ພິທີປະດັບຫຼຽນໄຊຂອງພັກ-ລັດຖະບານແຫ່ງ ສປປ ລາວ ໃຫ້ສະຫະພັນແມ່ຍິງຫວຽດນາມ ຈັດຂຶ້ນໃນຕອນບ່າຍວັນທີ 04 ເມສາ 2023 ໂດຍການໃຫ້ກຽດເຂົ້າຮ່ວມຂອງ ທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ຮອງປະທານປະເທດແຫ່ງ ສປປ ລາວ; ເຂົ້າຮ່ວມມີ ທ່ານ ນາງ ອິນລາວັນ ແກ້ວບຸນພັນ ກຳມະການສູນກາງພັກ ປະທານຄະນະບໍລິຫານງານ ສສຍລ, ທ່ານ ນາງ ຮາ ທິ ຫງ່າ ກຳມະການສູນກາງພັກ ປະທານຄະນະບໍລິຫານງານສູນກາງສະຫະພັນແມ່ຍິງຫວຽດນາມ, ທ່ານ ນາງ ຫງວຽນ ທິ ຖ້ວນ ທີ່ປຶກສາ ຮັບຜິດຊອບວົງຄະນາຍາດຫວຽດນາມ ປະຈໍາ ລາວ (ຕາງໜ້າສະຖານເອກອັກຄະລັດຖະທູດຫວຽດນາມປະຈໍາ ສປປ ລາວ); ບັນດາທ່ານຮອງປະທານ; ແຂກຖືກເຊີນ, ຕາງໜ້າຈາກອົງການມະຫາຊົນ, ປະທານ-ຮອງປະທານສະຫະພັນແມ່ຍິງກະຊວງ-ອົງການ, ນະຄອນຫຼວງວຽງຈັນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ລັດຖະບານແຫ່ງ ສປປ ລາວ ໄດ້ປະດັບຫຼຽນໄຊອິດສະຫຼະຊັ້ນ II ໃຫ້ ທ່ານ ນາງ ຮາ ທິ ຫງ່າ ກຳມະການສູນກາງພັກປະທານຄະນະບໍລິຫານງານສູນກາງສະຫະພັນແມ່ຍິງຫວຽດນາມ, ຫຼຽນໄຊອິດສະຫຼະຊັ້ນ III ໃຫ້ຮອງປະທານສະຫະພັນແມ່ຍິງ ສສ ຫວຽດນາມ 2 ທ່ານ, ຫຼຽນໄຊແຮງງານຊັ້ນ III ໃຫ້ 1 ກົມກອງ, ຫຼຽນໄຊມິດຕະພາບໃຫ້ 3 ທ່ານ ແລະ 15 ກົມກອງ ໂດຍເປັນກຽດປະດັບຂອງທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ຮອງປະທານປະເທດແຫ່ງ ສປປ ລາວ.
ພິທີໃນຄັ້ງນີ້ ຈັດຂຶ້ນເພື່ອປະດັບຫຼຽນ ແລະ ຍ້ອງຍໍບຸກຄົນ ແລະ ກົມກອງທີ່ມີຜົນງານດີເດັ່ນ ໃນການປະກອບສ່ວນເຂົ້າໃນການສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ, ຫວຽດນາມ-ລາວ, ສະເຫຼີມສະຫຼອງ 2 ວັນປະຫວັດສາດຄື: ວັນສ້າງຕັ້ງສາຍພົວພັນການທູດລະຫວ່າງລາວ-ຫວຽດນາມ, ຫວຽດນາມ-ລາວ ຄົບຮອບ 60 ປີ (5 ກັນຍາ 1962-5 ກັນຍາ 2022), ວັນເຊັນສົນທິສັນຍາມິດຕະພາບການຮ່ວມມື ຄົບຮອບ 45 ປີ (18 ກໍລະກົດ 1977-9 ກໍລະກົດ 2022).
