ໂທລະສັບ 021 316253

ການກໍາເນີດ ແລະ ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ

Jul 11, 2023 | ຂ່າວສານ ແລະ ກິດຈະກຳ

ການກໍາເນີດ ແລະ ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ
ແມ່ຍິງລາວບັນດາເຜົ່າ ເຄີຍມີມູນເຊື້ອດຸໝັ່ນຂະຫຍັນພຽນໃນການອອກແຮງງານ, ມີນ້ຳໃຈຮັກເຊື້ອແພງຊາດ, ຮັກບ້ານເກີດເມືອງນອນ, ມີນ້ຳໃຈເອື້ອເຟື້ອເພື່ອແຜ່, ມີຄວາມບໍລິສຸດຜຸດຜ່ອງ, ຮັກລູກແພງຜົວ, ຍອມທົນທຸກທົນຍາກເສຍສະຫຼະເພື່ອຄວາມສຸກຂອງຄອບຄົວ, ມີກິລິຍາມາລະຍາດສຸພາບອ່ອນຫວານ ແລະ ຮັກມູນມໍລະດົກວັດທະນະທຳອັນດີງາມຂອງຊາດລາວເຮົາ.
ໃນລະບອບສັກດີນາລ່າເມືອງຂຶ້ນ ພວກເຂົາຖືແມ່ຍິງເປັນເພດທີ່ອ່ອນແອ, ຫຼ້າຫຼັງ,ຖືກດູຖູກໝິ່ນ ປະໝາດ, ບໍ່ມີສິດ, ບໍ່ມີໂອກາດ, ບໍ່ມີເງື່ອນໄຂຍົກລະດັບຄວາມຮູ້, ຄວາມສາມາດໃນການ ພັດທະນາຕົນເອງ, ແມ່ຍິງຖືກບັງຄັບໃຫ້ເປັນທາດຮັບໃຊ້ ແລະ ຖືກກົດຂີ່ຂູດຮີດຈາກແອກສັກດີນາລ່າ ເມືອງຂຶ້ນແບບເກົ່າ ແລະ ແບບໃໝ່, ແອກຮີດຄອງປະເພນີອັນເກົ່າແກ່ຫຼ້າຫຼັງ ແລະ ແອກຄອບຄົວ, ແມ່ຍິງໄດ້ແບກຫາບພາລະອັນໜັກໜ່ວງ ແຕ່ບໍ່ມີບົດບາດຫຍັງໃນຄອບຄົວ ແລະ ສັງຄົມ. ຍ້ອນຄວາມຄຽດແຄ້ນຂອງບັນພະບູລຸດລາວ ແລະ ປະຊາຊົນລາວ ກໍຄືແມ່ຍິງລາວບັນດາເຜົ່າໃນແຕ່ລະ ຍຸກແຕ່ລະສະໄໝ ໄປຄຽງຄູ່ກັບຂະບວນການຕໍ່ສູ້ຕ້ານກັບຈັກກະພັດ ແລະ ສັດຕູຜູ້ຮຸກຮານ, ແມ່ຍິງລາວບັນດາເຜົ່າກໍໄດ້ເສີມຂະຫຍາຍຄຸນລັກສະນະທີ່ເປັນມູນເຊື້ອຂອງຕົນ ແລະ ເຂົ້າຮ່ວມຂະບວນການຕໍ່ສູ້ຢ່າງພິລະອາດຫານ. ພາຍໃຕ້ແສງສະຫວ່າງຂອງພັກຄອມມຸຍນິດອິນດູຈີນ ພັກປະຊາຊົນລາວ ໄດ້ຮັບການສ້າງຕັ້ງຂຶ້ນໃນວັນທີ 22 ມີນາ 1955, ພັກໄດ້ຖືແມ່ຍິງເປັນກຳລັງແຮງສຳຄັນແລະໄດ້ເອົາໃຈໃສ່ຢ່າງຈົດຈໍ່ຕໍ່ການປຸກລະດົມຂົນຂວາຍ, ກໍ່ສ້າງແມ່ຍິງໃຫ້ຕື່ນຕົວປະກອບສ່ວນເຂົ້າໃນພາລະກິດຕໍ່ສູ້ປົດ ປ່ອຍຊາດ. ດັ່ງນັ້ນ, ພັກຈຶ່ງໄດ້ວາງແນວທາງນະໂຍບາຍກ່ຽວກັບການປົດປ່ອຍແມ່ຍິງ ລວມມີ 2 ດ້ານ ທີ່ມີສາຍກ່ຽວພັນຢ່າງສະໜິດແໜ້ນແລະ ຊຸກຍູ້ຊຶ່ງກັນ ແລະ ກັນຄື: “ຢາກປົດປ່ອຍແມ່ຍິງຕ້ອງບົນພື້ນ ຖານການປົດປ່ອຍຊາດແລະປົດປ່ອຍຊົນຊັ້ນ, ຢາກປົດປ່ອຍຊາດ, ປົດປ່ອຍຊົນຊັ້ນຕ້ອງປຸກລະດົມ ແມ່ຍິງໃຫ້ເຂົ້າຮ່ວມຢ່າງເປັນຂະບວນການກວ້າງຂວາງຟົດຟື້ນ ແລະ ຕ້ອງປົດປ່ອຍແມ່ຍິງຢ່າງແທ້ຈິງ”.
