ເນື່ອງໃນໂອກາດ ລະນຶກວັນສາກົນຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ 25 ພະຈິກ
ກົມໂຄສະນາ-ວັດທະນະທຳ ສູນກາງສະຫະພັນແມ່ຍິງລາວ ນຳໂດຍທ່ານ ນາງ ສິນທະມາລາ ລານາວັນ ຫົວໜ້າກົມໂຄສະນາ-ວັດທະນະທຳ ໄດ້ລົງໂຄສະນາເຜີຍແຜ່ຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ທີ່ໂຮງຮຽນ ມັດທະຍົມສົມບູນ ຫົວຊຽງ, ເມືອງໄຊທານີ, ນະຄອນຫລວງວຽງຈັນ; ມີຄະນະອຳນວຍການ, ຄູອາຈານ ແລະ ນັກຮຽນເຂົ້າຮ່ວມ ທັງໝົດ 519 ຄົນ. ການສະເຫຼີມສະຫຼອງວັນຕ້ານການໃຊ້ຄວາມຮຸນແຮງຕໍ່ແມ່ຍິງເປັນອີກວັນໜຶ່ງທີ່ມີຄວາມໝາຍຄວາມສໍາຄັນໃນທົ່ວໂລກກໍຄື ສປປ ລາວ ເຊິ່ງແນ່ໃສ່ປູກຈິດສໍານຶກໃຫ້ແກ່ສັງຄົມເຖິງການກະທໍາຄວາມຮຸນແຮງຕໍ່ແມ່ຍິງ ແລະ ເດັກຍິງເຊັ່ນ: ຄວາມຮຸນແຮງຕໍ່ຮ່າງກາຍ, ຈິດໃຈ, ທາງເພດ ແລະ ຮູບແບບອື່ນໆ. ສະນັ້ນ, ອົງການສະຫະປະຊາຊາດ (UN) ໄດ້ຖືເອົາວັນທີ 25 ພະຈິກເປັນວັນຢຸດຕິຄວາມຮຸນແຮງຕໍ່ແມ່ຍິງສາກົນ ແລະ ເປັນມື້ທໍາອິດຂອງຂະບວນ 16 ວັນຕ້ານການໃຊ້ຄວາມຮຸນແຮງຕໍ່ແມ່ຍິງ.
