ວັນທີ 13 ກໍລະກົດ 2023 ສະຫະພັນແມ່ຍິງນະຄອນຫຼວງວຽງຈັນ ໄດ້ຈັດພິທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 68 ປີ ( 20 ກໍລະກົດ 1955-20 ກໍລະກົດ 2023 ) ໃຫ້ກຽດເປັນປະທານໃນພິທີໂດຍ: ທ່ານ ຖະໜອມ ທຳທອງ ກຳມະການປະຈຳພັກ, ປະທານອົງການແນວລາວສ້າງຊາດ, ຜູ້ຊີ້ນຳອົງການ ຈັດຕັ້ງມະຫາຊົນ; ມີທ່ານ ນ. ຫຼຽນຄຳ ວິລະພັນ ປະທານຄະນະບໍລິຫານງານ ສຍ ນະຄອນຫຼວງ, ພະນັກງານບຳນານ, ແຂກຖືກເຊີນ, ພ້ອມດ້ວຍສະມາຊິກສະຫະພັນແມ່ຍິງນະຄອນຫຼວງເຂົ້າຮ່ວມຢ່າງພ້ອມພຽງ. ໃນພິທີທ່ານປະທານຄະນະບໍລິຫານງານ ສະຫະພັນແມ່ຍິງນະຄອນຫຼວງ ໄດ້ຜ່ານບົດສະຫຼຸບໂດຍຫຍໍ້ ການເຄື່ອນໄຫວ ຂອງອົງການຈັດຕັ້ງສະຫະພັນແມ່ຍິງ ນະຄອນຫຼວງວຽງຈັນ ໃນໄລຍະ 6 ເດືອນຕົ້ນປີ ແລະ ແຜນວຽກຈຸດສຸມ 6 ເດືອນທ້າຍ ປີ 2023; ພ້ອມດຽວກັນນີ້ຜູ້ເຂົ້າຮ່ວມກໍໄດ້ຮັບຟັງປະຫວັດມູນເຊື້ອ ທ່ານປະທານ ສຸພານຸວົງ ເນື່ອງໃນໂອກາດວັນຄ້າຍວັນເກີດ ຄົບຮອບ 114 ປີ ແລະ ການຫວນຄືນມູນເຊື້ອວັນສ້າງຕັ້ງສະຫະພັນແມ່ຍິງລາວ ຄົບຮອບ 68 ປີ ( 20 ກໍລະກົດ 1955-20 ກໍລະກົດ 2023)ຈາກທ່ານ ເຂັມເພັດ ແພງດວງຈັນ ອາດີດກໍາມະການພັກ, ອາດີດຫົວໜ້າໂຄສະນາອົບຮົມ ນະຄອນຫຼວງວຽງຈັນ ເຊິ່ງທ່ານໄດ້ຍົກໃຫ້ເຫັນເຖິງການຕໍ່ສູ້ຢ່າງເດັດດ່ຽວໜຽວແໜ້ນໄລຍະຜ່ານມາໂດຍສະເພາະມູນເຊື້ອດຸໝັ່ນຂະຫຍັນພຽນໃນການອອກແຮງງານ, ນ້ຳໃຈຮັກເຊື້ອແພງຊາດ, ຮັກບ້ານເກີດເມືອງນອນ, ນ້ຳໃຈເອື້ອເຟື້ອເພື່ອແຜ່, ຍອມທົນທຸກທົນຍາກເສຍສະຫຼະເພື່ອຄວາມສຸກຂອງຄອບຄົວ ແລະ ຮັກມູນມໍລະດົກວັດທະນະທຳອັນດີງາມຂອງຊາດລາວເຮົາ ໄປຄຽງຄູ່ກັບການປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະໃໝ່. ໂອກາດທີ່ມີຄວາມໝາຍສຳຄັນນີ້ທ່ານ ຖະໜອມ ທຳທອງ ກໍໄດ້ໃຫ້ກຽດໂອ້ລົມ ເຊິ່ງທ່ານໄດ້ເນັ້ນໃຫ້ສະຫະພັນແມ່ຍິງທຸກຂັ້ນສືບຕໍ່ສຶກສາອົບຮົມ, ປຸກລະດົມສະມາຊິກສະຫະພັນແມ່ຍິງ ກໍ່ຄືແມ່ຍິງລາວບັນດາເຜົ່າທົ່ວນະຄອນຫຼວງວຽງຈັນບຸກບືນພັດທະນາຕົນເອງໃນທຸກດ້ານ, ສືບຕໍ່ເພີ່ມທະວີເປັນເອກະພາບພາຍໃນ, ປະຕິບັດຫຼັກການລວມສູນປະຊາທິປະໄຕ ເຮັດວຽກ ເປັນໜູ່ຄະນະ, ບຸກຄົນຮັບຜິດຊອບຢ່າງເຂັ້ມງວດ; ເອົາໃຈໃສ່ຊີ້ນຳ ເສີມຂະຫຍາຍຂະບວນການຮຽນຮູ້ ແລະ ພັດທະນາຕົນເອງ ເພື່ອຕອບສະ ໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງ ໃນໄລຍະໃໝ່ກໍ່ຄືສະພາບການປັດຈຸບັນທີ່ ຕ້ອງການຜູ້ທີ່ມີຄວາມຮູ້ດ້ານວິທະຍາສາດ, ທຳມະຊາດ-ສັງຄົມ ຄອບຄູ່ກັບພາສາຕ່າງປະເທດ, ການນຳໃຊ້ເຕັກໂນໂລຊີທີ່ທັນສະໄໝ;ການຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີ ໃຫ້ເປັນຂະບວນຟົດຟື້ນ;ປຸກລະດົມໃຫ້ແມ່ຍິງສ້າງເງື່ອນໄຂ, ສົ່ງເສີມໃຫ້ລູກຫຼານທັງຍິງ-ຊາຍໄດ້ຮັບ ການສຶກສາຮໍ່າຮຽນ, ຊຸກຍູ້ວຽກງານໂຄສະນາສຸຂະສຶກສາ ແລະ ການຮັກສາສຸຂະພາບຂອງແມ່-ເດັກໃຫ້ແມ່ຍິງໄດ້ເຂົ້າເຖິງການບໍລິການດ້ານສາທາລະນະສຸກ, ມີໂພຊະນາການທີ່ດີ; ປຸກລະດົມສະມາຊິກສະຫະພັນແມ່ຍິງ ແລະ ແມ່ຍິງບັນດາເຜົ່າໃນທົ່ວນະຄອນຫຼວງ ວຽງຈັນ ເອົາໃຈໃສ່ໃນການຕ້ານ ປະກົດການຫຍໍ້ທໍ້ໃນສັງຄົມໃຫ້ຫຼຸດລົງເທື່ອລະກ້າວ.
