ກິດຈະກຳການເຜີຍແຜ່ຄວາມຮູ້ໃຫ້ປະຊາຊົນ

ໃນຕອນເຊົ້າວັນທີ 30 ພຶດສະພາ 2023, ທ່ານ ນ. ອິນລາວັນ ແກ້ວບຸນພັນ ປະທານຄະນະບໍລິຫານງານ ສູນກາງສະຫະພັນແມ່ຍິງລາວ ພ້ອມຄະນະ ໄດ້ເຂົ້າຮ່ວມກິດຈະກຳການເຜີຍແຜ່ຄວາມຮູ້ໃຫ້ປະຊາຊົນເພື່ອປຸກລະດົມການຮັບວັກຊິນ ປ້ອງກັນການແຜ່ລະບາດຂອງພະຍາດໂຄວິດ-19 ໂດຍໄດ້ຮັບການສະໜັບສະໜູນຈາກອົງການ UNICEF ຢູ່ບ້ານແກ້ງກອກດົງ ເມືອງຈຳພອນ ແຂວງສະຫວັນນະເຂດ; ເຂົ້າຮ່ວມມີທ່ານ ນ. ວຽງສະໝອນ ພະພິທັກ ປະທານ ສຍແຂວງ, ທ່ານ ດວງຈັນ ວຽງວິໄລ ຮອງເລຂາພັກເມືອງ, ມີປະທານ ສຍ ເມືອງ ພ້ອມດ້ວຍປະຊາຊົນພາຍໃນບ້ານເຂົ້າຮ່ວມຢ່າງພ້ອມພຽງ. ການຈັດການເຜີຍແຜ່ໃນຄັ້ງນີ້ ແມ່ນເພື່ອປຸກລະດົມ, ໂຄສະນາ, ຊຸກຍູ້ໃຫ້ປະຊາຊົນໄດ້ຮັບການສັກວັກຊິນປ້ອງກັນພະຍາດ ໂຄວິດ-19 ພ້ອມທັງແນະນຳວິທີປ້ອງກັນຕົນເອງ, ສະມາຊິກພາຍໃນຄອບຄົວ ແລະ ຄົນອ້ອມຂ້າງທີ່ມີຄວາມສ່ຽງ, ຫຼີກເວັ້ນການຕິດເຊື້ອ ແລະ ແພ່ເຊື້ອຈາກພະຍາດດັ່ງກ່າວ. ນອກຈາກນີ້ ຍັງໄດ້ສາທິດວິທີການລ້າງມືດ້ວຍສະບູ ແລະ ແຈກອາຫານໂພຊະນາການເນື່ອງໃນໂອກາດວັນເດັກນ້ອຍສາກົນທີ່ຈະມາເຖິງນີ້ຕື່ມອີກ.