ປະທານຄະນະບໍລິຫານງານ ສສຍລ ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ຊິວ-ແລັງ ຊູອອກ (Mme Siv-Leng CHHOUR)

ວັນທີ 03 ຕຸລາ 2023 ທ່ານ ນາງ ອິນລາວັນ ແກ້ວບຸນພັນ, ກໍາມະການສູນກາງພັກ ປະທານຄະນະບໍລິຫານງານ ສສຍລ ພ້ອມດ້ວຍຄະນະ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ຊິວ-ແລັງ ຊູອອກ (Mme Siv-Leng CHHOUR) ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງປະເທດຝຣັ່ງ ປະຈຳ ສປປ ລາວ ພ້ອມຄະນະ. ໂອກາດດັ່ງກ່າວນີ້ ທ່ານ ປະທານ ສສຍລ ໄດ້ກ່າວສະແດງຍິນດີຕ້ອນຮັບຕໍ່ການມາຢ້ຽມຢາມ ພ້ອມທັງແຈ້ງໃຫ້ຮູ້ເຖິງທີ່ຕັ້ງ ພາລະບົດບາດ, ໜ້າທີ່ ຂອງ ສສຍລ ລວມເຖິງການພົວພັນທີ່ສະໜິດແໜ້ນຂອງສອງປະເທດ ລາວ ແລະ ຝຣັ່ງ, ລວມທັງການຊ່ວຍເຫຼືອຂອງປະເທດຝຣັ່ງ ໃນໄລຍະຜ່ານມາ. ໂອກາດນີ້ ທັງສອງຝ່າຍໄດ້ປຶກສາຫາລືແຜນການຮ່ວມມືກັນໃນຕໍ່ໜ້າ ເພື່ອສືບຕໍ່ເພີ່ມທະວີສາຍພົວພັນມິດຕະພາບຄວາມສາມັກຄີລະຫວ່າງສອງຊາດໃຫ້ນັບມື້ແໜ້ນແຟ້ນຍິ່ງໆຂຶ້ນ ໂດຍສະເພາະວຽກງານດ້ານການສົ່ງເສີມບົດບາດຍິງ-ຊາຍຂອງທັງສອງປະເທດ ໃນການເສີມຂະຫຍາຍຜົນສໍາເລັດ ແລະ ຈຸດດີ; ຖອດຖອນບົດຮຽນ ແລະ ຊອກຫາວິທີການແກ້ໄຂສິ່ງທ້າທາຍໃນການຈັດຕັ້ງປະຕິບັດວຽກງານດັ່ງກ່າວ; ບົດບາດຂອງແມ່ຍິງໃນຂົງເຂດເສດຖະກິດທີ່ນັບມື້ນັບມີຈຳນວນເພີ່ມຂຶ້ນ ລວມເຖິງການປະກອບສ່ວນຂອງແມ່ຍິງໃນທຸກຂົງເຂດວຽກງານ ເພື່ອໃຫ້ສ້າງໂອກາດເງື່ອນໄຂໃຫ້ແມ່ຍິງໄດ້ພັດທະນາຕົນເອງ ກ້າວໄປເຖິງການສ້າງສາພັດທະນາປະເທດຊາດໃຫ້ຈະເລີນກ້າວໜ້າໄປເທື່ອລະກ້າວ. ພ້ອມນີ້ທັງສອງຝ່າຍຍັງໄດ້ປຶກສາຫາລືກັນກ່ຽວກັບກິດຈະກຳທີ່ຈະເຮັດຮ່ວມກັນໃນອະນາຄົດຕື່ມອີກ.