ວັນທີ 01 ເມສາ 2024, ທ່ານ ນ. ທຳມາ ເພັດວິໄຊ ຮອງເລຂາຄະນະພັກ, ຮອງປະທານຄະນະບໍລິຫານງານ ສສຍລ ພ້ອມດ້ວຍຄະນະຮັບຜິດຊອບ ໄດ້ລົງເຄື່ອນໄຫວເຮັດວຽກຮ່ວມກັບສະຫະພັນແມ່ຍິງ ກະຊວງອຸດສາຫະກຳ ແລະ ການຄ້າ. ໂອກາດນີ້ໄດ້ເຂົ້າພົບ ທ່ານ ມະໄລທອງ ກົມມະສິດ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ເພື່ອລາຍງານຈຸດປະສົງໃນການເຄື່ອນໄຫວວຽກງານຄັ້ງນີ້ ໂດຍສະເພາະເພື່ອຕິດຕາມ, ຊຸກຍູ້ວຽກງານການສ້າງພະນັກງານນໍາພາ-ຄຸ້ມຄອງເພດຍິງ ແລະ ການກະກຽມກອງປະຊຸມໃຫຍ່ສະຫະພັນແມ່ຍິງລາວ ຕິດພັນກັບການກະກຽມດຳເນີນກອງປະຊຸມໃຫຍ່ 03 ຂັ້ນ ຂອງພັກ ໃຫ້ບັນລຸຕາມແຜນທີ່ວາງໄວ້; ພ້ອມດຽວກັນນີ້ ໄດ້ເຮັດວຽກຮ່ວມກັບ ທ່ານ ນ. ຈັນສຸກ ແສງພະຈັນ ຮອງເລຂາຄະນະບໍລິຫານງານພັກ, ຮອງລັດຖະມົນຕີ, ຜູ້ຊີ້ນໍາວຽກງານ ຈັດຕັ້ງ-ພະນັກງານ ຮ່ວມປຶກສາຫາລື ແລະ ແລກປ່ຽນບົດຮຽນຕໍ່ກັບວຽກງານແຜນກຳນົດພະນັກງານນຳພາ-ຄຸ້ມຄອງເພດຍິງ. ໃນໄລຍະຜ່ານມາເອື້ອຍນ້ອງແມ່ຍິງໄດ້ບັນຈຸຊັບຊ້ອນເຂົ້າໃນຕໍາແໜ່ງນໍາພາ-ຄຸ້ມຄອງຕາມຄວາມເໝາະສົມ ພ້ອມນີ້ຄະນະພັກຄະນະນຳກໍໄດ້ເອົາໃຈໃສ່ຊຸກຍູ້ສົ່ງເສີມເອື້ອຍນ້ອງແມ່ຍິງພາຍໃນກະຊວງເອົາໃຈໃສ່ພັດທະນາຕົນເອງຢ່າງຮອບດ້ານໃຫ້ມີຄວາມຮູ້ຄວາມສາມາດຄຽງຄູ່ກັບເພດຊາຍ ແລະ ສາມາດບັນຈຸເຂົ້າໃນຕຳແໜ່ງນຳພາຕັດສິນບັນຫານັບມື້ມີຈຳນວນເພີ່ມຂຶ້ນ.
ຫຼັງຈາກນັ້ນ, ທ່ານຮອງປະທານ ສສຍລ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມຕິດຕາມ, ຊຸກຍູ້ວຽກງານການສ້າງພະນັກງານນຳພາ-ຄຸ້ມຄອງເພດຍິງ ແລະ ຮັບຟັງການກະກຽມກອງປະຊຸມໃຫຍ່ສະຫະພັນແມ່ຍິງ ແລະ ແລກປ່ຽນວຽກງານຮອບດ້ານຂອງສະຫະພັນແມ່ຍິງ ກະຊວງອຸດສາຫະກໍາ ແລະ ການຄ້າ ແລະ ວຽກງານການກະກຽມດຳເນີນກອງປະຊຸມໃຫຍ່ ຈາກທ່ານ ນ. ສົມໝາຍ ພົມມຸນີວົງ ຄະນະບໍລິຫານງານສູນກາງສະຫະພັນແມ່ຍິງລາວ ປະທານສະຫະພັນແມ່ຍິງ ກະຊວງ ອຸດສາຫະກຳ ແລະ ການຄ້າ ພ້ອມທັງແລກປ່ຽນບົດຮຽນເຊິ່ງກັນ ແລະ ກັນຢ່າງກົງໄປກົງມາ ເພື່ອພ້ອມກັນຈັດຕັ້ງປະຕິບັດວຽກງານໃຫ້ບັນລຸຕາມຄາດໝາຍທີ່ວາງໄວ້.
