ເພື່ອສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 67 ປີ ໃຫ້ກຽດເຂົ້າຮ່ວມໂດຍ ທ່ານ ສະເຫຼີມໄຊ ກົມມະສິດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ທ່ານນ. ສິລິກິດ ບຸບຜາ ຮອງປະທານ ຄະນະບໍລິຫານງານ ສສຍລ, ມີຄະນະພັກ-ຄະນະນໍາ, ຄະນະປະທານສະຫະພັນແມ່ຍິງກະຊວງ, ພັນລະຍາການນໍາ, ຕາງໜ້າອົງການມະຫາຊົນກະຊວງ, ແຂກຖືກເຊີຍ ແລະ ສະມາຊິກແມ່ຍິງ ພ້ອມດ້ວຍອ້າຍນ້ອງຊາຍ ເຂົ້າຮ່ວມທັງໝົດ 350 ຄົນ. ໃນພິທີ ທ່ານນ. ສິລິກິດ ບຸບຜາ ໄດ້ຫວນຄືນປະຫວັດມູນເຊື້ອຄວາມເປັນມາ ແລະ ມູນເຊື້ອອັນພິລະອາດຫານຂອງເອື້ອຍນ້ອງແມ່ຍິງ ຕັ້ງແຕ່ມື້ສ້າງຕັ້ງຈົນຮອດປັດຈຸບັນ, ຍົກໃຫ້ເຫັນຜົນງານທີ່ພົ້ນເດັ່ນໃນແຕ່ລະໄລຍະ ເພື່ອໃຫ້ເອື້ອຍນ້ອງແມ່ຍິງໃນຍຸກໃໝ່ໄດ້ສືບຕໍ່ຮໍ່າຮຽນເອົາຄຸນງາມຄວາມດີ ແລະ ຮັກສາມູນເຊື້ອອັນດີງາມນັ້ນໄວ້ສືບທອດໃຫ້ລູກຫຼານຕໍ່ໄປ. ໂອກາດສຳຄັນນີ້ ກໍໄດ້ຮັບຟັງການໂອ້ລົມ ຈາກ ທ່ານ ສະເຫຼີມໄຊ ກົມມະສິດ ເພື່ອເປັນເຂັມຊີ້ທິດເຍືອງທາງໃນການຈັດຕັ້ງປະຕິບັດວຽກງານແມ່ຍິງ ກໍຄືການພັດທະນາເອື້ອຍນ້ອງແມ່ຍິງຂອງກະຊວງໃຫ້ມີຜົນສຳເລັດໃນອະນາຄົດ. ຕອນທ້າຍພິທີ ຕາງໜ້າ ສຍ 17 ພາກສ່ວນ ໄດ້ຂຶ້ນຈັບມືແຂ່ງຂັນກັນຈັດຕັ້ງປະຕິບັດຂໍ້ແຂ່ງຂັນ 3 ດີ ຕື່ມອີກ.
