ໂທລະສັບ 021 316253

ພິທີເປີດໄຟສີນໍ້າໝາກກ້ຽງເນື່ອງໃນໂອກາດລະນຶກວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງ 25 ພະຈິກ

Nov 28, 2023 | ຂ່າວສານ ແລະ ກິດຈະກຳ

ພິທີເປີດໄຟສີນໍ້າໝາກກ້ຽງເນື່ອງໃນໂອກາດລະນຶກວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງ 25 ພະຈິກ ຄົບຮອບ 23 ປີ ຈັດຂຶ້ນໃນຕອນຄໍ່າວັນທີ 24 ພະຈິກ 2023 ທີ່ປະຕູໄຊ ໂດຍການເປັນປະທານຮ່ວມຂອງທ່ານ ນາງ ອາລີ ວົງໜໍ່ບຸນທໍາ ປະທານຄະນະບໍລິຫານງານ ສສຍລ ຮອງປະທານ ຜູ້ປະຈໍາການ ຄຊກມດ ພ້ອມດ້ວຍຄູ່ຮ່ວມພັດທະນາຄື ອົງການສະຫະປະຊາຊາດເພື່ອການພັດທະນາ ປະຈໍາ ສປປ ລາວ, ອົງການ KOICA ປະຈໍາ ສປປ ລາວ, ອົງການ ສປຊ ປະຈໍາ ສປປ ລາວ ແລະອົງການສະຫະປະຊາຊາດກອງທຶນສໍາລັບປະຊາກອນ ປະຈໍາ ສປປ ລາວ; ມີຮອງລັດຖະມົນຕີ, ຮອງປະທານອົງການ, ທ່ານເອກອັກຄະລັດຖະທູດ, ທູຕານຸທູດ ແລະ ແຂກທີ່ຖືກເຊີນເຂົ້າຮ່ວມຢ່າງເປັນຂະບວນ.
ການລະນຶກວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງ 25 ພະຈິກ ຄົບຮອບ 23 ປີ ຊຶ່ງປີນີ້ພາຍໃຕ້ຫົວຂໍ້ “ຮ່ວມກັນ! ລົງທຶນໃສ່ການປ້ອງກັນ ແລະ ການຊ່ວຍເຫຼືອແມ່ຍິງ ແລະ ເດັກຍິງ ທີ່ຖືກຄວາມຮຸນແຮງ” ເພື່ອເປັນການປຸກລະດົມໃຫ້ທຸກຮຸ່ນຄົນໃນທົ່ວສັງຄົມໄດ້ຮັບຮູ້ ແລະ ເຂົ້າໃຈຢ່າງຖືກຕ້ອງວ່າການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ເປັນການລ່ວງລະເມີດສິດທິມະນຸດຂັ້ນພື້ນຖານຂອງແມ່ຍິງ ແລະ ເດັກຍິງສ້າງຈິດສໍານຶກໃຫ້ທຸກຄົນ ທຸກພາກສ່ວນພ້ອມກັນສົ່ງເສີມ ແລະ ປະຕິບັດສິດສະເໝີພາບຍິງ-ຊາຍ, ກ້າວໄປເຖິງໃຫ້ທຸກຄົນໃນທົ່ວສັງຄົມ ເຄົາລົບນັບຖື ໃຫ້ກຽດເຊິ່ງກັນ ແລະ ກັນ ບໍ່ມີການຈໍາແນກຕໍ່ແມ່ຍິງ, ເຮັດໃຫ້ທັງຍິງ-ຊາຍ, ເດັກຍິງ ແລະ ເດັກຊາຍ ມີສິດສະເໝີພາບເທົ່າທຽມກັນໃນການດໍາລົງຊີວິດ ແລະ ເຄື່ອນໄຫວຢ່າງມີກຽດສັກສີ.