ໂທລະສັບ 021 316253

ພີທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 68 ປີ ພາຍໃຕ້ຫົວຂໍ້ “ການສ້າງຄວາມເຂັ້ມແຂງໃຫ້ແມ່ຍິງ ທາງດ້ານເສດຖະກິດໃນໄລຍະໃໝ່”

Jul 18, 2023 | ຂ່າວສານ ແລະ ກິດຈະກຳ

ຕອນເຊົ້າວັນທີ 14 ກໍລະກົດ 2023 ສູນກາງສະຫະພັນແມ່ຍິງລາວ ຮ່ວມກັບສະມາຄົມນັກທຸລະກິດຍິງ ໄດ້ຈັດພີທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 68 ປີ ພາຍໃຕ້ຫົວຂໍ້ “ການສ້າງຄວາມເຂັ້ມແຂງໃຫ້ແມ່ຍິງ ທາງດ້ານເສດຖະກິດໃນໄລຍະໃໝ່” ເພື່ອຫວນຄືນມູນເຊື້ອ, ການເຕີບໃຫຍ່ຂະຫຍາຍຕົວ ຂອງສະຫະພັນແມ່ຍິງລາວ ແລະ ຜົນງານການເຄື່ອນໄຫວຂອງເອື້ອຍນ້ອງແມ່ຍິງ ໃນພາລະກິດປົກປັກຮັກສາ ແລະ ພັດທະນາປະເທດຊາດໂດຍສະເພາະຕໍ່ການປະກອບສ່ວນພັດ ທະນາເສດຖະກິດ-ສັງຄົມ. ໃຫ້ກຽດເຂົ້າຮ່ວມ ແລະມີຄໍາເຫັນໂອ້ລົມໂດຍ ທ່ານ ນ.ອິນລາວັນ ແກ້ວບຸນພັນ ກໍາມະການສູນກາງພັກ, ປະທານຄະນະບໍລິຫານງານສູນກາງສະຫະພັນແມ່ຍິງລາວ, ທ່ານປ້າ ນາລີ ສີສຸລິດ ພັນລະຍາທ່ານປະທານປະເທດແຫ່ງ ສປປ ລາວ, ພ້ອມດ້ວຍຄອບຄົວການນໍາ ພັກ-ລັດ ຂັ້ນສູງ, ຮອງປະທານ ສສຍລ, ຄະນະນໍາຈາກສູນກາງແນວລາວສ້າງຊາດ, ສູນກາງສະຫະພັນກໍາມະບານລາວ, ສູນກາງຊາວໜຸ່ມປະຊາຊົນປະຕິວັດລາວ, ສະຫະພັນນັກຮົບເກົ່າແຫ່ງຊາດລາວ, ສະມາຄົມນັກທຸລະກິດຍິງ, ສະມາຄົມຫັດຖະກໍາລາວ, ຄະນະສະຫະພັນແມ່ຍິງບັນດາກະຊວງ-ອົງການ, ນະຄອນ ຫຼວງ ,ພະນັກງານອາວຸໂສ ບໍານານ, ຜູ້ຕາງໜ້າຈາກບໍລິສັດລາວແລນໂຣເວີ, ຕາງໜ້າຈາກບໍລິສັດ, ຫ້າງຮ້ານ ແລະ ພະນັກງານ ຂອງສູນກາງສະຫະພັນແມ່ຍິງລາວ (ສສຍລ) ເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ນ.