ພິທີເປີດ ປ້າຍກາໝາຍ”ໜຶ່ງເມືອງ ໜຶ່ງຜະລິດຕະພັນ” ແຫ່ງຊາດ ກຸ່ມຫັດຖະກຳຕ່ຳຫູກສະຫະພັນແມ່ຍິງ ບ້ານດອນບຸງ ເມືອງຕຸ້ມລານ ແຂວງສາລະວັນ ຈັດຂຶ້ນໃນວັນທີ 28 ເມສາ 2023 ທີ່ຫ້ອງປະຊຸມ ເມືອງຕຸ້ມລານ ແຂວງສາລະວັນ ໂດຍການເຂົ້າຮ່ວມຂອງທ່ານນາງ ອິນລາວັນ ແກ້ວບຸນພັນ ກຳມະການສູນກາງພັກ ປະທານຄະນະບໍລິຫານງານສູນກາງສະຫະພັນແມ່ຍິງລາວ, ທ່ານນາງ ບຸນທະວີ ດວງລາສີ ຮອງເລຂາພັກແຂວງ ຜູ້ຊີ້ນຳວຽກງານການເມືອງ-ແນວຄິດ ວຽກພະນັກງານ; ມີກຳມະການປະຈຳພັກແຂວງ, ເຈົ້າເມືອງຕຸ້ມລານ, ປະທານສະຫະພັນແມ່ຍິງແຂວງ, ສະຫະພັນແມ່ຍິງເມືອງ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ. ໃນພິທີຜູ້ເຂົ້າຮ່ວມໄດ້ຮັບຟັງການລາຍງານສະພາບລວມຂອງເມືອງຕຸ້ມລານ, ປະຫວັດຄວາມເປັນມາຂອງລາຍສິ້ນໝີ່ ແລະ ຄວາມເປັນມາຂອງກຸ່ມຫັດຖະກຳຕ່ຳຫູກສະຫະພັນແມ່ຍິງ ບ້ານດອນບຸງ ເມືອງເລົ່າງາມ ແຂວງສາລະວັນ ພ້ອມທັງ ມອບ-ຮັບໃບຢັ້ງຢືນສິນຄ້າໜຶ່ງເມືອງໜຶ່ງຜະລິດຕະພັນ. ໂອກາດທີ່ມີຄວາມໝາຍສຳຄັນ ທ່ານປະທານຄະນະບໍລິຫານງານສູນກາງສະຫະພັນແມ່ຍິງລາວໄດ້ໃຫ້ກຽດຕັດແຖບຜ້າພ້ອມທັງລັນຄ້ອງເກົ້າບາດເປີດປ້າຍກາໝາຍ”ໜຶ່ງເມືອງ ໜຶ່ງຜະລິດຕະພັນ” ແຫ່ງຊາດ ກຸ່ມຫັດຖະກຳຕ່ຳຫູກສະຫະພັນແມ່ຍິງ ບ້ານດອນບຸງ ເມືອງຕຸ້ມລານ ແຂວງສາລະວັນ ຢ່າງເປັນທາງການ.
