ຕອນເຊົ້າວັນທີ 24 ພຶດສະພາ 2023, ທ່ານ ນາງ ທໍາມາ ເພັດວິໄຊ ຮອງປະທານຄະນະບໍລິຫານງານ ສສຍລ ພ້ອມຫົວໜ້າກົມຈັດຕັ້ງ-ພະນັກງານ ສສຍລ ເຂົ້າຮ່ວມພິທີປາຖະກະຖາ ພາຍໃຕ້ຫົວຂໍ້: ສະຖານະການຂອງໂລກ ແລະ ພາກພື້ນທີ່ມີຄວາມທ້າທາຍຕໍ່ນະໂຍບາຍຕ່າງປະເທດ ຂອງ ສປ ຈີນ ແລະ ການພົວພັນຮ່ວມມືໃນເງື່ອນໄຂປັດຈຸບັນ ຈັດຂຶ້ນທີ່ຄະນະໂຄສະນາອົບຮົມສູນກາງພັກ.
ໃນພິທີ ທ່ານ ຈຽງໄຈ ຕົ່ງ ເອກອັກຄະລັດຖະທູດ ຜູ້ມີອຳນາດເຕັມ ສປ ຈີນ ປະຈຳ ສປປ ລາວ ໄດ້ນຳເໜີສະຖານະການພາກພື້ນ ແລະ ສາກົນໃນປັດຈຸບັນ, ນະໂຍບາຍການຕ່າງປະເທດຂອງຈີນ ແລະ ການພັດທະນາສາຍພົວພັນລະຫວ່າງລາວ-ຈີນ ພາຍໃຕ້ຫົວຂໍ້: ວຽກງານການຕ່າງປະເທດຈີນໄດ້ເພີ່ມຄວາມແນ່ນອນຕື່ມເຂົ້າໃນໂລກທີ່ບໍ່ແນ່ນອນ, ຈີນ ແລະ ລາວ ຮ່ວມກັນສ້າງປະຊາຄົມຮ່ວມຊາຕາກຳຂອງມວນມະນຸດເປັນແບບຢ່າງໆຕັ້ງໜ້າ. ພ້ອມດຽວກັນນີ້ທ່ານໄດ້ຍົກໃຫ້ເຫັນຫຼາຍຫົວຂໍ້ທີ່ສຳຄັນຄືດັ່ງນີ້:
I. ການປ່ຽນແປງຂອງໂລກ
II. ການຟື້ນຟູເສດຖະກິດໂລກມີຄວາມຍາກລຳບາກ, ຊ່ອງວ່າງການພັດທະນາມີການຂະຫຍາຍຢ່າງຕໍ່ເນື່ອງ.
III. ມະຫາອຳນາດບາງປະເທດສ້າງຄວາມປະທະກັນ, ເຮັດໃຫ້ສະຖານະພາບວຸ້ນວາຍ, ມັນສະແດງໃຫ້ເຫັນຢ່າງຊັດເຈນຂອງວິກິດການທີ່ເກີດຂຶ້ນ.
ນອກຈາກນີ້ທ່ານໄດ້ຍົກໃຫ້ເຫັນເຖິງດ້ານນະໂຍບາຍຂອງປະເທດຈີນກັບລາວ ຮ່ວມມືກັນຮັບມືກັບສະຖານະການປ່ຽນແປງຂອງສາກົນເຊິ່ງຍາມໃດຈີນ-ລາວ ກໍ່ໄດ້ຍຶດໝັ້ນຄວາມສາມັກຄີ, ຊ່ວຍເຫຼືອເຊິ່ງກັນແລະກັນ; ສ້າງຈິດສຳນຶກຄູ່ຮ່ວມຊະຕາກຳລາວ-ຈີນ ຢ່າງໜັກແໜ້ນ, ຍຶດໝັ້ນການນຳພາຂອງພັກ ແລະ ທິດທາງສັງຄົມນິຍົມແມ່ນລັກສະນະທາດແທ້ຂອງສາຍພົວພັນລາວ-ຈີນ; ຮັບປະກັນໃຫ້ສາຍພົວພັນສອງຝ່າຍບໍ່ປ່ຽນທິດທາງແລະຮັກສາຄວາມວ່ອງໄວ; ລົງເລິກການແລກປ່ຽນບົດຮຽນທາງດ້ານການຄຸ້ມຄອງພັກ ແລະ ບໍລິຫານລັດ ເປັນມາດຕະການສຳຄັນຂອງການເພີ່ມທະວີຄວາມສາມັກຄີ, ເພີ່ມທະວີການແລກປ່ຽນບົດຮຽນທາງດ້ານການກໍ່ສ້າງພັກ, ຕ້ານການສໍ້ລາດບັງຫຼວງ, ການປະຕິຮູບດ້ານການເງິນ ແລະ ຂົງເຂດອື່ນໆຢ່າງເປັນປະຈຳ ແລະ ຍົກສູງການແລກປ່ຽນບົດຮຽນຢ່າງບໍ່ຢຸດຢັ້ງ.
