ປາຖະກະຖາເນື່ອງໃນໂອກາດສະເຫຼີມສະຫຼອງວັນແມ່ຍິງສາກົນຄົບຮອບ 114 ປີ

Mar 19, 2024 | ຂ່າວສານ ແລະ ກິດຈະກຳ

ສະຫະພັນແມ່ຍິງກະຊວງການຕ່າງປະເທດ ຈັດປາຖະກະຖາເນື່ອງໃນໂອກາດສະເຫຼີມສະຫຼອງວັນແມ່ຍິງສາກົນຄົບຮອບ 114 ປີ
………………………………………..
ໃນວັນທີ 15 ມີນາ 2024, ສະຫະພັນແມ່ຍິງກະຊວງການຕ່າງປະເທດ ຈັດພິທີປາຖະກະຖາເນື່ອງໃນໂອກາດສະເຫຼີມສະຫຼອງວັນແມ່ຍິງສາກົນຄົບຮອບ 114 ປີ (8 ມີນາ 1910-8 ມີນາ 2024) ພາຍໃຕ້ຄຳຂວັນ: “ລົງທຶນເລັ່ງໃສ່ການພັດທະນາຄວາມກ້າວໜ້າຂອງແມ່ຍິງ” ແລະ ສະຫຼຸບການເຄື່ອນໄຫວວຽກງານສະຫະພັນແມ່ຍິງກະຊວງການຕ່າງປະເທດ ປີ 2023 ແລະ ທິດທາງແຜນການການເຄື່ອນໄຫວ ປີ 2024 ທີ່ ກະຊວງການຕ່າງປະເທດ, ໂດຍການເຂົ້າຮ່ວມ ແລະ ປາຖະກະຖາຂອງ ທ່ານ ນາງ ທຳມາ ເພັດວິໄຊ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ; ເຂົ້າຮ່ວມໂດຍ ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ (ຜູ້ຊີ້ນຳອົງການຈັດຕັ້ງມະຫາຊົນ); ທ່ານ ນາງ ອາລຸນີ ກົມມະສິດ ພັນລະຍາທ່ານລັດຖະມົນຕີ, ປະທານກິດຕິມະສັກສະຫະພັນແມ່ຍິງກະຊວງການຕ່າງປະເທດ; ມີຄະນະບໍລິຫານງານສະຫະພັນແມ່ຍິງກະຊວງ; ບັນດາຄະນະກົມ; ຕາງໜ້າອົງການຈັດຕັ້ງຊາວໜຸ່ມ, ສະຫະພັນກຳມະບານ, ບັນດາພັນລະຍາຄະນະນຳກະຊວງ ແລະ ສະມາຊິກສະຫະພັນແມ່ຍິງກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ.
ໃນພິທີ, ທ່ານ ນາງ ທຳມາ ເພັດວິໄຊ ໄດ້ປາຖະກະຖາ ຫົວຂໍ້ “ຫວນຄືນມູນເຊື້ອປະຫວັດຄວາມເປັນມາຂອງວັນແມ່ຍິງສາກົນ (8 ມີນາ 1910-8 ມີນາ 2024)” ເພື່ອສະແດງໃຫ້ເຫັນຄວາມໝາຍຄວາມສໍາຄັນ ແລະ ປະຫວັດຄວາມເປັນມາແຫ່ງການຕໍ່ສູ້ເພື່ອທວງເອົາສິດ ແລະ ຜົນປະໂຫຍດອັນຊອບທຳຂອງແມ່ຍິງໃນທົ່ວໂລກ. ພ້ອມນັ້ນ, ຍັງຍົກໃຫ້ເຫັນບົດບາດຂອງແມ່ຍິງທີ່ໄດ້ປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມ. ໃນໂອກາດດັ່ງກ່າວນີ້, ທ່ານ ນາງ ໄກມະນີ ອໍລະບູນ, ປະທານສະຫະພັນແມ່ຍິງກະຊວງການຕ່າງປະເທດ ໄດ້ຜ່ານບົດສະຫຼຸບການເຄື່ອນໄຫວຂອງສະຫະພັນແມ່ຍິງ ປະຈຳປີ 2023 ແລະ ທິດທາງແຜນການປີ 2024 ທີ່ໄດ້ຍົກໃຫ້ເຫັນຜົນງານອັນພົ້ນເດັ່ນ ໃນໄລຍະ 1 ປີ ຜ່ານມາ, ເຊິ່ງເອື້ອຍນ້ອງແມ່ຍິງ ໄດ້ປະຕິບັດວຽກງານຂອງສະຫະພັນແມ່ຍິງ ໄປຄຽງຄູ່ກັບການປະຕິບັດວຽກງານວິຊາສະເພາະ ໄດ້ຢ່າງມີປະສິດທິພາບ ແລະ ມີຜົນສຳເລັດ. ໃນພິທີ ຍັງໄດ້ມີການມອບໃບຍ້ອງຍໍການຈັດຕັ້ງປະຕິບັດຂໍ້ແຂ່ງຂັນ 3 ດີ ປະຈຳປີ 2023 ຂອງສະຫະພັນແມ່ຍິງກະຊວງການຕ່າງປະເທດ ເຊິ່ງໃນນັ້ນ ມີບັນດາໜ່ວຍ ແລະ ບຸກຄົນທີ່ໄດ້ຮັບການຍ້ອງຍໍ ຄື: ດີເດັ່ນປະເພດ I ມີ 17 ໜ່ວຍ ແລະ ບຸກຄົນດີເດັ່ນປະເພດ I ມີ 235 ສະຫາຍ.
ໃນໂອກາດອັນສະຫງ່າລາສີນີ້, ທ່ານ ທອງຜ່ານ ສະຫວັນເພັດ ໄດ້ມີຄຳເຫັນ ແລະ ໂອ້ລົມຕໍ່ບັນດາສະມາຊິກສະຫະພັນແມ່ຍິງກະຊວງ ໂດຍໄດ້ຕີລາຄາສູງບົດບາດຂອງເອື້ອຍນ້ອງແມ່ຍິງກະຊວງການຕ່າງປະເທດ ທີ່ໄດ້ປະກອບ ສ່ວນອັນສຳຄັນເຂົ້າໃນວຽກງານການຕ່າງປະເທດຕະຫຼອດໄລຍະທີ່ຜ່ານມາ. ພ້ອມນີ້, ໄດ້ສະແດງຄວາມຊົມເຊີຍຕໍ່ຜົນງານທີ່ເອື້ອຍນ້ອງແມ່ຍິງກະຊວງການຕ່າງປະເທດ ຍາດມາໄດ້ ເຊິ່ງມີຜົນສຳເລັດຫຼາຍດ້ານ.