ໂທລະສັບ 021 316253

ກອງປະຊຸມສ່ອງແສງປະຈຳ 6 ເດືອນຕົ້ນປີ ແລະ ວາງທິດທາງແຜນການ ປະຈຳ 6 ເດືອນທ້າຍປີ 2023

Sep 20, 2023 | ຂ່າວສານ ແລະ ກິດຈະກຳ

ວັນທີ 1 ກັນຍາ 2023 ສູນກາງສະຫະພັນແມ່ຍິງລາວ ຈັດກອງປະຊຸມສ່ອງແສງປະຈຳ 6 ເດືອນຕົ້ນປີ ແລະ ວາງທິດທາງແຜນການ ປະຈຳ 6 ເດືອນທ້າຍປີ 2023 ຂອງບັນດາ ສຍ ກະຊວງ-ອົງການ ອ້ອມຂ້າງ; ໂດຍການເປັນປະທານຂອງ ທ່ານນ. ທຳມາ ເພັດວິໄຊ ຮອງປະທານຄະນະບໍລິຫານງານ ສສຍລ; ມີບັນດາສະຫະພັນແມ່ຍິງອອ້ມຂ້າງສູນກາງ ແລະ ສະມາຄົມນັກທຸລະກິດຍິງເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງການລາຍງານວຽກງານທີ່ພົ້ນເດັ່ນໃນໄລຍະຜ່ານມາ ພ້ອມທັງທິດທາງແຜນການໃນຕໍ່ໜ້າ ຈາກທ່ານນ. ສຸພາພອນ ຜານິດ ຫົວໜ້າຫ້ອງການ ສສຍລ, ພ້ອມນີ້ ທ່ານນ. ເຫຼັກ ແສນຄຳວົງສາ ຫົວໜ້າກົມຈັດຕັ້ງ-ພະນັກງານ ໄດ້ຜ່ານມາດຖານເງື່ອນໄຂນາມມະຍົດແມ່ດີເດັ່ນ ພ້ອມທັງແນະນຳການກະກຽມກອງປະຊຸມໃຫຍ່ ສະຫະພັນແມ່ຍິງແຕ່ລະຂັ້ນ. ນອກຈາກນີ້ຄະນະສະຫະພັນແມ່ຍິງສຳນັກ ສສຍລ ໄດ້ນຳສະເໜີກ່ຽວກັບຜະລິດຕະພັນໂຄງການຈຳປາຄຳ ເພື່ອໃຫ້ຜູ້ເຂົ້າຮ່ວມໄດ້ຮັບຮູ້ ແລະເຂົ້າໃຈຕື່ມກ່ຽວກັບວຽກງານດັ່ງກ່າວ. ໂອກາດນີ້ຜູ້ເຂົ້າຮ່ວມກໍໄດ້ພ້ອມກັນປະກອບຄຳຄິດຄຳເຫັນໃສ່ບົດສະຫຼຸບລາຍງານເພື່ອໃຫ້ຄົບຖ້ວນ ແລະ ສົມບູນ. ໂອກາດທີ່ມີຄວາມໝາຍສຳຄັນນີ້ ທ່ານຮອງປະທານ ສສຍລ ໄດ້ມີຄໍາເຫັນໂອ້ລົມຕໍ່ກອງປະຊຸມດັ່ງກ່າວ ເພື່ອເປັນເຂັມທິດເຍືອງທາງໃນການຈັດຕັ້ງປະຕິບັດວຽກງານໃນຕໍ່ໜ້າໃຫ້ມີຜົນສຳເລັດເທື່ອລະກ້າວ. ພ້ອມດຽວກັນນີ້ ທ່ານຮອງປະທານ ສສຍລ ກໍໄດ້ໃຫ້ກຽດໂອ້ລົມ ຄະນະສະຫະພັນແມ່ຍິງ ບັນດາກະຊວງ, ອົງການ ລວມທັງ ຄະນະ ສຍ ສູນກາງສະຫະພັນແມ່ຍິງລາວ ຈໍານວນ 15 ທ່ານ ທີ່ຈະໄປເຂົ້າຮ່ວມຝຶກອົມຮົມວຽກງານແມ່ຍິງ ຢູ່ ສສ ຫວຽດນາມ ໄລຍະ 2 ເດືອນ ເລີ່ມແຕ່ວັນທີ 6 ກັນຍາ ຫາ 4 ພະຈິກ 2023 ເຊິ່ງທ່ານໄດ້ເນັ້ນໜັກໃຫ້ເອົາໃຈໃສ່ແລກປ່ຽນບົດຮຽນ ເພື່ອນໍາເອົາຄວາມຮູ້, ບົດຮຽນອັນດີມາໝູນໃຊ້ເຂົ້າໃນວຽກງານຂອງແຕ່ລະຂົງເຂດທີ່ຕົນຮັບຜິດຊອບ.