ເພື່ອສະເຫຼີມສະຫຼອງວັນຊັບສິນທາງປັນຍາໂລກ ຄົບຮອບ 23 ປີ ພາຍໃຕ້ຄຳຂວັນ: “ບົດບາດແມ່ຍິງ ແລະ ຊັບສິນທາງປັນຍາ: ຊຸກຍູ້ສົ່ງເສີມນະວັດຕະກຳ ແລະ ຄວາມຄິດສ້າງສັນໃໝ່ (Women and IP: Accelerating innovation and creativity)”. ໃນວັນທີ 26 ເມສາ 2023 ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມສຳມະນາຂຶ້ນ, ມີບັນດາທ່ານແຂກຖືກເຊີນຈາກກະຊວງ-ອົງການ, ບັນດາພະນັກງານພາຍໃນກະຊວງ, ກະຊວງອ້ອມຂ້າງ, ນັກສຶກສາ ແລະ ຄູອາຈານຈາກມະຫາວິທະຍາໄລແຫ່ງຊາດ ແລະ ສະມາຄົມນັກທຸລະກິດຍິງເຂົ້າຮ່ວມຢ່າງພ້ອມພຽງ. ສູນກາງສະຫະພັນແມ່ຍິງເຂົ້າຮ່ວມໂດຍ ທ່ານ ນາງ ສຸພາພອນ ຜານິດ ຫົວໜ້າຫ້ອງການ ສສຍລ ພ້ອມດ້ວຍພະນັກງານ-ລັດຖະກອນ ສສຍລ ຈໍານວນ 30 ທ່ານ.
ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງການນຳສະເໜີຫົວຂໍ້ສຳຄັນ ເປັນຕົ້ນ ຄວາມໝາຍຄວາມສຳຄັນຂອງວຽກງານຊັບສິນທາງປັນຍາສຳລັບທຸລະກິດ ຈາກທ່ານ ສັນຕິສຸກ ພູນສະຫວັດ ຫົວໜ້າກົມຊັບສິນທາງປັນຍາ; ທ່ານ ນ. ສຸພາພອນ ຜານິດ ຈາກ ສສຍລ ນຳສະເໜີຫົວຂໍ້: ບົດບາດແມ່ຍິງໃນການສົ່ງເສີມນະວັດຕະກຳ ແລະ ຄວາມຄິດສ້າງສັນ ແລະ ທ່ານ ນ. ສຸວິພາ ບຸບຜາ ຈາກກົມນະໂຍບາຍການຕ່າງປະເທດ ກະຊວງອຸດສາຫະກຳ ແລະ ການຄ້າ ນໍາສະເໜີຫົວຂໍ້: ຊັບສິນທາງປັນຍາ ແລະ ການຄ້າທາງດ້ານເອເລັກໂຕຣນິກ. ນອກຈາກນີ້ຜູ້ເຂົ້າຮ່ວມໄດ້ຮ່ວມກັນແລກປ່ຽນຄຳຄິດຄຳເຫັນ ຖາມ-ຕອບ ຢ່າງກົງໄປກົງມາ ເຊິ່ງເຮັດໃຫ້ຜູ້ເຂົ້າຮ່ວມໄດ້ເຂົ້າໃຈແຈ້ງເຖິງວຽກງານຊັບສິນທາງປັນຍາຕື່ມອີກ.
