ຄະນະ ສຍ ຈໍານວນ 15 ທ່ານ ໄດ້ຮັບການຍົກລະດັບວຽກງານແມ່ຍິງ
ຊຸດຝຶກອົບຮົມວຽກງານແມ່ຍິງ ໄລຍະ 2 ເດືອນ ປະຈໍາປີ 2023 ທີ່ ສສ ຫວຽດນາມ. ໄດ້ດໍາເນີນມາແຕ່ວັນທີ 10 ກັນຍາ ແລະ ໄດ້ປິດລົງໃນວັນທີ 3 ພະຈິກ 2023. ຊຸດຝຶກອົບຮົມຄັ້ງນີ້ມີຄະນະສະຫະພັນແມ່ຍິງຈາກບັນດາ ກະຊວງ-ອົງການ ຈໍານວນ 11 ພາກ ສ່ວນ (ສຍ ສະຖາບັນການເມືອງການປົກຄອງແຫ່ງຊາດ, ສຍ ຄະນະໂຄສະນາອົບຮົມ, ສຍ ແນວລາວສ້າງຊາດ, ສຍ ສູນກາງສະຫະພັນກໍາມະບານ, ສຍ ສູນກາງຊາວໜຸ່ມ ປະຊາຊົນປະຕິວັດລາວ, ສຍ ສະຫະພັນນັກຮົບເກົ່າແຫ່ງຊາດ, ສຍ ສູນກາງສະຫະພັນແມ່ຍິງລາວ, ສຍ ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ, ສຍ ກະຊວງພະລັງງານ ແລະ ບໍ່ແຮ່ ແລະ ສຍ ກະຊວງອຸດສາຫະກໍາ ແລະ ການຄ້າ ລວມທັງໝົດ 15 ທ່ານເຂົ້າຮ່ວມ.
ເນື້ອໃນບົດຮຽນຂອງການຝຶກອົບຮົມຄັ້ງນີ້ ປະກອບມີ 24 ບົດ, 4 ຫົວຂໍ້ສະເພາະ ແລະ ພາສາຫວຽດນາມ ເປັນຕົ້ນ: ແນວຄິດໂຮ່ຈິມີນ, ທັດສະນະລວມຂອງພັກຄອມມູນິດຫວຽດນາມ ແລະ ນະໂຍບາຍຂອງລັດກ່ຽວກັບວຽກງານແມ່ຍິງໃນແຕ່ລະໄລຍະ; ພັດທະນາສາຍພົວພັນມິດຕະພາບສາມັກຄີສະໜິດຕິດແໜ້ນລະຫວ່າງຫວຽດນາມ ແລະ ລາວ, ຂໍ້ຕົກລົງລະຫວ່າງສອງສະຫະພັນແມ່ຍິງໃນໄລຍະໃໝ່; ຍຸດທະສາດການພັດທະນາການຈັດຕັ້ງສະຫະພັນແມ່ຍິງຫວຽດນາມ; ທັກສະວິໄຈກ່ຽວກັບເພດ ແລະ ການສື່ສານກ່ຽວກັບເພດ; ວັດທະນະທຳອັນເປັນມູນເຊື້ອຂອງຫວຽດ ນາມ; ການສະກັດກັ້ນ ແລະ ຕ້ານຄວາມຮຸນແຮງບົນພື້ນຖານທາງເພດ; ທິດສະດີ ແລະ ພຶດຕິກຳຢູ່ຫວຽດນາມ ແລະ ລາວ; ແນະນຳລວມກ່ຽວກັບສະຫະພັນແມ່ຍິງຫວຽດນາມ; ເສີມຂະຫຍາຍບົດບາດ ຂອງສະຫະພັນແມ່ຍິງຫວຽດນາມ ໃນການເຂົ້າຮ່ວມຄຸ້ມຄອງລັດ; ສ້າງແມ່ຍິງໃຫ້ສະໜອງໄດ້ຕາມຄວາມຮຽກຮ້ອງການຂອງຍຸກສະໄໝໃໝ່; ໜູນຊ່ວຍ ຍົກສູງອຳນາດ ແລະ ຄວາມສາມາດທາງດ້ານເສດຖະກິດ ໃຫ້ແກ່ແມ່ຍິງໃນສະພາບການປະຕິວັດອຸດສະຫະກຳຄັ້ງທີ 4 (4.0); ສ້າງການຈັດຕັ້ງສະຫະພັນແມ່ຍິງຫວຽດນາມເຂັ້ມແຂງໃນສະພາບການໃໝ່; ວຽກງານຕິດຕາມສ່ອງແສງສັງຄົມກ່ຽວກັບບັນດາຫົວຂໍ້ ທີ່ກ່ຽວພັນເຖິງແມ່ຍິງ, ຄອບຄົວ, ເດັກນ້ອຍ ແລະ ສະເໝີ ພາບຍິງ-ຊາຍ; ສ້າງຄອບຄົວອີ່ມໜໍ່າສຳລານ, ຜາສຸກ,ກ້າວໜ້າ, ສີວິໄລ, ສ້າງສະພາບແວດລ້ອມປອດໄພໃຫ້ແກ່ແມ່ຍິງ ແລະ ເດັກນ້ອຍ; ບົດຮຽນກ່ຽວກັບການແກ້ໄຂບັນດາເລື່ອງລະເມີດສິດຂອງແມ່ຍິງ ແລະ ເດັກນ້ອຍ; ແນະນຳກ່ຽວກັບກົດໝາຍວ່າດ້ວຍສະຫະກອນຢູ່ຫວຽດນາມ ແລະ ໂຄງການຊ່ວຍເຫຼືອສະຫະກອນທີ່ແມ່ຍິງມີສ່ວນຮ່ວມໃນການຄຸ້ມຄອງ, ສ້າງວຽກເຮັດງານທຳໃຫ້ແກ່ແມ່ຍິງ ຮອດປີ 2030; ວຽກງານການຕ່າງປະເທດ ແລະ ເຊື່ອມໂຍງສາກົນ ຂອງສະຫະພັນແມ່ຍິງຫວຽດນາມ; ວຽກງານໂຄສະນາ, ປຸກລະດົມຂົນຂວາຍ ຂອງສະຫະພັນແມ່ຍິງຫວຽດນາມ; ວຽກງານພະນັກງານເພດຍິງ ຂອງສະຫະພັນແມ່ຍິງຫວຽດນາມ ແລະ ສະຫະພັນແມ່ຍິງລາວ; ສັງລວມກ່ຽວກັບການນຳພາ-ຄຸ້ມຄອງ; ທັກສະການຂົນຂວາຍນະໂຍບາຍ ເສນາທິການ,ນຳສະເໜີເນື້ອໃນທີ່ກ່ຽວພັນເຖິງຄວາມສະເໝີພາບຍິງ-ຊາຍ ແລະ ຄວາມກ້າວໜ້າຂອງແມ່ຍິງ; ວຽກງານພິທີການທູດ; ທັກສະການລາຍງານຊວນເຊື່ອ; ນຳພາການປ່ຽນແປງຢູ່ໃນການຈັດຕັ້ງ; ການສື່ສານໃນສັງຄົມອອນລາຍ; ທັກສະມະນຸດສຳພັນ, ການປະພຶດ ກັບ ການສື່ສານ; ສ້າງຈຸດໝາຍ, ວິໄສທັດໃຫ້ແກ່ການຈັດຕັ້ງ ຂອງຜູ້ນຳພາ; ພັດທະນາຈິນຕະການ ຂອງພະນັກງານນຳພາເພດຍິງ ແລະ ທັກສະການອອກມະຕິຕົກລົງ ຂອງຜູ້ນຳພາຢ່າງມີປະສິດທິຜົນ ໂດຍຜ່ານການຖ່າຍທອດຄວາມຮູ້ຂອງວິທະຍາກອນທີ່ມີຄວາມຮູ້ ຄວາມສາມາດ ແລະ ມີປະສົບການສູງ ໃນແຕ່ລະດ້ານ ເຮັດໃຫ້ສໍາມະນາກອນ ສາມາດກໍາໄດ້ບາງບົດຮຽນດັ່ງນີ້:
1) ບັນດາແນວທາງນະໂຍບາຍຂອງພັກ ແລະ ນິຕິກໍາຕ່າງໆຂອງລັດຖະບານ ສສ ຫວຽດນາມໃນແຕ່ລະໄລຍະ
ໄດ້ກໍານົດຈະແຈ້ງກ່ຽວກັບວຽກງານແມ່ຍິງ; ສູນກາງສະຫະພັນແມ່ຍິງຫວຽດນາມໄດ້ເປັນເຈົ້າການວາງຄາດໝາຍສູ້ຊົນໃນການຈັດຕັ້ງ ແລະ ເຄື່ອນໄຫວໃນແຕ່ລະໄລຍະຕາມພາລະບົດບາດ ແລະ ໜ້າທີ່ຄວາມຮັບຜິດຊອບຂອງຕົນ;
2) ສະຫະພັນແມ່ຍິງຫວຽດນາມໄດ້ເອົາໃຈໃສ່ໃນການບໍາລຸງ-ສ້າງ, ພັດທະນາບຸກຄະລາກອນ ເພື່ອກໍ່ສ້າງ
ການຈັດຕັ້ງສະຫະພັນແມ່ຍິງຫວຽດນາມໃຫ້ມີຄວາມເຂັ້ມແຂງ ແລະ ສາມາດຕອບສະໜອງຕາມຄວາຮຽກຮ້ອງຕ້ອງ ການໃນໄລຍະໃໝ່.
