ວັນທີ 7 ພະຈິກ 2023, ທ່ານ ນາງ ອາລີ ວົງໜໍ່ບຸນທຳ ປະທານຄະນະບໍລິຫານງານ ສສຍລ ພ້ອມດ້ວຍຄະນະ ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ດີນາ ຈອຍ ອາມາຕອງ ( Deena Joy Amatong ) ເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງປະເທດຟີລິບປິນ ປະຈຳ ສປປ ລາວ. ໂອກາດດັ່ງກ່າວນີ້ ທ່ານປະທານ ສສຍລ ໄດ້ສະແດງຄວາມຊົມເຊີຍ ແລະ ຕ້ອນຮັບຢ່າງອົບອຸ່ນ ພ້ອມທັງນຳສະເໜີພາລະບົດບາດໜ້າທີ່ ຂອງ ສສຍລ ແລະ ການຈັດຕັ້ງປະຕິບັດວຽກງານໃນຂົງເຂດສະຫະພັນແມ່ຍິງ ເວົ້າລວມ ເວົ້າສະເພາະວຽກງານບົດບາດຍິງ-ຊາຍ ທີ່ຍາມໃດ ສູນກາງສະຫະພັນແມ່ຍິງກໍ່ໄດ້ຖືສຳຄັນຕໍ່ວຽກງານດັ່ງກ່າວ, ໄປຄຽງຄູ່ກັບການປຶກສາຫາລືຕໍ່ກັບການສ້າງວຽກເຮັດງານທຳ ໂດຍສະເພາະວຽກງານຫັດຖະກຳໄປຄຽງຄູ່ກັບການສ້າງວິຊາຊີບໃຫ້ເອື້ອຍນ້ອງແມ່ຍິງໃຫ້ນັບມື້ນັບມີຈຳນວນເພີ່ມຂຶ້ນ.
ໂອກາດທີ່ມີຄວາມໝາຍສຳຄັນນີ້ທັງສອງຝ່າຍໄດ້ປຶກສາຫາລື ການຈັດຕັ້ງປະຕິບັດວຽກງານຮ່ວມກັນໃນຕໍ່ໜ້າເພື່ອໃຫ້ມີທ່າກ້າວທີ່ດີຂຶ້ນໄປເລື້ອຍໆ.
