ວັນທີ 20 ມິຖຸນາ 2023 ສູນກາງສະຫະພັນແມ່ຍິງລາວຮ່ວມກັບອົງການ UNICEF ແລະ ສະຫະພັນແມ່ຍິງແຂວງ ຊຽງຂວາງ ຈັດກິດຈະກຳໂຄສະນາເຜີຍແຜ່ໃຫ້ປະຊາຊົນ ໄດ້ຮັບການສັກ ຢາວັກຊິນປ້ອງກັນໂຄວິດ-19 ຢູ່ເມືອງພູກູດ ແຂວງຊຽງຂວາງ ໂດຍເປັນປະທານຮ່ວມຂອງ ທ່ານ ນ. ລາວັນ ສຸດທິສານ ຮອງປະທານຄະນະບໍລິຫານງານ ສສຍລ; ທ່ານ ນ. ຈັນທະສອນ ພູນສຸກ ປະທານສະຫະພັນແມ່ຍິງ ແຂວງຊຽງຂວາງ; ທ່ານ ປອ ນ. ນິນປະເສີດ ໄຊຍະພອນສີ ຫົວໜ້າກົມພັດທະນາແມ່ຍິງລາວ ສສຍລ; ທ່ານ ອຳຄາ ບຸນມາປັນຍາວົງ ຮອງເລຂາພັກເມືອງ ເມືອງພູກູດ; ທ່ານ ບຸນມີ ສີປະເສີດ ນາຍບ້ານໆລັ້ງຈອງ; ມີບັນດາປະທານ ສຍ ເມືອງພູກູດ, ພະແນກສາທາແຂວງ, ສາທາເມືອງ ແລະ ພໍ່ແມ່ປະຊາຊົນເຂົ້າຮ່ວມຢ່າງພ້ອມພຽງ.
ການຈັດກິດຈະກຳຄັ້ງນີ້ເພື່ອສົ່ງເສີມການປ້ອງກັນການແຜ່ລະບາດຂອງເຊື້ອພະຍາດຕາມລະດູການ ເວົ້າລວມ ເວົ້າສະເພາະແມ່ນພະຍາດ ໂຄວິດ-19 ເຊິ່ງໃນໄລຍະຜ່ານມາ ສູນກາງສະຫະພັນແມ່ຍິງລາວ ໄດ້ປະກອບສ່ວນຮ່ວມກັບກະຊວງສາທາລະນະສຸກ ໃນການປຸກລະດົມ, ໂຄສະນາ ໃຫ້ຊຸມຊົນມາຮັບການບໍລິການສັກຢາວັກຊີນໂຄວິດ-19 ໃຫ້ມີອັດຕາການສັກຢາບັນລຸຕາມຄາດໝາຍ ໃນຈຳນວນ 30 ເມືອງ ຂອງ 12 ແຂວງ ເຊິ່ງໃນນີ້ ສູນກາງສະຫະພັນແມ່ຍິງລາວ ຮັບຜິດຊອບໃນການຈັດຕັ້ງປະຕິບັດກິດຈະກຳດັ່ງກ່າວ ຈຳນວນ 15 ເມືອງ ຂອງ 7 ແຂວງ ຄື: ເມືອງໝື່ນ ແຂວງວຽງຈັນ; ເມືອງຮົ່ມ ແຂວງໄຊສົມບູນ; ເມືອງຜາໄຊ, ເມືອງໜອງແຮດ, ເມືອງຄຳ, ເມືອງພູກູດ ແຂວງຊຽງຂວາງ; ເມືອງນອງ, ເມືອງຈຳພອນ, ໄຊບູລີ, ເຊໂປນ ແຂວງສະຫວັນນະເຂດ; ເມືອງໄຊສະຖານ, ເມືອງຊຽງຮ່ອນ ແຂວງໄຊຍະບູລີ; ເມືອງສະໜາມໄຊ ແຂວງອັດຕະປື; ເມືອງຍົມມະລາດ, ນາກາຍ, ແຂວງຄຳມ່ວນ. ພ້ອມດຽວກັນນີ້ຫຼາຍພາກສ່ວນຍັງໄດ້ມອບອຸປະກອນປ້ອງກັນໂຄວິດ-19 ແລະ ໄດ້ສ້າງອາສາສະໝັກຂັ້ນບ້ານ(ອສບ) ໃນຊຸມຊົນ ເພື່ອເຮັດໜ້າທີ່ໃນການໂຄສະນາເຄື່ອນທີ່ໃນຊຸມຊົນທີ່ຢູ່ຫ່າງໄກສອກຫຼີກ, ການໃຫ້ຂໍ້ມູນຂ່າວສານ, ໂຄສະນາວິທີປ້ອງກັນຕົນເອງ, ຄອບຄົວ ໃຫ້ຮູ້ເຖິງໄພອັນຕະລາຍ ແລະ ຄວາມສ່ຽງໃນການຕິດເຊື້ອພະຍາດ COVID-19. ດັ່ງນັ້ນ, ການຈັດກິດຈະກຳໂຄສະນາເຜີຍແຜ່ໃນຄັ້ງນີ້ ເພື່ອຊຸກຍູ້ໃຫ້ຂໍ້ມູນການກະຕຸ້ນຄືນການສັກຢາປ້ອງກັນເຊື້ອພະຍາດໂຄວິດ-19 ພ້ອມທັງໃຫ້ຄວາມຮູ້ທາງດ້ານການປ້ອງກັນ ແລະ ຮັກສາສຸຂະພາບ ເພື່ອໃຫ້ທຸກຄົນໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງກ່ຽວກັບການສັກຢາກັນພະຍາດແມ່ນເປັນເລື່ອງທີ່ດີ, ອີງໃສ່ນະໂຍບາຍຂອງພັກ-ລັດ ຍາມໃດເພິ່ນກໍ່ເປັນຫ່ວງໃນການດຳລົງຊີວິດຂອງປະຊາຊົນ ແລະ ສູນກາງສະຫະພັນແມ່ຍິງລາວ ກໍ່ໄດ້ເຮັດໜ້າທີ່ຕາມພາລະບົດບາດ ເພື່ອໃຫ້ຊຸມຊົນ ເວົ້າລວມ ເວົ້າສະເພາະ ແມ່ນເພດຍິງ ແລະ ເດັກ ສາມາດເຂົ້າເຖິງການບໍລິການສາທາລະນະສຸກຂັ້ນພື້ນຖານ. ນອກຈາກຜູ້ເຂົ້າຮ່ວມໄດ້ຮັບການບໍລິການສັກຢາປ້ອງກັນພະຍາດ ໂຄວິດ-19 ແລ້ວ ຍັງໄດ້ຮັບຟັງຂໍ້ມູນການລ້າງມືໃສ່ສະບູທີ່ຖືກຕ້ອງ; ການສາທິດການລ້າງມືໃສ່ສະບູ ແລະ ຮັບການແຈກຢາຍສະບູ ເພື່ອໄປນຳໃຊ້ໃນຄົວເຮືອນ ແລະ ສົ່ງເສີມໂພຊະນາການໃຫ້ທຸກຄົນມີສຸຂະພາບທີ່ສົມບູນແຂງແຮງນຳຕື່ມອີກ.
(ການຈັດກິດຈະກຳຄັ້ງນີ້ຈັດຂຶ້ນຢູ່ທີ່ ບ້ານລັ້ງຈອງ ເມືອງພູກູດ ແຂວງຊຽງຂວາງ ເຊິ່ງໄດ້ຮັບການສະໜັບສະໜູນໂດຍ: Australian Aid ແລະ ອົງການ ອຸຍນີເຊັບ UNICEF)