3) ການຫັນເປັນດິຈິຕອນ ແລະ ທັນສະໄໝ ເຂົ້າໃນການເຄື່ອນໄຫວວຽກງານສະຫະພັນແມ່ຍິງໃນແຕ່ລະຂັ້ນ ເປັນຕົ້ນ ວຽກງານໂຄສະນາ, ປຸກລະດົມຂົນຂວາຍ ຊຶ່ງສູນກາງສະຫະພັນແມ່ຍິງຫວຽດນາມ ໄດ້ສ້າງ ແລະນໍາໃຊ້ ຊອບແວ ແລະ ສື່ສັງຄົມອອນລາຍ ເພື່ອຊ່ວຍກາຈາຍຂໍ້ມູນຂ່າວສານເຮັດໃຫ້ວຽກງານແມ່ຍິງມີຄວາມສະດວກ ແລະ ວ່ອງໄວ
4) ສະຫະພັນແມ່ຍິງຫວຽດນາມ ໄດ້ຮັບການມອບໝາຍໂດຍກົງຈາກລັດຖະບານ ເປັນໃຈກາງໃນການສ້າງຊົນນະບົດແບບໃໝ່ ແລະ ວຽກງານປຸກລະດົມຂົນຂວາຍ ໂດຍເລີ່ມຈາກການຊຸກຍູ້-ສົ່ງເສີມໃຫ້ແມ່ຍິງຍົກສູງຄວາມອາດສາມາດທາງດ້ານເສດຖະກິດ ໃນເງື່ອນໄຂຂອງການປະຕິວັດອຸດສາຫະກໍາ 4.0 ໄປຄຽງຄູ່ກັບການຂະຫຍາຍ ແລະ ຍົກສູງຄຸນນະພາບການດໍາເນີນງານຂອງສະຖາບັນການເງິນຈຸລະພາກ (TYM) ບວກກັບການຂົນຂວາຍບັນດາທະນາຄານຕ່າງໆໃຫ້ສະໜັບສະໜູນທຶນ ແລະ ສ້າງເປັນເຄືອຂ່າຍດ້ານວິຊາການ ທາງການເງິນໄດ້ຢ່າງກວ້າງຂວາງ;
5) ສະຫະພັນແມ່ຍິງຫວຽດນາມ ຍັງມີສະມາຄົມນັກປັນຍາຊົນເພດຍິງ ຊ່ວຍຄົ້ນຄ້ວາ ແລະ ໃຫ້ຄໍາປຶກສາແກ່ແມ່ຍິງແຕ່ລະຂັ້ນ ກ່ຽວກັບບັນດາບັນຫາ ທີ່ແມ່ຍິງມີຄວາມສົນໃຈ.
ນອກຈາກນີ້, ສະຫະພັນແມ່ຍິງລາວ ແລະ ສະຫະພັນແມ່ຍິງຫວຽດນາມ ໄດ້ແລກປ່ຽນບົດຮຽນ ພາຍໃຕ້ຫົວຂໍ້: ສະພາບຄວາມເປັນຈິງຂອງພະນັກງານນໍາພາ-ຄຸ້ມຄອງເພດຍິງ ຢູ່ ສປປ ລາວ ແລະ ວຽກງານພະນັກງານເພດຍິງຂອງສະຫະພັນແມ່ຍິງລາວ.
