ໃນວັນທີ 28 ມີນາ 2023 ຄະນະຜູ້ແທນຂັ້ນສູງຂອງສູນກາງສະຫະພັນແມ່ຍິງລາວ (ສສຍລ) ນຳໂດຍ ທ່ານນາງ ອິນລາວັນ ແກ້ວບຸນພັນ ປະທານຄະນະບໍລິຫານງານ ສສຍລ ພ້ອມຄະນະ ແລະ ບັນດາທ່ານຜູ້ຕາງໜ້າອົງການ Oxfam ປະຈຳລາວ ໄດ້ເຂົ້າຮ່ວມກອງປະຊຸມປຶກສາຫາລືແລກປ່ຽນລະຫວ່າງກະຊວງແມ່ຍິງປະເທດກຳປູເຈຍ ແລະ ສູນກາງສະຫະພັນແມ່ຍິງລາວ ກ່ຽວກັບການສົ່ງເສີມວຽກງານເສດຖະກິດ, ວຽກງານດູແລ ແລະ ການສ້າງຄວາມເຂັ້ມແຂງໃຫ້ກັບແມ່ຍິງ ຈັດຂຶ້ນທີ່ລາຊະອະນາຈັກກຳປູເຈຍ, ຊຶ່ງມີ ທ່ານນາງ ກຸງ ໂຊລິຕະ (Koung Sorita) ຮອງລັດຖະມົນຕີຊ່ວຍກະຊວງແມ່ຍິງປະເທດກຳປູເຈຍ, ທ່ານນາງ ພຽນ ໂຊພວນ (Phean Sophoan) ຫົວໜ້າອົງການ Oxfam ປະຈຳກຳປູເຈຍ ແລະ ພາກສ່ວນກ່ຽວຂ້ອງເຂົ້າຮ່ວມ. ໃນວາລະກອງປະຊຸມ ຜູ້ເຂົ້າຮ່ວມໄດ້ຮັບຟັງການກ່າວຕ້ອນຮັບຈາກ ທ່ານນາງ ກຸງ ໂຊລິຕະ ຮອງລັດຖະມົນຕີຊ່ວຍກະຊວງແມ່ຍິງປະເທດກຳປູເຈຍ, ຫຼັງຈາກນັ້ນ ທ່ານນາງ ອິນລາວັນ ແກ້ວບຸນພັນ ປະທານຄະນະບໍລິຫານງານ ສສຍລ ໄດ້ມີຄຳເຫັນຕໍ່ກອງປະຊຸມ ທີ່ຍົກໃຫ້ເຫັນຈຸດປະສົງສຳຄັນຂອງການເຂົ້າຮ່ວມກອງປະຊຸມຄັ້ງນີ້ ຊຶ່ງເປັນພື້ນຖານໃຫ້ແກ່ການຜັນຂະຫຍາຍ ຄຳໝາຍໝັ້ນຂອງສະຫະພັນແມ່ຍິງລາວ ໃນນາມເປັນປະທານຄະນະກຳມະການແມ່ຍິງອາຊຽນ ( ASEAN Committee on Women ຫຼື ACW), ເປັນການແລກປ່ຽນບົດຮຽນຮ່ວມກັນ ເຊັ່ນ : ການຊອກຫາບັນດາປັດໄຈໃນການອໍານວຍຄວາມສະດວກ, ການປະຕິບັດໜ້າທີ່ວຽກງານທີ່ດີ ແລະ ປະສົບການຂອງ ປະເທດກໍາປູເຈຍ ໃນການເປັນປະທານຄະນະກໍາມະການອາຊຽນກ່ຽວກັບແມ່ຍິງ (ACW) ທີ່ຜ່ານມາ; ການຂັບເຄື່ອນເສດຖະກິດ, ການເບິ່ງແຍງ ແລະ ແຜນການປົກປ້ອງແມ່ຍິງ-ເດັກໃນສັງຄົມ, ການແລກປ່ຽນບົດຮຽນ ເພື່ອເປັນຊ່ອງທາງໃຫ້ແກ່ການກະກຽມກິດຈະກຳ, ສ້າງແຜນງານ-ໂຄງການທີ່ຈະໄປສູ່ການສົນທະນາ ໃນກອງປະຊຸມຄະນະກຳມະການແມ່ຍິງ ອາຊຽນ ຢູ່ ສປປ ລາວໃນຕໍ່ໜ້າ ແລະ ສາມາດນຳໄປຜັນຂະຫຍາຍໃນລະດັບປະເທດ, ການແລກປ່ຽນບົດຮຽນທີ່ດີ ໃນການສ້າງຄວາມເຂົ້າໃຈກ່ຽວກັບເສດຖະກິດ ທີ່ເອົາໃຈໃສ່ແມ່ຍິງຂອງກະຊວງແມ່ຍິງປະເທດກຳປູເຈຍໃຫ້ແກ່ສະຫະພັນແມ່ຍິງລາວ.