ດ້ວຍການຊີ້ນຳ-ນຳພາຂອງພັກ ອົງການຈັດຕັ້ງແມ່ຍິງຂັ້ນຮາກຖານໄດ້ຖືກສ້າງຕັ້ງຂຶ້ນ ໂດຍເລີ່ມ ຈາກການຈັດຕັ້ງໜ່ວຍແມ່ນັກຮົບຢູ່ຊົນນະບົດ, ໜ່ວຍຍຸວັນນາລີຕາມຕົວເມືອງ, ການຈັດຕັ້ງດັ່ງກ່າວໄດ້ເຄື່ອນໄຫວ ແລະ ເຕີບໃຫຍ່ຂະຫຍາຍຕົວນັບມື້ນັບກວ້າງຂວາງ ແລະ ມີບົດບາດສຳຄັນຕໍ່ຂະ ບວນການປະຕິວັດຂອງປະເທດເຮົາ.
ມາເຖິງວັນທີ 20 ກໍລະກົດ 1955 ພັກໄດ້ສ້າງຕັ້ງໜ່ວຍຄົ້ນຄວ້າສະພາບແມ່ຍິງລາວ (ໜ່ວຍ ຄົ້ນຄວ້າວຽກງານແມ່ຍິງ) ຂຶ້ນຢ່າງເປັນທາງການນຳພາໂດຍ ທ່ານນ.ຄຳຫຼ້າ ວົງສັກ, ທ່ານນ. ຄຳສຸກ ວົງວິຈິດ ແລະ ທ່ານນ. ຄຳແພງ ບຸບຜາ ຊຶ່ງມີບົດບາດຕົ້ນຕໍໃນການເບິ່ງແຍງ,ລ້ຽງດູ, ຊຸກເຊື່ອງ, ຕິດຕໍ່ສົ່ງຂ່າວ, ສົ່ງເອກະສານຕ່າງໆໃຫ້ພະນັກງານ, ທະຫານ ທີ່ປະຕິບັດໜ້າທີ່ຢູ່ແນວໜ້າ ແລະ ໃນເຂດຄວບຄຸມຂອງສັດຕູ. ຜ່ານຂະບວນການຕໍ່ສູ້ກູ້ຊາດໃນແຕ່ລະໄລຍະຂອງປະຫວັດສາດ ເພື່ອການຄົງຕົວ ແລະຂະຫຍາຍຕົວຂອງຊາດເຮົາ. ໂດຍສະເພາະ ນັບແຕ່ໄລຍະທີ່ມີພັກປະຊາຊົນລາວໃນເມື່ອກ່ອນ ກໍຄື ພັກປະຊາຊົນປະຕິວັດລາວໃນປັດຈຸບັນ. ການຈັດຕັ້ງສະຫະພັນແມ່ຍິງລາວໄດ້ເຕີບໃຫຍ່ຂະຫຍາຍຕົວທາງດ້ານການຈັດຕັ້ງ ຊຶ່ງສະແດງອອກສະມາຊິກສະຫະພັນແມ່ຍິງມີຈໍານວນເພີ່ມຂຶ້ນໃນແຕ່ລະປີ. ມາຮອດປີ ໃນປີ 1984 ກອງປະຊຸມໃຫຍ່ຄັ້ງທີ I ແມ່ຍິງລາວທົ່ວປະເທດໄດ້ໄຂຂຶ້ນຢ່າງເປັນທາງການທີ່ນະຄອນຫຼວງວຽງຈັນ, ກອງປະຊຸມຄັ້ງນີ້ໄດ້ຕົກລົງເປັນເອກະພາບປ່ຽນຊື່ຈາກ “ສະມາຄົມແມ່ຍິງລາວຮັກຊາດມາເປັນສະຫະພັນແມ່ຍິງລາວ”, ກຳນົດພາລະບົດ ບາດຂອງສະຫະພັນແມ່ຍິງລາວ ແລະ ກຳນົດທິດທາງລວມ 5 ປີ, ພ້ອມທັງຮັບຮອງເອົາເນື້ອໃນຄຳຂວັນ 3 ດີ 2 ໜ້າທີ່ ຄື: 3 ດີ ພົນລະເມືອງດີ, ແມ່ທີ່ດີ, ເມຍທີ່ດີ; 2 ໜ້າທີ່ຄື: ປົກປັກຮັກສາ, ກໍ່ສ້າງປະເທດຊາດ ແລະ ປົດປ່ອຍແມ່ຍິງ, ກອງປະຊຸມໃນຄັ້ງນີ້ ໄດ້ເລືອກຄະນະບໍລິຫານງານສູນຫາງສະຫະພັນແມ່ຍິງລາວ ຈໍານວນ 27 ທ່ານ ແລະ ໄດ້ເປັນເອກະສັນກັນເລືອກຕັ້ງເອົາ ທ່ານ ນາງ ຄໍາແພງ ບຸບຜາ ເປັນປະທານຄະນະບໍລິຫານງານ ສູນກາງສະຫະພັນແມ່ຍິງລາວ, ເລືອກເອົາ ທ່ານ ນາງ ເພັດສະໝອນ ລາຊະສິມມາ ເປັນຮອງປະທານ. ກອງປະຊຸມໃຫຍ່ຄັ້ງທີ II ໄດ້ໄຂຂຶ້ນໃນວັນທີ 13-14 ຕຸລາ ປີ 1988 ກອງປະຊຸມໄດ້ວາງທິດທາງລວມຂອງສະຫະພັນແມ່ຍິງໄລຍະ 5 ປີ ລວມມີ 7 ໜ້າທີ່ ແລະ ໄດ້ຮັບຮອງເອົາຄຳຂວັນ 3 ດີ 2 ໜ້າທີ່ ຄື: ພົນລະເມືອງດີ, ສ້າງຄອບຄົວໃໝ່ດີ ແລະ ສ້າງຄວາມສາມັກຄີດີ. ສອງໜ້າທີ່ຄື: ປົກປັກຮັກສາ ແລະ ກໍ່ສ້າງປະເທດຊາດ ແລະ ໜ້າທີ່ພັດທະນາແມ່ຍິງ, ກອງປະຊຸມໃນຄັ້ງນີ້ ໄດ້ເລືອກຄະນະບໍລິຫານງານສູນກາງສະຫະພັນແມ່ຍິງລາວ ຈໍານວນ 37 ທ່ານ ແລະ ໄດ້ເປັນເອກະສັນກັນເລືອກເອົາ ທ່ານ ນາງ ອ່ອນຈັນ ທໍາມະວົງ ເປັນປະທານ, ເລືອກເອົາທ່ານ ນາງ ດາວອນ ວົງສັກ ເປັນຮອງປະທານ. ກອງປະຊູມໃຫຍ່ຄັ້ງທີ III ໄດ້ໄຂຂຶ້ນໃນວັນທີ 27-28 ທັນວາ ປີ 1993 ກອງປະຊຸມໄດ້ວາງ 7 ໜ້າທີ່ລວມຂອງ ສະຫະພັນແມ່ຍິງ ແລະ ໄດ້ຮັບຮອງເອົາຄຳຂວັນ 3ດີ ຄື: ພົນລະເມືອງດີ, ພັດທະນາດີ ແລະ ສ້າງຄອບຄົວວັດທະນະທຳດີ, ກອງປະຊຸມໃນຄັ້ງນີ້ ໄດ້ເລືອກຄະນະບໍລິຫານງານສູນຫາງສະຫະພັນແມ່ຍິງລາວ ຈໍານວນ 31 ທ່ານ ແລະ ໄດ້ເປັນເອກະສັນກັນເລືອກຕັ້ງເອົາ ທ່ານ ນາງ ອ່ອນຈັນ ທຳມະວົງ ເປັນປະທານ, ເລືອກເອົາ ທ່ານ ນາງ ເຂັມເພັດ ພົນເສນາ ແລະ ທ່ານ ນາງ ບົວວອນ ອ່ອນຈັນຫອມ ເປັນຮອງປະທານ. ກອງປະຊຸມໃຫຍ່ຄັ້ງທີ IV ໄດ້ໄຂຂຶ້ນໃນວັນທີ 19-22 ກຸມພາ ປີ 2001 ກອງປະຊຸມໄດ້ກຳນົດ 6 ຈຸດໝາຍລວມໄລຍະ 5 ປີ ແລະ 7 ທິດທາງໜ້າທີ່ ພ້ອມທັງໄດ້ຮັບຮອງເອົາເນື້ອໃນຄຳຂວັນ 3 ດີ ຄື: ພົນລະເມືອງດີ, ພັດທະນາດີ ແລະ ສ້າງຄອບຄົວວັດທະນະທຳດີ, ກອງປະຊຸມໃນຄັ້ງນີ້ ໄດ້ເລືອກຄະນະບໍລິຫານງານສູນຫາງສະຫະພັນແມ່ຍິງລາວ ຈໍານວນ 35 ທ່ານ ແລະ ໄດ້ເປັນເອກະສັນກັນເລືອກຕັ້ງເອົາ ທ່ານ ນາງ ອ່ອນຈັນ ທຳມະວົງ ເປັນປະທານ, ເລືອກເອົາ ທ່ານ ນາງ ເຂັມເພັດ ພົນເສນາ ເປັນຮອງປະທານ ແລະ ທ່ານ ນາງ ບົວວອນ ອ່ອນຈັນຫອມ ເປັນຮອງປະທານ ທັງເປັນປະທານກວດກາຄະນະບໍລິຫານງານສູນກາງສະຫະພັນແມ່ຍິງລາວ. ກອງປະຊຸມໃຫຍ່ ຄັ້ງທີ V ໄດ້ຂຶ້ນໃນວັນທີ 29-31 ພຶດສະພາ ປີ 2006 ໄດ້ວາງ 5 ຄາດໝາຍສູ້ຊົນ, 4 ທິດທາງລວມ 5 ປີ, ຮັບຮອງເອົາ V ແຜນງານ 16 ໂຄງການພັດທະນາແມ່ຍິງລາວ ແລະ ໄດ້ຮັບຮອງເອົາຂໍ້ແຂ່ງຂັນ 3 ດີ ຄື: ພົນລະເມືອງດີ, ພັດທະນາດີ ແລະ ສ້າງຄອບຄົວໃຫ້ມີຄວາມຜາສຸກ, ກອງປະຊຸມໃນຄັ້ງນີ້ ໄດ້ເລືອກຄະນະບໍລິຫານງານສູນຫາງສະຫະພັນແມ່ຍິງລາວ ຈໍານວນ 41 ທ່ານ ແລະ ໄດ້ເປັນເອກະສັນກັນເລືອກຕັ້ງເອົາ ທ່ານ ນາງ ສີໃສ ລືເດດມູນສອນ ເປັນປະທານ, ເລືອກເອົາ ທ່ານ ນາງ ຄໍາຈັນ ພົມແສງສະຫວັນ, ທ່ານ ນາງ ຈັນທຶມ ລັດມະນີ, ທ່ານ ດຣ ນາງ ອໍາໄພວັນ ຄໍາແສງສີວິໄລ ແລະ ທ່ານ ນາງ ບັນດິດ ປະທຸມວັນ ເປັນຮອງປະທານ ແລະ ເລືອກເອົາ ທ່ານ ນາງ ຈັນທຶມ ລັດມະນີ ເປັນປະທານກວດກາຂອງຄະນະບໍລິຫານງານສູນກາງສະຫະພັນແມ່ຍິງລາວ. ກອງປະຊຸມໃຫຍ່ຄັ້ງທີ VI ໄດ້ໄຂຂຶ້ນໃນວັນທີ 6-7 ມັງກອນ ປີ 2011 ໄດ້ຮັບຮອງເອົາທິດທາງໜ້າທີ່ ຊຶ່ງລວມມີ 8 ຄາດໝາຍສູ້ຊົນ, 6 ທິດທາງລວມ ແລະ ແຜນພັດທະນາແມ່ຍິງລາວ VI ແຜນງານ 32 ໂຄງການ, ຮັບຮອງເອົາຂໍ້ແຂ່ງ ຂັນ 3 ດີ ຄື: ພົນລະເມືອງດີ, ພັດທະນາດີ ແລະ ສ້າງຄອບຄົວດີມີຄວາມຜາສຸກ, ກອງປະຊຸມໃນຄັ້ງນີ້ ໄດ້ເລືອກຄະນະບໍລິຫານງານສູນຫາງສະຫະພັນແມ່ຍິງລາວ ຈໍານວນ 47 ທ່ານ ແລະ ໄດ້ເປັນເອກະສັນກັນເລືອກຕັ້ງເອົາ ທ່ານ ນາງ ສີໃສ ລືເດດມູນສອນ ເປັນປະທານ, ເລືອກເອົາ ທ່ານ ນາງ ຄໍາຈັນ ພົມແສງສະຫວັນ, ທ່ານ ນາງ ຈັນທຶມ ລັດມະນີ, ທ່ານ ນາງ ບັນດິດ ປະທຸມວັນ ແລະ ທ່ານ ດຣ ນາງ ອໍາໄພວັນ ຄໍາແສງສີວິໄລ ເປັນຮອງປະທານ ແລະ ເລືອກເອົາ ທ່ານ ນາງ ຈັນທຶມ ລັດມະນີ ເປັນປະທານກວດກາຂອງຄະນະບໍລິຫານງານສູນກາງສະຫະພັນແມ່ຍິງລາວ. ກອງປະຊຸມໃຫຍ່ຄັ້ງທີ VII ໄດ້ໄຂຂຶ້ນໃນວັນທີ 20-21 ຕຸລາ 2015 ໄດ້ຮັບຮອງເອົາບົດລາຍງານການເມືອງຂອງຄະນະບໍລິຫານງານສູນກາງສະຫະພັນແມ່ຍິງລາວ ກອງປະຊຸມໄດ້ເປັນເອກະພາບຮັບຮອງເອົາ 6 ຄາດໝາຍສູ້ຊົນ 8 ທິດທາງລວມໃນ 5 ປີຕໍ່ໜ້າ, ຮັບຮອງເອົາວິໄສທັດພັດທະນາແມ່ຍິງຮອດປີ 2030, ຍຸດທະສາດພັດທະນາແມ່ຍິງຮອດປີ 2025 ແລະ ແຜນພັດທະນາແມ່ຍິງລາວ 5 ປີ (2016-2020) ເຊິ່ງປະກອບມີ VIII ແຜນງານ 34 ໂຄງການ, ຮັບຮອງເອົາຄໍາຂວັນ “ພັດທະນາຄວາມສະເໝີພາບຍິງ-ຊາຍ ຕິດພັນກັບການພັດທະນາປະເທດຊາດ”, ຮັບຮອງເອົາຂໍ້ແຂ່ງຂັນ 3 ດີ ຄື: ພົນລະເມືອງດີ, ພັດທະນາດີ, ສ້າງຄອບຄົວດີ, ກອງປະຊຸມຄັ້ງນີ້ ໄດ້ປ່ອນບັດຄັດເລືອກເອົາຄະນະບໍລິຫານງານຈໍານວນ 53 ທ່ານ, ກອງປະຊຸມຄັ້ງປະຖົມມະລຶກ ໄດ້ເປັນເອກະສັນກັນເລືອກເອົາ ທ່ານ ນາງ ອິນລາວັນ ແກ້ວບຸນພັນ ເປັນປະທານຄະນະບໍລິຫານງານສູນກາງສະຫະພັນແມ່ຍິງລາວ, ເລືອກເອົາ ທ່ານ ນາງ ບັນດິດ ປະທຸມວັນ, ທ່ານ ນາງ ທຸມມາລີ ວົງພະຈັນ, ທ່ານ ນາງ ບົວຈັນ ສີຫານາດ ແລະ ທ່ານ ນາງ ສິລິກິດ ບຸບຜາ ເປັນຮອງປະທານ ແລະ ໄດ້ເລືອກເອົາ ທ່ານ ນາງ ທຸມມາລີ ວົງພະຈັນ ເປັນປະທານກວດກາສູນກາງສະຫະພັນແມ່ຍິງລາວ. ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII ໄດ້ໄຂຂຶ້ນໃນລະຫວ່າງວັນທີ 18-19 ພະຈິກ 2021 ທີ່ຫໍປະຊຸມແຫ່ງຊາດ ກອງປະຊຸມຄັ້ງນີ້ ໄດ້ຮັບຮອງເອົາ: ຄໍາຂວັນຂອງສະຫະພັນແມ່ຍິງລາວຄື “ພັດທະນາຄວາມສະເໝີພາບຍິງ-ຊາຍ ຕິດພັນກັບການພັດທະນາປະເທດຊາດ” ແລະ ຂໍ້ແຂ່ງຂັນ 3 ດີຄື: ພົນລະເມືອງດີ, ພັດທະນາດີ ແລະ ສ້າງຄອບຄົວດີ, ວິໄສທັດພັດທະນາແມ່ຍິງລາວຮອດປີ2035, ຍຸດທະສາດພັດທະນາແມ່ຍິງລາວຮອດປີ2030ແລະແຜນພັດທະນາແມ່ຍິງແຫ່ງຊາດ2021-2025
ແຜນພັດທະນາແມ່ຍິງແຫ່ງຊາດປະກອບດ້ວຍX ແຜນງານ65ໂຄງການຄື:
ແຜນງານທີ I: ພັດທະນາຊັບພະຍາກອນມະນຸດແລະປັບປຸງການຈັດຕັ້ງແມ່ຍິງ
ແຜນງານທີII: ສ້າງຄວາມເຂັ້ມແຂງໃນການບໍລິຫານວຽກງານແມ່ຍິງ
ແຜນງານທີIII: ສົ່ງເສີມການປະກອບອາຊີບ, ສົ່ງເສີມການເຂົ້າເຖິງແຫຼ່ງທຶນແລະສະໜອງການບໍລິການທາງດ້ານການເງິນໃຫ້ແກ່ແມ່ຍິງແລະຄອບຄົວ
ແຜນງານທີIV: ສົ່ງເສີມຄວາມກ້າວໜ້າຂອງແມ່ຍິງ, ສິດສະເໝີພາບຍິງ-ຊາຍແລະການນໍາໃຊ້ສະຖິຕິບົດບາດຍິງ-ຊາຍ
ແຜນງານທີV: ສົ່ງເສີມການຈັດຕັ້ງປະຕິບັດຂໍ້ແຂ່ງຂັນ3 ດີຕິດພັນກັບວຽກງານ3ສ້າງ, ຮັກສາສິ່ງແວດລ້ອມແບບຍືນຍົງ, ສົ່ງເສີມບົດບາດຍິງ-ຊາຍໃນການພັດທະນາແມ່ຍິງແລະຄອບຄົວ
ແຜນງານທີVI: ໂຄສະນາສຶກສາອົບຮົມການເມືອງ-ແນວຄິດ, ເສີມຂະຫຍາຍມູນເຊື້ອປະຫວັດສາດອັນດີງາມຂອງຊາດຂອງແມ່ຍິງ, ອະນຸລັກແລະສົ່ງເສີມສີມືຫັດຖະກໍາຂອງແມ່ຍິງລາວ
ແຜນງານທີVII: ສົ່ງເສີມການປົກປ້ອງສິດແລະຜົນປະໂຫຍດອັນຊອບທຳຂອງແມ່ຍິງແລະເດັກນ້ອຍເຂົ້າເຖິງຂະບວນການຍຸຕິທຳ
ແຜນງານທີVIII: ສ້າງຄວາມເຂັ້ມແຂງວຽກງານແຜນການແລະການຮ່ວມມືສາກົນ
ແຜນງານທີIX: ສົ່ງເສີມການເຂົ້າເຖິງຂໍ້ມູນຂ່າວສານ
