ວັນທີ 24 ມີນາ 2023, ສູນກາງສະຫະພັນແມ່ຍິງລາວ ຈັດພິທີປິດຊຸດຝຶກອົບຮົມວຽກງານພັດທະນາແມ່ຍິງສຳລັບພະນັກງານການນຳສະຫະພັນແມ່ຍິງຂັ້ນກະຊວງ-ອົງການ ແລະ ສູນກາງສະຫະພັນແມ່ຍິງລາວ ທີ່ສູນອົບຮົມແມ່ຍິງລາວ ໂດຍການເປັນປະທານຂອງທ່ານນາງ ລາວັນ ສຸດທິສານຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ, ມີຄະນະຫ້ອງການ, ກົມ, ສູນ, ຫ້ອງການ ຄຊກມດ ພ້ອມດ້ວຍນັກສໍາມະນາຈາກກະຊວງ-ອົງການ ແລະ ສສຍລ ເຂົ້າຮ່ວມຢ່າງພ້ອມພຽງ.
ໃນພິທີຜູ້ເຂົ້າຮ່ວມໄດ້ຮັບຟັງການຜ່ານບົດສະຫຼຸບຊຸດຝຶກອົບຮົມຄັ້ງວັນທີ 13-24 ມີນາ 2023, ຜ່ານການຝຶກອົບຮົມຄັ້ງນີ້ຜູ້ເຂົ້າຮ່ວມໄດ້ເຂົ້າໃຈ ແລະ ສາມາດກຳແໜ້ນຄວາມຮູ້ພື້ນຖານດ້ານທິດສະດີແນວຄິດປະທານໄກສອນ ພົມວິຫານ ກ່ຽວກັບການປົດປ່ອຍແມ່ຍິງ, ທັດສະນະ ແລະ ທິດຊີ້ນຳຂອງພັກຕໍ່ວຽກງານແມ່ຍິງ, ແຜນພັດທະນາແມ່ຍິງລາວ ແລະ ແຜນນະໂຍບາຍແຫ່ງຊາດເພື່ອສົ່ງເສີມຄວາມກ້າວໜ້າຂອງແມ່ຍິງ ແລະ ບັນດາຫົວຂໍ້ຕ່າງໆ ພ້ອມນີ້ເປັນການເພີ່ມຄວາມຮູ້ໃໝ່ ແລະເຂົ້າໃຈແຈ້ງເຖິງລະບົບການເຮັດວຽກ, ການພັດທະນາແມ່ຍິງໄດ້ດີກ່ວາເກົ່າ. ພ້ອມນີ້ໃນພິທີຜູ້ເຂົ້າຮ່ວມໄດ້ຮັບໃບຢັ້ງຢືນເພື່ອຢັ້ງຢືນເຖິງຜົນສຳເລັດ ແລະ ສາມາດນຳເອົາຄວາມຮູ້ທີ່ໄດ້ຮຽນມາໄປເຜີຍແຜ່ ແລະ ຈັດຕັ້ງຜັນຂະຫຍາຍເຂົ້າໃນວຽກງານທີ່ຕົນຮັບຜິດຊອບໃຫ້ມີປະສິດທິພາບ ແລະ ປະສິດທິຜົນກ່ວາເກົ່າ. ໂອກາດທີ່ມີຄວາມໝາຍສຳຄັນນີ້ທ່ານຮອງປະທານ ສສຍລ ໄດ້ໂອ້ລົມຕໍ່ພິທີເພື່ອເປັນທິດເຍືອງທາງໃຫ້ນັກສຳມະນາ ແລະ ໄດ້ຍ້ອງຍໍຊົມເຊີຍຕໍ່ຊຸດຝຶກອົບຮົມນີ້.
