ວັນທີ 27 ມີນາ 2023, ສູນກາງສະຫະພັນແມ່ຍິງລາວ ຈັດພິທີປາຖະກະຖາຫວນຄືນມູນເຊື້ອ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 68 ປີ (22/3/1955-22/3/2023), ວັນຄຽດແຄ້ນຂອງປະຊາຊົນລາວ-ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 77 ປີ (21/3/1946-21/3/2023) ແລະ ວັນແມ່ຍິງສາກົນ ຄົບຮອບ 113 ປີ ( 8/3/1910-8/3/2023) ໂດຍການເປັນປະທານ ແລະ ປາຖະກະຖາ ຂອງ ທ່ານ ນາງ ລາວັນ ສຸດທິສານ ຮອງປະທານຄະນະບໍລິງານສູນກາງສະຫະພັນແມ່ຍິງລາວ; ມີຄະນະຫ້ອງການ, ກົມ, ສູນ, ຫ້ອງການ ຄຊກມດ, ສະຖາບັນການເງິນຈຸລະພາກທີ່ຮັບເງິນຝາກເພື່ອພັດທະນາແມ່ຍິງ ແລະ ຄອບຄົວ ພ້ອມດ້ວຍພະນັກງານ ສສຍລ ເຂົ້າຮ່ວມຢ່າງພ້ອມພຽງ.
ໃນພິທີທ່ານນາງ ລາວັນ ສຸດທິສານ ໄດ້ຍົກໃຫ້ເຫັນການກຳເນີດ ເຕີບໃຫຍ່ຂະຫຍາຍຕົວຂອງພັກ, ມູນເຊື້ອການຕໍ່ສູ້ຕີເອົາຊະນະຈັກກະພັດຕ່າງດ້າວຜູ້ຮຸກຮານ, ມູນເຊື້ອການປົກປັກຮັກສາ ແລະ ສ້າງສາພັດທະນາປະເທດຊາດ ຜົນສຳເລັດແຫ່ງການຊີ້ນຳ-ນຳພາຂອງພັກ ປະຊາຊົນປະຕິວັດລາວ ພາຍຫຼັງໄດ້ຮັບການສ້າງຕັ້ງຂຶ້ນ ໄດ້ປະເຊີນໜ້າກັບຈັກກະພັດອາເມລິກາ ແຕ່ພັກເຮົາກໍ່ໄດ້ແບກຫາບເອົາພາລະກຳອັນໜັກໜ່ວງ ເພື່ອຊີ້ນຳ-ນຳພາປວງຊົນລາວທັງຊາດ ຕໍ່ສູ້ຕ້ານການຮຸກຮານຂອງຈັກກະພັດຢ່າງດຸເດືອດ ຂ້ຽວຂາດ ກ້າວໄປເຖິງການປົດປ່ອຍປະເທດຊາດຢ່າງສົມບູນ ແລະ ພັດທະນາຢ່າງມີໝາກຜົນໃນ 3 ໄລຍະຄື: ໄລຍະການຕໍ່ສູ້ປົດປ່ອຍຊາດ ພັກເຮົາໄດ້ເພີ່ມທະວີປັບປຸງບຳລຸງກໍ່ສ້າງກຳລັງປະກອບອາວຸດ ພື້ນຖານການເມືອງ ແລະ ເສດຖະກິດ ປົກປັກຮັກສາສອງແຂວງເຕົ້າໂຮມ ສົມທົບກັບການຂົນຂວາຍປຸກລະດົມການຕໍ່ສູ້ການເມືອງຢູ່ 10 ແຂວງ ທັບມ້າງກົນອຸບາຍຂອງພວກລ່າເມືອງຂຶ້ນແບບໃໝ່ ກ້າວເຖິງການເຊັນສັນຍາວຽງຈັນ ປີ 1957; ໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ນັບແຕ່ ປີ 1975 ເປັນຕົ້ນມາ ພັກປະຊາຊົນປະຕິວັດລາວ, ລາວໄດ້ກ້າວສູ່ໄລຍະໃໝ່ ກາຍເປັນພັກກໍາອຳນາດ ທັງເປັນເຄື່ອງມືອັນແຫຼມຄົມ ເພື່ອຄຸ້ມຄອງສັງຄົມໃນເງື່ອນໄຂທີ່ຕັ້ງ ແລະ ບົດບາດຂອງພັກເຮັດໃຫ້ມີການປ່ຽນແປງດ້ານວຽກງານປ້ອງກັນຊາດ-ປ້ອງກັນຄວາມສະຫງົບ ແຜນນະໂຍບາຍພັດທະນາເສດຖະກິດ-ສັງຄົມ ຍຸດທະສາດ ແລະ ຍຸດໂທບາຍດ້ານການພົວພັນຕ່າງປະເທດ. ການຈັດຕັ້ງປະຕິບັດແນວທາງປ່ຽນແປງໃໝ່ ສປປ ລາວ ມີສະຖຽນລະພາບດ້ານການເມືອງ ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ ເສດຖະກິດແຫ່ງຊາດ ໄດ້ມີການຂະຫຍາຍຕົວຢ່າງຕໍ່ເນື່ອງ ຊີວິດການເປັນຢູ່ຂອງປະຊາຊົນໄດ້ຮັບການປັບປຸງຍົກສູງຂຶ້ນດີກວ່າເກົ່າຢ່າງຈະແຈ້ງ. ຈາກນັ້ນ ທ່ານ ຍັງຍົກໃຫ້ເຫັນມູນເຊື້ອການຕໍ່ສູ້ພິລະອາດຫານ, ນໍ້າໃຈເສຍສະຫຼະເພື່ອປະເທດຊາດຂອງປະຊາຊົນລາວ ໂດຍສະເພາະແມ່ນປະຊາຊົນລາວ ເມືອງທ່າແຂກ, ການຊີ້ນໍາບັນຊາສູ້ຮົບຂອງປະທານ ສຸພານຸວົງ ຕ້ານກັບຈັກກະພັດຝຣັ່ງ ຢ່າງອົງອາດກ້າຫານ, ເຖິງແມ່ນວ່າບັ້ນຮົບດັ່ງກ່າວຈະບໍ່ໄດ້ຮັບໄຊຊະນະແຕ່ມັນກໍ່ເປັນກະແສຟອງປຸກລະດົມ ປະຊາຊົນລຸກຮືຂຶ້ນ ຕໍ່ສູ້ຕ້ານພວກລ່າເມືອງຝຣັ່ງ ຢ່າງເປັນຂະບວນເລື້ອຍໆມາ ກ້າວໄປສູ່ການຕໍ່ສູ້ປົກປ່ອຍຊາດຢ່າງສົມບູນ. ພ້ອມດຽວກັນທ່ານໄດ້ຍົກໃຫ້ເຫັນເຖິງປະຫວັດຄວາມເປັນມາ ຂອງວັນແມ່ຍິງ ສາກົນ (8/3/1910-8/3/2023) ຄົບຮອບ 113 ປີ, ເຊິ່ງມີ ຫຼາຍ ບັນດາເຫດການຕ່າງໆທີ່ເກີດຂື້ນ ເປັນຕົ້ນການລຸກຮືຂື້ນປະທ້ວງຂອງເອື້ອຍນ້ອງແມ່ຍິງ ເພື່ອທວງເອົາສິດ ແລະ ຜົນປະໂຫຍດອັນຊອບທໍາ ໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ ພາຍໃຕ້ຄໍາຂວັນ ຜູ້ໜຶ່ງເຮັດວຽກມື້ໜຶ່ງ 8 ຊົ່ວໂມງ, ຍິງ-ຊາຍ ເຮັດວຽກຄືກັນຕ້ອງໄດ້ຮັບເງິນເດືອນເທົ່າກັນ, ຕ້ອງມີລະບົບປ້ອງກັນສຸກຂະພາບຂອງແມ່ຍິງ ແລະ ເດັນນ້ອຍເທົ່າກັນ.
ໂອກາດດຽວກັນຜູ້ເຂົ້າຮ່ວມໄດ້ຮັບຟັງການເຜີຍແຜ່ຜົນການເຂົ້າຮ່ວມກອງປະຊຸມວຽກງານກວດກາທົ່ວປະເທດປະ ຈຳປີ 2022 ຕິດພັນກັບວັນສ້າງຕັ້ງອົງການກວດກາພັກ, ລັດ ສປປ ລາວ ຄົບຮອບ 41ປີ (16/2/1982-16/2/2023) ຕື່ມອີກ.
