ຕິດຕາມ, ຊຸກຍູ້ວຽກງານການສ້າງພະນັກງານນໍາພາ-ຄຸ້ມຄອງເພດຍິງ

Mar 14, 2024 | ຂ່າວສານ ແລະ ກິດຈະກຳ

ວັນທີ 13 ມີນາ 2024 ທ່ານ ນ. ສິລິກິດ ບຸບຜາ ຮອງປະທານຄະນະບໍລິຫານງານ ສສຍລ ພ້ອມດ້ວຍຄະນະ ໄດ້ລົງເຄື່ອນໄຫວເຮັດວຽກຮ່ວມກັບສະຫະພັນແມ່ຍິງກະຊວງພະລັງງານ ແລະ ບໍ່ແຮ່. ໂອກາດນີ້ໄດ້ເຂົ້າພົບ ທ່ານ ໂພໄຊ ໄຊຍະສອນ ເລຂາຄະນະພັກ ລັດຖະມົນຕີກະຊວງພະລັງງານ ແລະ ບໍ່ແຮ່ ເພື່ອລາຍງານຈຸດປະສົງໃນການລົງເຄື່ອນໄຫວວຽກງານຄັ້ງນີ້ ໂດຍສະເພາະເພື່ອຕິດຕາມ, ຊຸກຍູ້ວຽກງານການສ້າງພະນັກງານນໍາພາ-ຄຸ້ມຄອງເພດຍິງ ແລະ ການກະກຽມກອງປະຊຸມໃຫຍ່ສະຫະພັນແມ່ຍິງລາວ ຕິດພັນກັບການກະກຽມດຳເນີນກອງປະຊຸມໃຫຍ່ 03 ຂັ້ນ ຂອງພັກ ໃຫ້ບັນລຸຕາມແຜນທີ່ວາງໄວ້; ພ້ອມດຽວກັນນີ້ ກໍໄດ້ເຮັດວຽກຮ່ວມກັບທ່ານ ທອງພັດ ອິນທະວົງ ຮອງເລຂາຄະນະພັກ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ເຊິ່ງໄດ້ປຶກສາຫາລື ແລະ ແລກປ່ຽນບົດຮຽນຕໍ່ກັບວຽກງານແຜນກຳນົດພະນັກງານນຳພາ-ຄຸ້ມຄອງເພດຍິງ ເຊິ່ງໃນໄລຍະຜ່ານມາເອື້ອຍນ້ອງແມ່ຍິງໄດ້ບັນຈຸຊັບຊ້ອນເຂົ້າໃນຕໍາແໜ່ງນໍາພາ-ຄຸ້ມຄອງຕາມຄວາມເໝາະສົມ ພ້ອມນີ້ຄະນະພັກຄະນະນຳກໍໄດ້ເອົາໃຈໃສ່ຊຸກຍູ້ສົ່ງເສີມເອື້ອຍນ້ອງແມ່ຍິງພາຍໃນກະຊວງເອົາໃຈໃສ່ພັດທະນາຕົນເອງຢ່າງຮອບດ້ານໃຫ້ມີຄວາມຮູ້ຄວາມສາມາດຄຽງຄູ່ກັບເພດຊາຍ ແລະ ສາມາດບັນຈຸເຂົ້າໃນຕຳແໜ່ງນຳພາຕັດສິນບັນຫານັບມື້ມີຈຳນວນເພີ່ມຂຶ້ນ.
ຫຼັງຈາກນັ້ນ, ທ່ານຮອງປະທານ ສສຍລ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມຕິດຕາມ, ຊຸກຍູ້ວຽກງານການສ້າງພະນັກງານນຳພາ-ຄຸ້ມຄອງເພດຍິງ ແລະ ຮັບຟັງການກະກຽມກອງປະຊຸມໃຫຍ່ສະຫະພັນແມ່ຍິງ ແລະ ແລກປ່ຽນວຽກງານຮອບດ້ານຂອງສະຫະພັນແມ່ຍິງ ກະຊວງພະລັງງານ ແລະ ບໍ່ແຮ່ ແລະ ວຽກງານການກະກຽມດຳເນີນກອງປະຊຸມໃຫຍ່ຂອງກະຊວງ ຈາກທ່ານ ນາງ ແສງເດືອນ ວົງອິນ ຄະນະບໍລິຫານງານສູນກາງສະຫະພັນແມ່ຍິງລາວ ປະທານສະຫະພັນແມ່ຍິງ ກະຊວງພະລັງງານ ແລະ ບໍ່ແຮ່ ພ້ອມທັງແລກປ່ຽນບົດຮຽນເຊິ່ງກັນ ແລະ ກັນຢ່າງກົງໄປກົງມາ ເພື່ອພ້ອມກັນຈັດຕັ້ງປະຕິບັດວຽກງານໃຫ້ບັນລຸຕາມຄາດໝາຍທີ່ວາງໄວ້.