ຕອນບ່າຍວັນທີ 24 ມິຖຸນາ 2022 ກະຊວງພາຍໃນ ໄດ້ຈັດພິທີເຊັນສັນຍາອອກບັດພະນັກງານ-ລັດຖະກອນ ລະຫວ່າງ ກະຊວງພາຍໃນ ກັບ 04 ທະນາຄານ ທີ່ເຂົ້າຮ່ວມໂຄງການອອກບັດ ພະນັກງານ-ລັດຖະກອນ ໂດຍການເປັນປະທານຂອງ ທ່ານ ປອ ທອງຈັນ ມະນີໄຊ ລັດຖະມົນຕີກະຊວງພາຍໃນ, ມີຫົວໜ້າກົມ, ຫ້ອງການ, ສະຖາບັນ ແລະ ສູນ ສັງກັດກະຊວງພາຍໃນ, ຕາງໜ້າຈາກ 04 ທະນາຄານ ຄື: ທະນາຄານການຄ້າຕ່າງປະເທດລາວມະຫາຊົນ, ທະນາຄານພັດທະນາລາວຈໍາກັດ, ທະນາຄານສົ່ງເສີມກະສິກໍາ ແລະ ທະນາຄານຮ່ວມທຸລະກິດລາວ-ຫວຽດນາມຈໍາກັດ, ຕາງໜ້າຈາກອົງການຈັດຕັ້ງລັດ ແລະ ພະນັກງານທີ່ກ່ຽວຂ້ອງ ເຂົ້າຮ່ວມ. ໃນພິທີ ທ່ານ ສິງທະວອນ ດາລາວົງ ຫົວໜ້າກົມຄຸ້ມຄອງລັດຖະກອນ ໄດ້ຂຶ້ນຜ່ານບົດລາຍງານກ່ຽວກັບການຈັດຕັ້ງປະຕິບັດວຽກງານການອອກບັດພະນັກງານ-ລັດຖະກອນ ໃນໄລຍະຜ່ານມາ, ຜ່ານຂໍ້ຕົກລົງຮັບຮອງເອົາ 04 ທະນາຄານເຂົ້າຮ່ວມໂຄງການ ການອອກບັດພະນັກງານ-ລັດຖະກອນ ແລະ ຜ່ານຮູບແບບບັດພະນັກງານ-ລັດຖະກອນ.
ການຈັດພິທີເຊັນສັນຍາ ເພື່ອເຮັດໃຫ້ການຈັດຕັ້ງປະຕິບັດການອອກບັດ ໃຫ້ພະນັກງານ-ລັດຖະກອນ ທົ່ວປະເທດ ສໍາເລັດຕາມແຜນການທີ່ກໍານົດໄວ້ ທັງເປັນການອໍານວຍຄວາມສະດວກໃນການນໍາໃຊ້ບັດຂອງພະນັກງານ ທັງສູນກາງ ແລະ ທ້ອງຖິ່ນ ໃຫ້ມີຄວາມສະດວກສະບາຍ ໃນການເຂົ້າເຖິງລະບົບບໍລິການຂອງທະນາຄານໄດ້ງ່າຍ ແລະ ຢ່າງວ່ອງໄວ. ຕອນທ້າຍພິທີໄດ້ມີການເຊັນສັນຍາກ່ຽວກັບການໃຫ້ບໍລິການ ອອກບັດພະນັກງານ-ລັດຖະກອນ ລະຫວ່າງ ກະຊວງພາຍໃນ ໂດຍແມ່ນ ທ່ານ ນາງ ແພງພັນ ດວງປະຊາ ຮອງຫົວໜ້າຫ້ອງການ ກະຊວງພາຍໃນ ແລະ ຕາງໜ້າຈາກ 04 ທະນາຄານທຸລະກິດ.
