ເນື່ອງໃນໂອກາດເຄື່ອນໄຫວຢ້ຽມຢາມສະຫະພັນແມ່ຍິງ ສ.ກູບາ ຢ່າງເປັນທາງການ, ໃນວັນທີ 13 ກຸມພາ 2023, ທ່ານ ນາງ ອິນລາວັນ ແກ້ວບຸນພັນ ກຳມະການສູນກາງພັກ ປະທານຄະນະບໍລິຫານງານ ສສຍລ ພ້ອມດ້ວຍຫົວໜ້າຫ້ອງການ ສສຍລ ໄດ້ເຂົ້າພົບປະສອງຝ່າຍກັບເລຂາທິການໃຫຍ່ສະຫະພັນແມ່ຍິງກູບາ ແລະ ບັນດາຫົວໜ້າອົງການສາຂາຕ່າງໆຂອງສະຫະພັນແມ່ຍິງກູບາ ພ້ອມທັງເຂົ້າຮ່ວມພິທີເຊັນສັນຍາການຮ່ວມມືລະຫວ່າງສອງສະຫະພັນແມ່ຍິງລາວ ແລະ ສະຫະພັນແມ່ຍິງກູບາ ໂດຍສອງຝ່າຍໄດ້ຕົກລົງເປັນເອກະພາບໃນການຮ່ວມມືໄລຍະ 2023-2027 ໂດຍມີເນື້ອໃນສໍາຄັນຄື ເພີ່ມທະວີການແລກປ່ຽນຂໍ້ມູນຂ່າວສານ ແລະ ການໂຄສະນາ, ວັດທະນະທໍາ ແລະ ຮີດຄອງປະເພນີ; ຊຸກຍູ້ສົ່ງເສີມການຮ່ວມມືທີ່ເປັນມູນເຊື້ອຂອງສອງພັກ, ສອງລັດ ແລະ ສອງອົງການຈັດຕັ້ງ ພ້ອມທັງເພີ່ມການມີສ່ວນຮ່ວມຂອງແມ່ຍິງເຂົ້າໃນການພັດທະນາທຸກຂົງເຂດວຽກງານ; ສືບຕໍ່ແລກປ່ຽນຄະນະຜູ້ແທນຂັ້ນສູງ; ສົມທົບກັນຈັດຕັ້ງກອງປະຊຸມສໍາມະນາ, ຝຶກອົບຮົມແບບເຊິ່ງໜ້າ ຫຼື ແບບທາງໄກ, ຈັດຕັ້ງການທັດສະນະສຶກສາແລກປ່ຽນປະສົບການ ແລະ ສົ່ງເສີມບົດບາດຂອງແມ່ຍິງໃນຂົງເຂດພັດທະນາ; ສ້າງຄວາມເຂັ້ມແຂງໃນການປະສານງານໃນການປະສານງານ ແລະ ການຮ່ວມມືໃນເວທີສາກົນຕ່າງໆ ແລະ ວຽກງານອື່ນໆ. ສະຫະພັນແມ່ຍິງກູບາເຊັນໂດຍ ທ່ານ ນາງ ເຕເຣສາ ມາເຣຍ ອາມາເຣເຢ ບຸຍ, ກຳມະການກົມການເມືອງສູນກາງພັກກອມມູນິດກູບາ ເລຂາທິການໃຫຍ່ສະຫະພັນແມ່ຍິງກູບາ ແລະ ສະຫະພັນແມ່ຍິງລາວ ເຊັນໂດຍ ທ່ານ ນາງ ອິນລາວັນ ແກ້ວບຸນພັນ ກຳມະການສູນກາງພັກ ປະທານຄະນະບໍລິຫານງານ ສູນກາງສະຫະພັນແມ່ຍິງລາວ.