ນອກຈາກຄົ້ນຄວ້າຮໍ່າຮຽນທາງດ້ານພາກທິດສະດີ ແລະ ແລກປ່ຽນບົດຮຽນໃນຫ້ອງຮຽນແລ້ວ ສໍາມະນາກອນຍັງໄດ້ເຂົ້າຮ່ວມງານສໍາຄັນຕ່າງໆຂອງສູນກາງສະຫະພັນແມ່ຍິງຫວຽດນາມຈັດຂຶ້ນ ເປັນຕົ້ນ: ພິທີເປີດສົກຮຽນໃໝ່ ປະຈໍາສົກ ປີ 2023-2024, ຢ້ຽມຂໍ່ານັບການນໍາສະຫະພັນແມ່ຍິງຫວຽດນາມ, ຢ້ຽມຂໍ່ານັບເອກຄັກຄະລັດສະທູດຜູ້ມີອໍານາດເຕັມແຫ່ງ ສປປ ລາວ ປະຈໍາ ສສ ຫວຽດນາມ, ຮ່ວມພິທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງຫວຽດນາມ ຄົບຮອບ 93 ປີ, ພິທີມອບລາງວັນດີເດັ່ນໃຫ້ແກ່ແມ່ຍິງເລີ່ມເຮັດທຸລະກິດປະຈໍາປີ 2023 (start up), ພິທີມອບລາງວັນສໍາລັບສະຫະພັນແມ່ຍິງຂັ້ນຮາກຖານນຳພາດີເດັ່ນ ປະຈໍາປີ 2023, ກິດຈະກຳໃນການແລກປ່ຽນວັດທະນະທໍາທາງດ້ານອາຫານ ແລະ ກິດຈະກຳອື່ນໆ ຂອງສະຖາບັນຈັດຂຶ້ນ. ຄະນະຮັບຜິດຊອບຊຸດຝຶກອົບຮົມ ຍັງໄດ້ນໍາພາຢ້ຽມຢາມສະຖານທີ່ສໍາຄັນຕ່າງໆ ແລະ ໄປທັດສະນະສຶກສາວຽກງານຕົວຈິງຢູ່ຂັ້ນທ້ອງຖິ່ນ ເປັນຕົ້ນ: ຢ້ຽມຢາມຫໍພິພິຕະພັນ ແລະ ສຸສານທ່ານ ປະທານໂຮ່ຈີມິນ, ສະພາແຫ່ງຊາດ, ຫໍພິພິຕະພັນມູນເຊື້ອສະຫະພັນແມ່ຍິງຫວຽດນາມ, ສູນພັດທະນາແມ່ຍິງຫວຽດນາມ (ເຮືອນແຫ່ງຄວາມສະຫງົບສຸກ), ຢ້ຽມຢາມຮູບແບບການສ້າງເສດຖະກິດຂອງບຸກຄົນ ແລະ ລວມໝູ່ ໂດຍແມ່ຍິງເປັນເຈົ້າຂອງ ຢູ່ແຂວງ ນິງບິງ; ຢ້ຽມຢາມ ແລະ ທັດສະນະສຶກສາແຫຼ່ງທ່ອງທ່ຽວ ສາປາແຂວງລາວກາຍ, ບ້ານວັດທະນະທຳຊົນເຜົ່າຂອງຫວຽດນາມ, ບໍລິສັດ Deloitte ແລະ ສະຖານທີ່ທ່ອງທ່ຽວທາງດ້ານປະຫວັດສາດ ແລະ ວັດທະນະທໍາ ຈໍານວນໜື່ງ.
ຜ່ານການຝຶກອົບຮົມໃນຄັ້ງນີ້ ສໍາມະນາກອນ ໄດ້ຮັບຮູ້ບົດຮຽນ ແລະ ປະສົບການທີ່ຫຼາກຫຼາຍ ກ່ຽວກັບການພັດທະນາວຽກງານສະຫະພັນແມ່ຍິງທີ່ເປັນລະບົບເຂັ້ມແຂງ ແລະ ເປັນມືອາຊີບ ໂດຍສະເພາະ ການນໍາພາ-ຄຸ້ມຄອງ; ການຍົກສູງອໍານາດ ແລະ ຄວາມອາດສາມາດທາງດ້ານເສດຖະກິດໃຫ້ແກ່ແມ່ຍິງ; ທັກສະການລາຍງານຊວນເຊື່ອ, ການ ປຸກລະດົມຂົນຂວາຍ; ການພັດທະນາຈິນຕະນາການພະນັກງານນໍາພາເພດຍິງ; ຮຽນຮູ້ວັດທະນະທໍາອັນເປັນມູນເຊື້ອຂອງສະຫະພັນແມ່ຍິງຫວຽດນາມ ແລະ ບົດຮຽນອື່ນໆ, ບັນດາບົດຮຽນເຫຼົ່ານີ້ ສໍາມະນາກອນ ຈະນໍາໄປໝູນໃຊ້ເຂົ້າໃນວຽກງານສະຫະພັນແມ່ຍິງທີ່ຕົນຮັບຜິດຊອບໃຫ້ເກີດປະໂຫຍດສູງສຸດ ເພື່ອປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດ.
