວ່າພື້ນຖານຂອງການປະຕິວັດສັງຄົມນິຍົມ ແມ່ນຊົນຊັ້ນກຳມະກອນ, ເມື່ອສ້າງລະບອບສັງຄົມນິຍົມ ສິ່ງທີ່ຂາດບໍ່ໄດ້ທີ່ສຸດກໍແມ່ນຜະເດັດການກຳມະຊີບ, ໝາຍຄວາມວ່າ ຜະເດັດການປະຊາທິປະໄຕ ຂອງຊົນຊັ້ນກຳມະກອນໃນທຸກໆລະດັບຂອງວຽກງານພາຍໃນປະເທດພ້ອມ
ນີ້ ກໍໄດ້ຮັບຟັງປະຫວັດຄວາມເປັນມາ, ຄວາມສຳຄັນຂອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ຕື່ມອີກ.
ໂດຍ: ວຽງພອນ