ໃນຕອນເຊົ້າວັນທີ 14 ພຶດສະພາ 2022 ຜ່ານມາ ບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ຈັດກິດຈະກໍາ CSR ພາຍໃຕ້ຊື່ກິດຈະກໍາວ່າ: “ຮຽນຮູ້ນອກຫ້ອງຮຽນ” ກັບ ລາວ ໂທລະຄົມ ຈັດຂື້ນທີ່ The Makerbox Lao, ສູນການຄ້າ World Trade Center ນະຄອນຫຼວງວຽງຈັນ, ມີຄະນະຄູອາຈານ ແລະ ນ້ອງໆນັກຮຽນຈາກ ໂຮງຮຽນປະຖົມສົມບູນທ່າກົກໄຮ 1 ແລະ ໂຮງຮຽນ ມສ ນາບົງ ເມືອງປາກງື່ມ, ນະຄອນຫຼວງວຽງຈັນ ພ້ອມດ້ວຍທີມງານວິຊາການຂອງ ລາວ ໂທລະຄົມ ແລະ The Makerbox Lao ລວມທັງໝົດ 60 ກວ່າຄົນ ເຂົ້າຮ່ວມ. ຕາງໜ້າຜູ້ບໍລິຫານ ລລທ ກ່າວເປີດກິດຈະກໍາ ໂດຍ ທ່ານ ນາງ ດາວລອຍ ມະນີຈັນ ຮອງຫົວໜ້າພາກສ່ວນ Digital Marketing , ພະແນກການຕະຫຼາດ. ກິດຈະກໍາຄັ້ງນີ້ຈັດຂື້ນ ເພື່ອໃຫ້ສອດຄ່ອງຕາມແຜນ CSR ຂອງ ລາວ ໂທລະຄົມ ໃນປີ 2022 ທີ່ເນັ້ນໃສ່ໃຫ້ການຊ່ວຍ ເຫຼືອດ້ານວຽກງານການສຶກ ໂດຍສະເພາະຄັ້ງນີ້ ເປັນການເປີດໂອກາດໃຫ້ກັບນ້ອງໆນັກຮຽນໂຮງຮຽນຂອງລັດ ໃນເຂດຊານ ເມືອງ ໄດ້ມີໂອກາດສໍາພັດການຮຽນຮູ້ນອກຫ້ອງຮຽນ ເພື່ອສ້າງປະສົບການໃໝ່ ແລະ ສ້າງຈິນຕະນາການໃໝ່ໃນການຮຽນຮູ້ ໃຫ້ກັບເຂົາເຈົ້າເພື່ອນໍາໄປນໍາໃຊ້ໃນການຮຽນໃນຫ້ອງຮຽນຕົວຈິງ ແລະ ຖ່າຍທອດປະສົບການຕໍ່ໃຫ້ກັບໝູ່ເພື່ອນ ແລະ ລຸ່ນນ້ອງຕໍ່ໆໄປ. ກິດຈະກໍາຄັ້ງຍັງເປັນການສ້າງຂະບວນການຕ້ອນຮັບວັນເດັກ ນ້ອຍສາກົນ ວັນທີ 1 ມິຖຸນາ 2022. ເຊິ່ງຫົວຂໍ້ ທີ່ນໍາພານ້ອງໆໄປຮຽນຮູ້ແມ່ນກ່ຽວກັບ ຄວາມຮູ້ພື້ນຖານດ້ານດາລາສາດ ແລະ ອາວະກາດ, ການເບິ່ງດວງດາວ, ພ້ອມນີ້ຍັງມີກິດຈະກໍາ ການແຕ້ມຮູບລະບາຍສີ ແລະ ທົດລອງຈະຫຼວດນ້ອຍ. ນໍາສະເໜີໂດຍທີມງານວິຊາການທີ່ມີຄວາມຮູ້ ແລະ ປະສົບການ ຂອງ The Makerbox Lao ທີ່ເປັນຄູ່ຮ່ວມມືຂອງ ລາວ ໂທລະຄົມ. ບັນຍາກາດເຕັມໄປດ້ວຍຄວາມມ່ວນຊື່ນ ແລະ ມີເນື້ອຫາສາລະ ເຊິ່ງນ້ອງໆໄດ້ໃຫ້ຄວາມສົນໃຈ ຕັ້ງແຕ່ຕົ້ນຈົນຈົບກິດຈະກໍາ.
“ ລາວ ໂທລະຄົມ ໂທລະຄົມຂອງຄົນລາວ ເພື່ອສັງຄົມລາວ”
