ໂທລະສັບ 021 316253

ປະທານຄະນະບໍລິຫານງານ ສສຍລ ພ້ອມດ້ວຍຄະນະຜູ້ແທນສະຫະພັນແມ່ຍິງກູບາ ຢ້ຽມຢາມໂຮງຮຽນ ມສ ດົງບັງ

May 26, 2023 | ຂ່າວສານ ແລະ ກິດຈະກຳ

ໃນຕອນບ່າຍວັນທີ 18 ພຶດສະພາ 2023, ທ່ານປະທານຄະນະບໍລິຫານງານ ສສຍລ ພ້ອມດ້ວຍຄະນະຜູ້ແທນສະຫະພັນແມ່ຍິງກູບາ, ເອກອັກຄະລັດຖະທູດ ສ.ກູບາ ປະຈໍາ ສປປ ລາວ, ຮອງປະທານສະມາຄົມມິດຕະພາບລາວ-ກູບາ ແລະ ຄະນະຮັບຜິດຊອບ ໄດ້ໄປຢ້ຽມຢາມໂຮງຮຽນ ມສ ດົງບັງ ມິດຕະພາບລາວ-ກູບາ ທີ່ບ້ານນາສາລາ, ເມືອງໄຊທານີ, ນະຄອນຫຼວງວຽງຈັນ. ໂຮງຮຽນດົງບັງ ໄດ້ຮັບການສ້າງຕັ້ງຂຶ້ນໃນປີ 1977 (ເມື່ອກ່ອນຕັ້ງຢູ່ບ້ານໂພນຕ້ອງ) ໃນປີ 1987 ໄດ້ຍ້າຍມາຢູ່ບ້ານນາສາລາ ແລະ ປີ 1988 ໄດ້ຍົກລະດັບມາເປັນໂຮງຮຽນມັດທະຍົມສົມບູນດົງບັງ. ປັດຈຸບັນມີນັກຮຽນທັງໝົດ 883 ຄົນ, ຍິງ 421 ຄົນ. ໂຮງຮຽນແຫ່ງນີ້ ຕັ້ງຢູ່ບ້ານດົງບັງ ຊຶ່ງເປັນບ້ານວິລະຊົນໃນສະໄໝຕໍ່ສູ້ປົດປ່ອຍປະຊາຊົນ, ເປັນສະຖານທີ່ແຫ່ງທຳອິດໃນ ສປປ ລາວ ທີ່ໄດ້ປະດິດສະຖານຮູບຫຼໍ່ຂອງ ທ່ານ ໂຮເຊ ມາກຕີ້ ວິລະຊົນກູບາ. ໂອກາດນີ້, ຄະນະປະທານ ສສຍລ ແລະ ຄະນະຜູ້ແທນສະຫະພັນແມ່ຍິງກູບາ ໄດ້ມອບລໍາໂພງ 2 ໜ່ວຍ ແລະ ສະບູໃຫ້ໂຮງຮຽນ ມສ ດົງບັງ ມິດຕະພາບລາວກູບາ ເພື່ອໝູນໃຊ້ເຂົ້າໃນກິດຈະກຳຂອງໂຮງຮຽນ ແລະ ໄດ້ພ້ອມກັນປູກຕົ້ນໄມ້ ເພື່ອເປັນທີ່ລະນຶກການມາຢ້ຽມຢາມໃນຄັ້ງນີ້ນໍາອີກ.