ອິນລາວັນ ແກ້ວບຸນພັນ ໄດ້ມີຄໍາເຫັນເຊິ່ງບາງຕອນທ່ານກ່າວວ່າ: ໃນໂລກນີ້ ແມ່ຍິງກວມກວ່າເຄິ່ງໜຶ່ງຂອງພົນລະເມືອງ, ໃນນັ້ນລາວເຮົາກໍເຊັ່ນດຽວກັນ, ປະຫວັດສາດໄດ້ຈາລຶກໄວ້ຊາດລາວ ມີປະຫວັດສາດຍາວນານ, ກວ້າງໃຫຍ່ໄພສານ, ອຸດົມສົມບູນໄປດ້ວຍສັບໃນດິນສິນໃນນໍ້າ ມີທັງໄລຍະທີ່ຮຸ່ງເຮືອງເຫຼືອງເຫຼື້ອມ, ມີທັງໄລຍະຖືກຮຸກຮານຈາກສັດຕູພາຍນອກ, ບ້ານເມືອງຖືກທໍາລາຍເຜົາຜານບໍ່ຈັກເທົ່າໃດຄັ້ງ ກາຍເປັນຫົວເມືອງຂຶ້ນຂອງຈັກກະພັດຜູ້ຮຸກຮານທັງແບບເກົ່າ ແລະ ແບບໃໝ່, ປະຊາຊົນລາວຖືກກົດຂີ່ຂູດຮີດ ກາຍເປັນຂ້ອຍຂ້າມ້າໃຊ້, ບໍ່ມີສິດ, ບໍ່ມີສຽງເລືອກຊີວິດຂອງຕົນເອງ ແລະ ຄອບຄົວ, ໂດຍສະເພາະແມ່ນແມ່ຍິງ ຕ້ອງພົບກັບຄວາມທຸກຍາກລໍາບາກ, ຖືກຂົ່ມຂືນທໍາສໍາເລົາ, ພວກເຂົາຖືແມ່ຍິງເປັນພຽງເຄື່ອງຫຼິ້ນ, ເປັນທາດຮັບໃຊ້, ຊຶ່ງໄດ້ສ້າງກົດເກນແບບບໍ່ຍຸຕິທໍາຕໍ່ແມ່ຍິງ ໂດຍຜ່ານຮີດຄອງອັນເກົ່າແກ່ຫຼ້າຫຼັງມາກົດຂີ່ຂົ່ມເຫັງແມ່ຍິງພວກເຮົາ ເຮັດໃຫ້ຊີວິດຂອງແມ່ຍິງບໍ່ມີຄຸນຄ່າ, ບໍ່ມີກຽດສັກສີ.ແຕ່ໃນຊີວິດຕົວຈິງແມ່ຍິງພັດໄດ້ປະຕິບັດໜ້າທີ່ອັນໜັກໜ່ວງໃນວຽກເຮືອນການຊານ,ວຽກບ້ານການເມືອງ, ມີຄວາມຊື່ສັດສຸດຈະລິດຕໍ່ລູກຜົວ-ຄອບຄົວ, ມີຈິດໃຈໂອບເອື້ອອາລີລ້ຽງລູກ,ຄອບຄົວ ດ້ວຍຄວາມເມດຕາກາລຸນາ, ເປັນທໍາ, ຫຼັງສູ້ຟ້າໜ້າສູ້ດິນ ເພື່ອໃຫ້ຄອບຄົວລູກເຕົ້າໄດ້ກິນອື່ມນຸ່ງອຸ່ນ, ມີຄວາມອົດທົນຜ່ານຜ່າ, ບໍ່ຈົ່ມບໍ່ວ່າ ບໍ່ທໍ້ຖອຍຕໍ່ໂຊກຊະຕາ, ມີໄຫວພິບແກ້ໄຂສະຖານະການໄດ້ດີ ເພື່ອປົກປ້ອງຄົນທີ່ເຄົາລົບຮັກ ແລະ ບູຊາ, ຫວງແຫນແຜ່ນດິນຖິ່ນກໍາເນີດຂອງຕົນຢ່າງບໍ່ຮູ້ອິດຮູ້ເມື່ອຍ, ມີຫົວຄິດປະດິດສ້າງໃນການທໍາມາຫາກິນ, ຕໍ່າຫູກທໍໄໝ ເພື່ອທຸກຄົນໃນຄອບຄົວໄດ້ກິນອື່ມນຸ່ງອຸ່ນ, ຖະໜອມຮັກລູກນ້ອຍ ດ້ວຍຊີວິດດັ່ງແກ້ວຕາດວງໃຈ, ອົດອອມ ປະຢັດສັດທ່ຽງ ໄວ້ໃຫ້ລູກເຕົ້າ ແລະ ຄອບຄອບ ເພື່ອເປັນທຶນຮອນ ສ້າງຖານະຄອບຄົວໃຫ້ຈະເລີນຮຸ່ງເຮືອງ; ຜ່ານພຶດຕິກໍາການເຄື່ອນໄຫວຂອງເອື້ອຍນ້ອງແມ່ຍິງຕົວຈິງຮຸ່ນຕໍ່ຮຸ່ນຈົນເຖິງປັດຈຸບັນ ພັກ-ລັດຖະບານ, ແນວລາວສ້າງຊາດ ແລະ ພາກສ່ວນອື່ນໆໄດ້ຕີລາຄາສູງ ແລະ ຖືສໍາຄັນຕໍ່ວຽກງານມະຫາຊົນ ຂອງພັກ ໃນນັ້ນວຽກງານແມ່ຍິງ ແມ່ນມີຖານະທີ່ຕັ້ງອັນສໍາຄັນເປັນພິເສດໃນການປຸກລະດົມຂົນຂວາຍມະຫາຊົນ, ເຂົ້າຮ່ວມໃນຂະບວນການລວມ ເພື່ອປົດປ່ອຍປະເທດຊາດ ແລະ ປົກປັກຮັກສາ ແລະ ສ້າງສາພັດທະນາປະເທດຊາດ. ທັນທີ ທີ່ພັກກໍາເນີດເກີດຂຶ້ນ, ພັກໄດ້ວາງແນວທາງນະໂຍບາຍໃນການດໍາເນີນພາລະກິດປົດປ່ອຍແມ່ຍິງ ລວມມີ 2 ດ້ານ ທີ່ມີການກ່ຽວພັນກັນຢ່າງສະໜິດແໜ້ນ ແລະ ຊຸກຍູ້ເຊິ່ງກັນ ແລະ ກັນຄື:1.) ຢາກປົດປ່ອຍແມ່ຍິງບົນພື້ນຖານການປົດປ່ອຍຊາດ ແລະ ປົດປ່ອຍຊົນຊັ້ນ; 2.) ຢາກປົດປ່ອຍຊາດ, ປົດປ່ອຍຊົນຊັ້ນ ຕ້ອງປົດປ່ອຍແມ່ຍິງຢ່າງແທ້ຈິງ, ຕ້ອງປຸກລະດົມແມ່ຍິງໃຫ້ເຂົ້າຮ່ວມເປັນຂະບວນການອັນກວ້າງຂວາງ ໃຫ້ຟົດຟື້ນ. ວັນທີ 20 ກໍລະກົດ1955 ພັກໄດ້ຈັດຕັ້ງໜ່ວຍຄົ້ນຄວ້າວຽກງານແມ່ຍິງຂຶ້ນຢ່າງເປັນທາງການ ແລະ ແຕ່ງຕັ້ງຄະນະໜ່ວຍ ຊຶ່ງປະກອບມີ 3 ທ່ານຄື: ທ່ານນາງ ຄໍາຫຼ້າ ວົງສັກ ເປັນຫົວໜ້າໜ່ວຍ, ທ່ານນາງ ຄໍາສຸກ ວົງວິຈິດ, ທ່ານນາງ ຄໍາແພງ ບຸບຜາ ເປັນກໍາມະການ ເພື່ອສືບຕໍ່ນໍາພາອົງການຈັດຕັ້ງແມ່ຍິງ ແລະ ຂົນຂວາຍຂະບວນການແມ່ຍິງທົ່ວປະເທດ, ຊຶ່ງໃນໄລຍະນັ້ນການຈັດຕັ້ງແມ່ຍິງຢູ່ທ້ອງຖິ່ນຮາກຖານເຄື່ອນໄຫວເປັນໜ່ວຍຍຸວັນນາລີ, ໜ່ວຍແມ່ນັກຮົບ, ໜ່ວຍເອື້ອຍນັກຮົບ, ຄະນະດັ່ງກ່າວ ມີໜ້າທີ່ຄົ້ນຄວ້າກໍານົດພາລະບົດບາດ, ກົດລະບຽບ ແລະ ໂຄງການດໍາເນີນງານເພື່ອເປັນພື້ນຖານໃຫ້ແກ່ການຈັດຕັ້ງ, ເຕົ້າໂຮມຄວາມສາມັກຄີ, ສຶກສາອົບຮົມປຸກລະດົມຂົນຂວາຍຂະບວນການແມ່ຍິງລາວບັນດາເຜົ່າເຂົ້າເປັນກໍາລັງແຮງໃຫ້ແກ່ການປະຕິວັດປົດປ່ອຍຊາດ. ເດືອນມັງກອນປີ 1956 ໄດ້ປ່ຽນຊື່ໜ່ວຍຄົ້ນຄວ້າວຽກງານແມ່ຍິງມາເປັນສະມາຄົມແມ່ຍິງລາວຮັກຊາດນັບແຕ່ມື້ສ້າງຕັ້ງເປັນຕົ້ນມາ, ອົງການຈັດຕັ້ງແມ່ຍິງໄດ້ເຄື່ອນໄຫວຕາມພາລະບົດບາດທີ່ໄດ້ກໍານົດໄວ້ໃນກົດລະບຽບ, ສ້າງຄໍາຂວັນ ເພື່ອປຸກລະດົມຂະບວນການແຕ່ລະໄລຍະເປັນຕົ້ນ ເດັດດ່ຽວປະຕິບັດຕາມຄຳຂວັນທີ່ວ່າ: “ທຸກສິ່ງທຸກຢ່າງເພື່ອແນວໜ້າ, ທຸກສິ່ງທຸກຢ່າງເພື່ອຕີເອົາຊະນະຈັກກະພັດອາເມລິກາ ແລະ ລູກມື”. ພາຍຫຼັງປະເທດຊາດໄດ້ຮັບການປົດປ່ອຍສະຖາປະນາສາທາລະນະລັດປະຊາທິປະໄຕປະຊາຊົນລາວຂຶ້ນໃນວັນທີ 02 ທັນວາ 1975. ແມ່ຍິງລາວໄດ້ເຂົ້າຮ່ວມປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ. ຜ່ານຂະບວນການດັ່ງກ່າວສ້າງໃຫ້ແມ່ຍິງລາວໄດ້ຮັບການພັດທະນາໃນທຸກດ້ານສາມາດເຂົ້າຮ່ວມໃນທຸກຂົງເຂດວຽກງານ ແລະ ໄດ້ຮັບຄວາມເຊື່ອໝັ້ນຈາກການຈັດຕັ້ງພັກ-ລັດ,ສັງຄົມ ແລະ ຄອບຄົວ. ການສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວໃນແຕ່ລະປີ ເປັນການລະນຶກເຖິງຜົນງານແລະ ຄຸນງາມຄວາມດີຂອງບັນດາທ່ານຜູ້ນໍາ,ນັກຮົບປະຕິວັດ, ພະນັກງານອາວຸໂສ, ແມ່ປ້ານ້າອາ ແລະ ແມ່ຍິງລາວບັນດາເຜົ່າທີ່ໄດ້ເສຍສະຫຼະໃນພາລະກິດຕໍ່ສູ້ປົດປ່ອຍປະເທດຊາດໃນເມື່ອກ່ອນກໍຄືການສ້າງສາພັດທະນາປະເທດຊາດໃນປັດຈຸບັນ , ພັກ ແລະ ລັດ ຍາມໃດກໍຮັບຮູ້ເຖິງຜົນງານການເຄື່ອນໄຫວຂອງເອື້ອຍນ້ອງແມ່ຍິງບັນດາເຜົ່າ ທີ່ໄດ້ປະກອບສ່ວນຢ່າງຕັ້ງໜ້າ ແລະ ແຂງແຮງໃນພາລະກິດລວມຂອງປະເທດຊາດ, ແມ່ຍິງລາວເປັນ“ແມ່ທີ່ດີ”, ຖືເປັນ “ສັນຍາລັກ, ເປັນຜູ້ສືບທອດ ແລະ ເສີມຂະຫຍາຍວັດທະນະທໍາອັນອຸດົມຮັ່ງມີ ແລະ ຈົບງາມ…”.
ໂອກາດນີ້ ສູນກາງສະຫະພັນແມ່ຍິງກໍໄດ້ມອບໃບຍ້ອງຍໍໃຫ້ 9 ພາກສ່ວນທີ່ໃຫ້ການສະໜັບສະໜູນໃນການຈັດງານຄັ້ງນີ້ ຄື: ສະມາຄົມນັກທຸລະກິດແມ່ຍິງ, ລາວແລນໂຣເວີ້, ສະມາຄົມຫັດຖະກໍາລາວ, ບໍລິສັດວຽງຈັນອໍຕົວເມຊັນ, ບໍລິສັດລືໄຊກໍ່ສ້າງ, ບໍລິສັດໄຟຟ້ານໍ້າເທີນ 1, ບໍລິສັດນໍ້າດື່ມໂອວີ, ຂຸນຕາປ້າຍ ແລະ ບໍລິສັດບິວຕີ້ພາວເວີ້.