ພິທີຮັບມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ແລະ ເລື່ອນສະມາຊິກພັກສໍາຮອງເປັນສະມາຊິກພັກສົມບູນ

Mar 13, 2024 | ຂ່າວສານ ແລະ ກິດຈະກຳ

ພິທີຮັບມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ແລະ ເລື່ອນສະມາຊິກພັກສໍາຮອງເປັນສະມາຊິກພັກສົມບູນ
………………………………….
ຕອນບ່າຍວັນທີ 11 ມີນາ 2024, ສູນກາງສະຫະພັນແມ່ຍິງລາວ ຈັດພິທີຮັບມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ແລະ ເລື່ອນສະມາຊິກພັກສໍາຮອງເປັນສະມາຊິກພັກສົມບູນ; ເຂົ້າຮ່ວມ ແລະ ເປັນປະທານໂດຍ ສະຫາຍ ນາງ ທໍາມາ ເພັດວິໄຊ ຮອງເລຂາຄະນະບໍລິຫານງານພັກ ຮອງປະທານຄະນະບໍລິຫານງານ ສສຍລ; ມີບັນດາຄະນະໜ່ວຍພັກຫ້ອງການ, ກົມ, ສູນ, ຫ້ອງການ ຄຊກມດ, ສະຖາບັນການເງິນຈຸລະພາກທີ່ຮັບເງິນຝາກເພື່ອພັດທະນາແມ່ຍິງ ແລະ ຄອບຄົວ ພ້ອມດ້ວຍສະມາຊິກພັກ ຈາກພາກສ່ວນທີ່ກ່ຽວຂ້ອງເຂົ້າຮ່ວມ.
ໃນພິທີ ສະຫາຍ ນາງ ວົງອາກອນ ເພັງດາລິດ ຮອງເລຂາຄະນະໜ່ວຍພັກ ຮອງຫົວໜ້າກົມຈັດຕັ້ງ-ພະນັກງານ ໄດ້ຜ່ານມະຕິຕົກລົງຂອງອົງຄະນະພັກສູນກາງສະຫະພັນແມ່ຍິງລາວ ວ່າດ້ວຍການອະນຸມັດຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສໍາຮອງ 01 ສະຫາຍ (ຍິງ) ຈາກ ໜ່ວຍພັກກົມໂຄສະນາ-ວັດທະນະທຳ. ພ້ອມທັງ ຜ່ານມະຕິຕົກລົງວ່າດ້ວຍການເລື່ອນສະມາຊິກພັກສໍາຮອງເປັນສະມາຊິກພັກສົມບູນ 01 ສະຫາຍ (ຊາຍ) ຈາກໜ່ວຍສະຖາບັນການເງິນຈຸລະພາກທີ່ຮັບເງິນຝາກເພື່ອພັດທະນາແມ່ຍິງ ແລະ ຄອບຄົວ.
ໂອກາດທີ່ມີຄວາມໝາຍຄວາມສໍາຄັນນີ້ ສະຫາຍ ນາງ ທໍາມາ ເພັດວິໄຊ ໄດ້ໂອ້ລົມຕໍ່ພິທີ ໂດຍສະຫາຍໄດ້ຕີລາສູງຕໍ່ບັນດາໜ່ວຍພັກຮາກຖານແຕ່ລະໜ່ວຍ ໃນການຍົກສູງບົດບາດການນຳພາຂອງພັກໃຫ້ເຂັ້ມແຂງ ແລະ ເນັ້ນໃຫ້ສືບຕໍ່ເອົາໃຈໃສ່ວຽກງານສຶກສາອົບຮົມການເມືອງນຳພາແນວຄິດໃຫ້ສະມາຊິກເປັນປະຈຳ; ພ້ອມທັງຮຽກຮ້ອງມາຍັງສະມາຊິກພັກສົມບູນ ແລະ ສະມາຊິກພັກໃໝ່ ສືບຕໍ່ຝຶກຝົນຫຼໍ່ຫຼອມຕົນເອງໃຫ້ເປັນສະມາຊິກພັກທີ່ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ເປັນແບບຢ່າງນໍາໜ້າໃນທຸກວຽກງານ ເພື່ອເປັນກຳລັງແຮງທີ່ສໍາຄັນຂອງໜ່ວຍພັກ ກໍຄືອົງຄະນະພັກຕໍ່ໄປ; ເພີ່ມທະວີຄວາມຮັບຜິດຊອບຕໍ່ໜ້າວຽກຂອງຕົນ, ມີສະຕິຕໍ່ການ ຈັດຕັ້ງ, ຍຶດໝັ້ນ ແລະ ເປັນເອກະພາບຕໍ່ແນວທາງນະໂຍບາຍຂອງພັກ-ລັດ, ປະກອບສ່ວນຄວາມຮູ້ຄວາມສາມາດຂອງຕົນເຂົ້າ ໃນວຽກງານທີ່ການຈັດຕັ້ງມອບໝາຍໃຫ້, ສືບຕໍ່ຍົກລະດັບຄວາມຮູ້ຄວາມສາມາດຂອງຕົນ ເພື່ອປະກອບສ່ວນເຂົ້າໃນການສ້າງສາພັດທະນາ ປະເທດຊາດ ໃຫ້ນັບມື້ນັບມີຄວາມເຂັ້ມແຂງຂຶ້ນເລື້ອຍໆ.