ພະແນກສະຫະພັນແມ່ຍິງກອງບັນຊາການທະຫານອາກາດ ຈັດພິທີປາຖະກະຖາ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ

ຄົບຮອບ 67 ປີ ໃນວັນທີ 19 ກໍລະກົດ 2022 ທີ່ສະໂມສອນ ກອງບັນຊາການທະຫານອາກາດ ໂດຍການເຂົ້າຮ່ວມເປັນປະທານ ຂອງ ທ່ານ

ພັນເອກ ນາງ ໄພວອນ ອິນທະບຸດ ຄະນະບໍລິຫານງານສູນກາງສະຫະພັນແມ່ຍິງລາວ ຫົວໜ້າຫ້ອງການສະຫະພັນແມ່ຍິງກອງທັບ, ມີທ່ານ ພັນເອກ ແພງສີ ເສັງວິໄຊ ຄະນະພັກຮາກຖານຫ້ອງການເມືອງ, ຮອງຫົວໜ້າຫ້ອງການເມືອງ ກອງບັນຊາການທະຫານອາກາດ ຜູ້ຊີ້ນຳອົງການຈັດຕັ້ງມະຫາຊົນ, ທ່ານ ພັນໂທ ນາງ ຈອນທະຈິດ ແສນບຸດຕະລາດ ຫົວໜ້າພະແນກສະຫະພັນແມ່ຍິງ ກອງບັນຊາການທະຫານອາກາດ ພ້ອມດ້ວຍແຂກຖືກເຊີນ, ເອື້ອຍນ້ອງແມ່ຍິງກົມກອງອ້ອມຂ້າງເຂົ້າຮ່ວມ ທັງໝົດ 95 ສະຫາຍ, ຍິງ 86 ສະຫາຍ.

ໃນພິທີ ພັນໂທ ນາງ ຈອນທະຈິດ ແສນບຸດຕະລາດ ຫົວໜ້າພະແນກສະຫະພັນແມ່ຍິງ ກອງບັນຊາການທະຫານອາກາດ ຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 3 ດີ ໄລຍະ 02 ປີ (2020-2021) ແລະ ຜ່ານທິດທາງແຜນການ 05 ປີ ຕໍ່ໜ້າ (2021–2025 );

ພັນຕີ ນາງ ສີສຸພອນ ບຸນມີໄຊ ຜ່ານຂໍ້ຕົກລົງຂອງຫ້ອງການສະຫະພັນແມ່ຍິງກອງທັບ ວ່າດ້ວຍການຍ້ອງຍໍຜົນງານການປະຕິບັດ ຂໍ້ແຂ່ງຂັນ 3 ດີ; ພັນຕີ ນາງ ມະນີວັນ ເຮືອງພະຈິກ ຫົວໜ້າໜ່ວຍສະຫະພັນແມ່ຍິງ ຫ້ອງການເມືອງ ຜ່ານຂໍ້ແຂ່ງຂັນ 3 ດີ; ພັນໂທ ນາງ ແພງດີ ສົມຊະນິດ ຜ່ານແຜນພັດທະນາແມ່ຍິງກອງທັບ 05 ປີ ຄັ້ງທີ VIII, ມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການຮັບຮອງເອົາຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ແລະ ຜ່ານມະຕິກອງປະຊຸມໃຫຍ່ຜູ້ແທນແມ່ຍິງລາວ ຄັ້ງທີ VIII.

ໂອກາດດຽວກັນນີ້ ທ່ານ ພັນເອກ ນາງ ໄພວອນ ອິນທະບຸດ ປະທານກອງປະຊຸມ ໄດ້ ເລົ່າຄືນມູນເຊື້ອວັນສ້າງຕັ້ງສະຫະພັນແມ່ຍິງລາວ ເຊິ່ງຍາມໃດແມ່ຍິງລາວກໍ່ໄດ້ເປັນສ່ວນໜຶ່ງ ທີ່ເປັນກຳລັງແຮງອັນສຳຄັນຂອງພັກ ນັບແຕ່ມື້ສ້າງຕັ້ງສະຫະພັນແມ່ຍິງລາວ ຈົນຮອດປັດຈຸບັນ, ແມ່ຍິງລາວ ໄດ້ສືບຕໍ່ເດັດດ່ຽວເສີມຂະຫຍາຍມູນເຊື້ອອັນອົງອາດກ້າແກ່ນຂອງຕົນ ເຂົ້າໃນການປະຕິບັດ 2 ໜ້າທີ່ຍຸດທະສາດຄື: ການປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະແມ່ນຂະບວນການພັດທະນາແມ່ຍິງ ແລະ ຜ່ານບົດໂອ້ລົມຂອງ ພະນະທ່ານ ທອງລຸນ ສີສຸລິດ ເລຂາທິການໃຫຍ່ ປະທານປະເທດແຫ່ງ ສ ປປລາວ ແລະ ມີຄຳເຫັນ ໂອ້ລົມຕໍ່ກອງປະຊຸມ.

(ຂ່າວ ແລະ ຮູບພາບຈາກ: ຫ້ອງການສະຫະພັນແມ່ຍິງກອງທັບ)