ຕອນເຊົ້າວັນທີ 8 ພະຈິກ 2023 ສູນກາງສະຫະພັນແມ່ຍິງລາວ ຮ່ວມກັບ ສູນບໍລິຫານລັດດິຈິຕອນ ກະຊວງເຕັກໂນໂລຊີ ແລະ ການສື່ສານ ຈັດກອງປະຊຸມເຜີຍແຜ່ ບັນດາລະບົບບໍລິຫານ ແລະ ບໍລິການລັດດິຈິຕອນ ແລະ ຝຶກອົບຮົມນໍາໃຊ້ລະບົບຫ້ອງການທັນສະໄໝ (E-Office) ຂຶ້ນທີ່ສູນກາງສະຫະພັນແມ່ຍິງລາວ ໂດຍການເປັນປະທານຂອງ ທ່ານ ນາງ ທຳມາ ເພັດວິໄຊ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ; ມີທ່ານ ຄຳຜາຍ ອິນທະຣາ ຮອງຫົວໜ້າສູນບໍລິຫານລັດດິຈິຕອນ ກະຊວງເຕັກໂນໂລຊີ ແລະ ການສື່ສານ ພ້ອມດ້ວຍຄະນະ, ຄະນະຫ້ອງການ, ກົມ, ສູນ, ຫ້ອງການ ຄຊກມດ, ຄະນະພະແນກ ແລະ ພະນັກງານວິຊາການ ຕາງໜ້າຈາກບັນດາຫ້ອງການ, ກົມ, ສູນ ພາຍໃນ ສສຍລ ເຂົ້າຮ່ວມທັງໝົດ 38 ທ່ານ, ຊາຍ 7 ທ່ານ.
ໃນພິທີທ່ານ ນາງ ທຳມາ ເພັດວິໄຊ ຮອງປະທານຄະນະບໍລິຫານງານ ສສຍລ ໄດ້ກ່າວເປີດຢ່າງເປັນທາງການ ພ້ອມທັງມີຄໍາເຫັນຕໍ່ທີ່ປະຊຸມວ່າ ການຈັດຊຸດຝຶກອົບຮົມຄັ້ງນີ້ ແມ່ນກິດຈະກຳໜຶ່ງໃນການຈັດຕັ້ງປະຕິບັດຕາມສັນຍາການຮ່ວມມື 2 ຝ່າຍ ລະຫວ່າງ ສູນກາງສະຫະພັນແມ່ຍິງລາວ ແລະ ກະຊວງເຕັກໂນໂລຊີ ແລະ ການສື່ສານ, ແນໃສ່ເພື່ອສ້າງ ແລະ ເສີມຂະຫຍາຍກຳລັງແຮງໃຫ້ແກ່ຖັນແຖວພະນັກງານໄດ້ຮັບຮູ້, ເຂົ້າໃຈ ແລະ ສາມາດນໍາໃຊ້ລະບົບຫ້ອງການທັນສະໄໝ (E-Office) ເຂົ້າໃນວຽກງານວິຊາສະເພາະ ເປັນຕົ້ນ ໜ່ວຍງານຂາເຂົ້າ-ຂາອອກ, ເລຂານຸການ, ບໍລິຫານຂອງບັນດາກົມ; ການນຳໃຊ້ລະບົບຫ້ອງການທັນສະໄໝເຂົ້າໃນການເຄື່ອນໄຫວວຽກງານດ້ານການສົ່ງ-ຮັບ, ຈັດເກັບເອກະສານຕ່າງໆຢູ່ຫ້ອງການ, ບັນດາກົມ, ສູນ ໃຫ້ມີຄວາມສະດວກວ່ອງໄວທັງຮັບປະກັນຄວາມປອດໄພ ແລະ ທັນກັບສະພາບການຂອງວຽກງານໃນແຕ່ລະໄລຍະ. ພ້ອມນັ້ນ ທ່ານຍັງໄດ້ເນັ້ນໜັກໃຫ້ສຳມະນາກອນທັງໝົດ ຈົ່ງຄົ້ນຄວ້າ, ກຳແໜ້ນ ຄວາມຮັບຮູ້ໃໝ່, ລົງເລິກດ້ານວິຊາການເຕັກນິກຕົວຈິງ ເພື່ອເຮັດໃຫ້ການຝຶກອົບຮົມຄັ້ງນີ້ ມີຜົນສຳເລັດດ້ວຍຄຸນນະພາບສູງ. ຈາກນັ້ນ ທ່ານ ຄຳຜາຍ ອິນທະຣາ ຮອງຫົວໜ້າສູນບໍລິຫານລັດດິຈິຕອນ ກະຊວງເຕັກໂນໂລຊີ ແລະ ການສື່ສານ ໄດ້ບັນຍາຍກ່ຽວກັບການຫັນເປັນລັດຖະບານດິຈິຕອນ ແລະ ການຫັນລະບົບຫ້ອງການເປັນທັນສະໄໝ ເຊິ່ງທ່ານໄດ້ຍົກໃຫ້ເຫັນເຖິງຄວາມໝາຍ, ຄວາມສໍາຄັນ, ຄວາມຈໍາເປັນ ທີ່ລັດຖະບານນໍາເອົາເຕັກໂນໂລຊີດິຈິຕອນເຂົ້າມານຳໃຊ້ໃນວຽກງານການບໍລິຫານ-ການບໍລິການລັດ ທີ່ທັນສະໄໝ ແລະ ມີລະບົບເຊື່ອມໂຍງ ເຂົ້າເຖິງຂໍ້ມູນລະຫວ່າງພາກລັດ, ພາກທຸລະກິດ ແລະ ປະຊາຊົນ ເພື່ອສ້າງເງື່ອນໄຂທີ່ສະດວກ, ເຂົ້າເຖິງງ່າຍ, ທັນສະໄໝ, ໂປ່ງໃສ, ວ່ອງໄວ, ປະຢັດ ແລະ ປອດໄພ. ການຝຶກອົບຮົມຄັ້ງນີ້ ດໍາເນີນເປັນເວລາ 3 ວັນ ທີ່ຫ້ອງປະຊຸມສູນກາງສະຫະພັນແມ່ຍິງລາວ.