ແຜນງານທີX: ຕິດຕາມ, ກວດກາວຽກງານແມ່ຍິງ
ກອງປະຊຸມໃຫຍ່ຄັ້ງທີ VIII ໄດ້ປ່ອນບັດຄັດເລືອກເອົາຄະນະບໍລິຫານງານ ຈໍານວນ 63 ທ່ານ. ກອງປະຊຸມຄັ້ງປະຖົມມະລຶກ ໄດ້ເປັນເອກະສັນກັນເລືອກເອົາ ທ່ານ ນາງ ອິນລາວັນ ແກ້ວບຸນພັນ ເປັນປະທານຄະນະບໍລິຫານງານສູນກາງສະຫະພັນແມ່ຍິງລາວ, ເລືອກເອົາ ທ່ານ ນາງ ສິລິກິດ ບຸບຜາ, ທ່ານ ນາງ ລາວັນ ສຸດທິສານ, ທ່ານ ນາງ ທໍາມາ ເພັດວິໄຊ ແລະ ທ່ານ ປອ ນາງ ຈັນໂສດາ ພອນທິບ ເປັນຮອງປະທານ ແລະ ໄດ້ເລືອກເອົາ ທ່ານ ນາງ ລາວັນ ສຸດທິສານ ເປັນປະທານກວດກາສູນກາງສະຫະພັນແມ່ຍິງລາວ.
ຕະຫຼອດໄລຍະ 68 ປີ ພາຍໃຕ້ການນຳພາຂອງພັກປະຊາ ຊົນປະຕິວັດລາວ ສະຫະພັນແມ່ຍິງລາວ ແມ່ນພາກສ່ວນໜຶ່ງທີ່ສຳຄັນ ເປັນກຳລັງແຮງໃຫ້ພັກໃນພາລະກິດຕໍ່ສູ້ ເພື່ອຄວາມເປັນເອກະລາດແຫ່ງຊາດ, ຜ່ານຂະບວນການດັ່ງກ່າວ ມີແມ່ຍິງຈຳ ນວນໜຶ່ງໄດ້ຮັບນາມມະຍົດເປັນວິລະຊົນແຫ່ງຊາດ, ນັກຮົບແຂ່ງຂັນ, ໄດ້ຮັບ ຫຼຽນໄຊ ແລະໃບຍ້ອງຍໍປະເພດຕ່າງໆ ຊຶ່ງຜົນງານອັນປະເສີດເລີດລໍ້າທີ່ກ່າວມາ ນັ້ນ ໄດ້ກາຍເປັນແວ່ນແຍງທີ່ໃສແຈ້ງໃຫ້ແມ່ຍິງລາວຮຸ່ນສືບທອດ. ໂດຍເຫັນໄດ້ຄວາມສໍາຄັນຂອງອົງການຈັດຕັ້ງສະຫະພັນແມ່ຍິງລາວ ພັກ-ລັດຖະບານໄດ້ຕີລາຄາສູງຕໍ່ການປະກອບສ່ວນຂອງສະຫະພັນແມ່ຍິງລາວ ໃນການເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເຮັດໃຫ້ສະຫະພັນແມ່ຍິງລາວ ໄດ້ຮັບການຍ້ອງຍໍເປັນແຕ່ລະລະດັບ ເປັນຕົ້ນໃນວາລະກອງປະຊຸມໃຫຍ່ຄັ້ງທີ I ແລະ ຄັ້ງທີ V ຜູ້ແທນແມ່ຍິງທົ່ວປະເທດ ໄດ້ຮັບການປະດັບຫຼຽນໄຊອິດສະຫຼະຊັ້ນ I ແລະ ໃນໂອກາດວັນສ້າງຕັ້ງສະຫະພັນແມ່ຍິງລາວ ຄົບຮອບ 60 ປີ ພັກ ແລະ ລັດຖະບານແຫ່ງ ສປປ ລາວ ໄດ້ປະດັບຫຼຽນຄໍາແຫ່ງຊາດໃຫ້ ສະຫະພັນແມ່ຍິງລາວ ຢ່າງສົມກຽດ.