ວັນທີ 7 ມິຖຸນາ 2022, ທ່ານ ນ. ລາວັນ ສຸດທິສານ ຮອງປະທານຄະນະບໍລິຫານງານ ສສຍລ ໄດ້ເຂົ້າຮ່ວມເປັນປະທານ ເປີດກອງປະຊຸມຊຸກຍູ້ຕິດຕາມວຽກງານພັດທະນາແມ່ຍິງ ແລະ ການຈັດຕັ້ງປະຕິບັດວາລະແຫ່ງຊາດ ຂອງສະຫະພັນແມ່ຍິງລາວ ຢູ່ແຂວງຜົ້ງສາລີ; ມີສະຫະພັນແມ່ຍິງແຂວງ ແລະ ສະມາຊິກແມ່ຍິງອ້ອມຂ້າງແຂວງເຂົ້າຮ່ວມ. ໃນກອງປະຊຸມ ທ່ານ ນ. ສົມສຸກ ໄຊພະຈັນ ປະທານ ສຍ ແຂວງ ໄດ້ລາຍງານໂດຍຫຍໍ້ສະພາບລວມຂອງການຈັດຕັ້ງປະຕິບັດວຽກງານພັດທະນາແມ່ຍິງ ທີ່ຕິດພັນກັບການຈັດຕັ້ງປະຕິບັດວາລະແຫ່ງຊາດຂອງແຂວງ. ຈາກນັ້ນ, ຕາງໜ້າຈາກກົມຈັດຕັ້ງ ແລະ ພະນັກງານ, ກົມກວດກາ ແລະ ກົມພັດທະນາແມ່ຍິງລາວ ສູນກາງສະຫະພັນແມ່ຍິງລາວ ກໍໄດ້ຂຶ້ນນຳສະເໜີພາລະບົດບາດຂອງຕົນ ພ້ອມທັງວຽກງານທີ່ຕິດພັນກັບການຈັດຕັ້ງປະຕິບັດວາລະແຫ່ງຊາດ.
