ພິທີປະດັບຫຼຽນໄຊ ແລະ ຫຼຽນກາ ຂອງລັດຖະບານ ໃຫ້ກົມກອງລວມໝູ່ທີ່ມີຜົນງານດີເດັ່ນ ໃນການປະກອບສ່ວນຊ່ວຍເຫຼືອ ການຈັດຕັ້ງປະຕິບັດແຜນພັດທະນາແມ່ຍິງ 05 ປີ (2016-2020) ໃນວັນທີ 10 ພຶດສະພາ 2023, ໃຫ້ກຽດເຂົ້າຮ່ວມພິທີໃນຄັ້ງນີ້ ມີ ທ່ານນາງ ອິນລາວັນ ແກ້ວບຸນພັນ, ປະທານຄະນະບໍລິຫານງານສູນກາງສະຫະພັນແມ່ຍິງ, ມີຮອງປະທານຄະນະບໍລິຫານງານ ສສຍລ, ຄະນະຫ້ອງການ, ກົມ, ສູນ, ຫ້ອງການ ຄຊກມດ ແລະ ສະຖາບັນການເງິນຈຸລະພາກ ພ້ອມທັງພະນັກງານ-ລັດຖະກອນ ສສຍລ ເຂົ້າຮ່ວມ.
ພິທີຄັ້ງນີ້, ໄດ້ປະດັບຫຼຽນໄຊແຮງງານຊັ້ນ III ໃຫ້ ລາວ-ອິນເຕີ ຄຼີນິກ, ລັດວິສາຫະກິດ ຫັດຖະກຳປະດິດຈໍາປາລາວ ແລະ ປະດັບຫຼຽນກາມິດຕະພາບ ໃຫ້ແກ່: ບໍລິສັດຄອນເກດ-ປາມໂອລິບ ປະເທດໄທ ຈຳກັດ ປະຈຳ ສປປ ລາວ. ຕາງໜ້າປະດັບຫຼຽນໂດຍ ທ່ານ ນາງ ອິນລາວັນ ແກ້ວບຸນພັນ ປະທານຄະນະບໍລິຫານງານສູນກາງສະຫະພັນແມ່ຍິງລາວ. ການປະດັບຫຼຽນໃນຄັ້ງນີ້ແມ່ນເພື່ອເປັນການຢັ້ງຢືນຜົນງານ, ຄຸນງາມຄວາມດີ ປະກອບສ່ວນເຂົ້າໃນວຽກງານພັດທະນາແມ່ຍິງ ຊ່ວຍເຫຼືອວັດຖຸທຶນຮອນ ຕະຫຼອດໄລຍະ 5 ປີ (2016-2020) ເຊິ່ງເປັນການປະກອບສ່ວນ ອັນສຳຄັນໃນການພັດທະນາປະເທດຊາດ ກໍຄືການພັດທະນາວຽກງານຂອງສະຫະພັນແມ່ຍີງລາວ.
