ປະທານຄະນະບໍລິຫານງານ ສູນກາງສະຫະພັນແມ່ຍິງລາວ ພ້ອມດ້ວຍຄະນະ ໄດ້ເດີນທາງໄປ ສາທາລະນະລັດສິງກະໂປ

ໃນລະຫວ່າງວັນທີ 16-19 ກັນຍາ 2023, ທ່ານ ນາງ ອິນລາວັນ ແກ້ວບຸນພັນ ປະທານຄະນະບໍລິຫານງານ ສູນກາງສະຫະພັນແມ່ຍິງລາວ ພ້ອມດ້ວຍຄະນະ ໄດ້ເດີນທາງໄປ ສາທາລະນະລັດສິງກະໂປ ຕາມການເຊີນຂອງ ທ່ານ Mr. Masagos Zulkifli ລັດຖະມົນຕີກະຊວງພັດທະນາສັງຄົມ ແລະ ຄອບຄົວ ແລະ ລັດຖະມົນຕີກະຊວງສາທາລະນະສຸກ ຄົນທີສອງ ແຫ່ງສາທາລະນະລັດສິງກະໂປ ເພື່ອເຂົ້າຮ່ວມກອງປະຊຸມປຶກສາຫາລືແລກປ່ຽນບົດຮຽນຮ່ວມກັບກະຊວງສະຫວັດດີການສັງຄົມ ແລະ ພັດທະນາຄອບຄົວຂອງສາທາລະນະລັດສິງກະໂປ. ຈຸດປະສົງຂອງການຢ້ຽມຢາມຄັ້ງນີ້ ເພື່ອເສີມສ້າງພົວພັນ ລະຫວ່າງ ສູນກາງສະຫະພັນແມ່ຍິງລາວ ແລະ ກະຊວງພັດທະນາສັງຄົມ ແລະ ຄອບຄົວ ຂອງສິງກະໂປ ໃນວຽກງານພັດທະນາແມ່ຍິງ ແລະ ເດັກ. ພ້ອມກັນນັ້ນ ຍັງໄດ້ເເລກປ່ຽນບົດຮຽນກ່ຽວກັບການກະກຽມການຮ່ວມມື ໃນຕໍ່ໜ້າໂດຍສະເພາະວຽກງານສ້າງຄວາມເຂັ້ມໃຫ້ແມ່ຍິງໃນການພັດທະນາທຸລະກິດຂອງແມ່ຍິງ ແລະ ການພັດທະນາຊັບພະຍາກອນມະນຸດ ເພື່ອກະກຽມຄວາມພ້ອມໃຫ້ກອງປະຊຸມລະດັບສູງຂອງ ອາຊຽນທີ່ ສປປ ລາວ ຈະເປັນເຈົ້າພາບ ແລະ ການສະເຫຼີມສະຫຼອງສາຍພົວພັນການທູດ ລະຫວ່າງ ສປປ ລາວ ແລະ ສາທາລະນະລັດ ສິງກະໂປຄົບຮອບ 50 ປີ ໃນ ປີ 2024. ໂອກາດນີ້ ທ່ານ ປະທານ ສສຍລ ຍັງໄດ້ໄປຮັບຊົມການແຂ່ງຂັນຂັບລົດລະດັບສາກົນ ຄັ້ງທີ 1 ແລະ ຢ້ຽມຢາມອົງການແມ່ຍິງສິງກະໂປ ທີ່ເປັນເພື່ອນຮ່ວມງານຂອງກະຊວງພັດທະນາສັງຄົມ ແລະ ຄອບຄົວ ແຫ່ງສາທາລະນະລັດສິງກະໂປ ທີ່ເຮັດໜ້າທີ່ ສົ່ງເສີມບົດບາດຍິງ-ຊາຍ, ການຊ່ວຍເຫຼືອຄອບຄົວແມ່ຍິງ ທີ່ມີບັນຫາທາງສັງຄົມ ແລະ ອື່ນໆນໍາອີກ.