ວັນທີ 03 ມິຖຸນາ 2022, ທ່ານນາງ ທໍາມາ ເພັດວິໄຊ ຮອງປະທານຄະນະບໍລິຫານງານ ສສຍລ ໄດ້ ເຂົ້າຮ່ວມກອງປະຊຸມປຶກສາຫາລື ກ່ຽວກັບຮ່າງບົດລາຍງານສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ໄລຍະ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2022 ທີ່ຕິດພັນກັບສອງວາລະແຫ່ງຊາດ. ໂດຍການເປັນປະທານຂອງ ທ່ານ ຄໍາເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ, ມີຮອງລັດຖະມົນຕີ, ຕາງໜ້າກົມຈາກກະຊວງແຜນການ ແລະ ການລົງທຶນ, ຕາງໜ້າກະຊວງ-ອົງການທີ່ກ່ຽວຂ້ອງເຂົ້າຮ່ວມ. ກອງປະຊຸມໃນຄັ້ງນີ້ ເພື່ອຢັ້ງຢືນ ແລະ ເປັນເອກະພາບບັນດາວຽກງານທີ່ພົ້ນເດັ່ນ ແລະ ຕົວເລກໃນບົດລາຍງານດັ່ງກ່າວ ເພື່ອຈະລາຍງານຕໍ່ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດຊຸດທີ IX.
